បុរសជនជាតិបារាំងអាយុ៣៣ឆ្នាំម្នាក់ ជាប់ពន្ធនាគារព្រោះតែរំខានមិត្តស្រីជាង២ម៉ឺនដងតាមរយៈទូរស័ព្ទ ។ សារព័ត៌មានបរទេសផ្សាយឱ្យដឹងកាលពីពេល ថ្មីៗនេះថា បុរសនោះត្រូវតុលាការកាត់ទោសដាក់ពន្ធនាគាររយៈពេល៤ខែ និងត្រូវពិន័យជាប្រាក់១.៣០០ដុល្លារ សម្រាប់ជាសំណងជំងឺចិត្តដល់មិត្តស្រីរបស់គេដែលជាម្ចាស់ពាក្យបណ្តឹង ។ តាមរយៈពាក្យបណ្តឹងដែលដាក់ទៅតុលាការបារាំង ការរំខានមិត្តស្រីតាមរយៈទូរស័ព្ទនោះចំនួន២១.៨០៧ដង ក្នុងរយៈពេល១០ខែ ។
បុរសជាប់ចោទនិយាយក្នុងសវនាការនៅទីក្រុងលីយ៉ុង ប្រទេសបារាំង កាលពីថ្ងៃទី៥ កញ្ញា ២០១៤ ថា គេហៅ ឬផ្ញើសារតាមទូរស័ព្ទគឺដើម្បីឱ្យសង្សារផ្ញើលុយឱ្យគេបង់ថ្លៃជួលផ្ទះដែលស្នាក់នៅជាមួយគ្នា កាលពីពេលកន្លងទៅ ។ ទោះជាយ៉ាងណាក្តីនាងមិនព្រមទទួលទូរស័ព្ទរបស់គេទេ សូម្បីតែគេផ្ញើសារជាសំឡេង ឬជារូបភាពក៏ដោយ ក៏នាងមិនឆ្លើយតបដែរ។ ទោះបីជួបរឿងបែបនោះក៏ដោយ រូបគេនៅតែព្យាយាមហៅទូរស័ព្ទទៅនាងចំនួន៧៣ដងក្នុងមួយថ្ងៃ ។ តុលាការក្រៅពីកាត់ទោសដាក់ពន្ធនាគារថែមទាំងសម្រេចឱ្យបុរសនោះឈប់ទាក់ទងជាមួយនារីជាគូសង្សារតទៅទៀត ៕
ចែករំលែកព័តមាននេះ