រាជធានីភ្នំពេញ ៖ លោកនាយឧត្តមសេនីយ៍ មាស វិរិទ្ធ អគ្គលេខាធិការ អាជ្ញាធរជាតិ ប្រយុទ្ធប្រឆាំងគ្រឿងញៀនបានថ្លែងថា ក្រុមឧក្រិដ្ឋជននៅតែប្រើប្រាស់កម្ពុជាធ្វើជាទីកន្លែងឆ្លងកាត់គ្រឿងញៀន ពិសេសនៅតាមបណ្ដាខេត្តជាប់ព្រំដែនជាមួយប្រទេសជិតខាង ដូច្នេះភាគីពាក់ព័ន្ធត្រូវមានវិធានការទប់ស្កាត់គ្រប់ពេលវេលាផងដែរ ។
យោងតាមរបាយការណ៍សង្ខេបស្ដីពីលទ្ធផលការងារត្រួតពិនិត្យគ្រឿងញៀន ឆ្នាំ២០១៩ និងទិសដៅការងារ ឆ្នាំ២០១៩ អានដោយលោកនាយឧត្តមសេនីយ៍ មាស វិរិទ្ធ ក្នុងពិធីបើកសន្និបាតបូកសរុបលទ្ធផលការងារ ត្រួតពិនិត្យគ្រឿងញៀន ឆ្នាំ២០១៩ និងទិសដៅការងារ ឆ្នាំ២០២០ និងកិច្ចប្រជុំបូកសរុបលទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ នាព្រឹកថ្ងៃទី១៦ ខែមីនានេះ នៅទីស្ដីការក្រសួងមហាផ្ទៃ ដោយមានការចូលរួមលោកនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានបញ្ជាក់ថា «ក្រុមឧក្រិដ្ឋជននៅតែប្រើប្រាស់កម្ពុជាធ្វើជាទីកន្លែងឆ្លងកាត់គ្រឿងញៀន ពិសេសបណ្ដាខេត្តជាប់ព្រំដែនជាមួយប្រទេសជិតខាង ហើយបច្ចុប្បន្នចរន្ដហូរចូលគ្រឿងញៀនមកកម្ពុជាក្រៅពីទិសនៅភាគឥសានក៏មានការហូរចូលតាមព្រំដែន កម្ពុជា-ថៃ និងមានការលួចនាំចេញតាមច្រកព្រំដែន កម្ពុជា-វៀតណាម ជាករណីបទល្មើសគ្រឿងញៀនធំៗផងដែរ។
ក្នុងពិធីនោះដែរលោក នាយឧត្តមសេនីយ៍ កែ គឹមយ៉ាន ទាមទារឱ្យបន្តចាត់វិធានការកាន់តែសកម្មថែមទៀតដើម្បីបង្ការទប់ស្កាត់បង្ក្រាប និងដោះស្រាយឱ្យមានប្រសិទ្ធភាពពាក់ព័ន្ធនឹងគ្រឿងញៀន ។ លោកនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនណែនាំឱ្យថ្នាក់ដឹកនាំអាជ្ញាធរជាតិប្រយុទ្ធប្រឆាំងគ្រឿងញៀនក៏ដូចជា ក្រសួងស្ថាប័ន អង្គភាពពាក់ព័ន្ធទាំងនៅថ្នាក់ជាតិ និងថ្នាក់ក្រោមជាតិ បន្តចាត់វិធានការឱ្យកាន់តែសកម្មថែមទៀត និងបំពញបន្ថែមនូវរាល់ចំណុចខ្វះខាត ដើម្បីបង្ការ ទប់ស្កាត់ បង្ក្រាប និងដោះស្រាយឱ្យមានប្រសិទ្ធភាពពាក់ព័ន្ធនឹងគ្រឿងញៀន ។
ទន្ទឹមនឹងនេះ ចំពោះការដាំដុះ ការផលិត ការចរាចរ និងការប្រើប្រាស់គ្រឿងញៀនក្នុងតំបន់ ពិភពលោក កំពុងជះឥទ្ធិពលមកលើប្រទេសយើងដែលទាមទារឱ្យពិនិត្យ និងវិភាគដើម្បីឈានដល់ការដាក់ចេញវិធានការសមស្រប និងមានប្រសិទ្ធភាពនៅក្នុងឆ្នាំ២០២០ ។ ដោយឡែក ការចាត់ចែងចលនៈ និងអចលនៈទ្រព្យដែលបានពីការរឹបអូសពីបទល្មើសគឺនៅមានភាពយឺតយ៉ាវ ដែលធ្វើឱ្យទ្រព្យជាច្រើនបាត់បង់គុណភាព និងតម្លៃសេដ្ឋកិច្ច ដែលបញ្ហានេះក៏ជាចំណែកមួយជះឥទ្ធិពលអវិជ្ជាមានដល់ការងារប្រយុទ្ធប្រឆាំងគ្រឿងញៀនផងដែរ ៕
ចែករំលែកព័តមាននេះ