រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេញ នាព្រឹកថ្ងៃទី១១ កញ្ញា បានធ្វើការចោទប្រកាន់លោក សំ សារិទ្ធ ដែលលោកទេសរដ្ឋមន្ត្រី ឱម យុិនទៀង ប្រធានអង្គភាពប្រឆាំងអំពើពុករលួយមានប្រសាសន៍ថា ជាមន្ត្រីអធិការកិច្ចក្រសួងយុត្តិធម៌ និងមុននេះត្រូវបានស្គាល់ត្រឹមជាជំនួយការមន្ត្រីធំម្នាក់នៅក្រសួងយុត្តិធម៌ ពីបទឆបោក និងបានដាក់ជូនទៅខាងចៅក្រម ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន រង់ចាំបើកការស៊ើបអង្កេត និងឈានទៅសវនាការផ្តន្ទាទោសតាមផ្លូវច្បាប់ ។
លោក សំ សារិទ្ធ ត្រូវបានកម្លាំងសមត្ថកិច្ចអង្គភាពប្រឆាំងអំពើពុករលួយ ចាប់ឃាត់ខ្លួនកាលពីថ្ងៃទី៨ កញ្ញា នៅក្នុងហាងមួយក្នុងរាជធានីភ្នំពេញ ដែលជាប់ពាក់ព័ន្ធថាបានប្រើប្រាស់ទូរស័ព្ទទារប្រាក់ពីឈ្មួញរកស៊ីទិញ និងជីកដីលក់ចំនួន១៥ម៉ឺនដុល្លារអាមេរិក ។ ប្រភពស្និទ្ធនឹងជនរងគ្រោះបានឱ្យដឹងថា កន្លងទៅលោក ហ៊ុន ប៊ុនធឿន ហៅតាលាង មានបញ្ហាទំនាស់រឿងដីធ្លីជាមួយអ្នកស្រី ឃួន ម៉ាលីន ។ រឿងនេះ អ្នកស្រី ឃួន ម៉ាលីន បានប្រមូលឯកសារពាក់ព័ន្ធទៅពឹងពាក់លោក សំ សារិទ្ធ ដែលនៅសាលាដំបូងរាជធានីភ្នំពេញ គេបានស្គាល់ថា លោកជាជំនួយការរដ្ឋលេខាធិការក្រសួងយុត្តិធម៌ម្នាក់ ។
ដោយសារដឹងថា លោក សំ សារិទ្ធ មានមុខងារខ្ពង់ខ្ពស់ដូច្នេះហើយ បានជាអ្នកស្រីឃួន ម៉ាលីន ពឹងពាក់ឱ្យជួយរឿងក្តីនេះ ។ លោក សំ សារិទ្ធ ក្រោយពេលបានឯកសារហើយ បែរជាទៅជួបលោក ហ៊ុន ប៊ុនធឿន ហៅតាលាង និយាយគ្នាចុះទ្បើងទារលុយពីតាលាង យកទៅចាយវាយផ្ទាល់ខ្លួនមិនបានគិតរកយុត្តិធម៌ឱ្យអ្នកស្រី ឃួន ម៉ាលីន ដែលបានពឹងពាក់នោះទេ ។ អ្នកស្និទ្ធនឹងជនរងគ្រោះនិយាយទៀតថា លោក សំ សារិទ្ធ បានឱបឯកសារដីធ្លីទៅបង្ហាញតាលាង យកប្រាក់ម្តង៥០០ដុល្លារ ម្តង១០០០ដុល្លារ ម្តង២០០០ដុល្លារអាមេរិក រហូតចុងក្រោយ សម្លុតតាលាងបានដល់ទៅ១០.០០០ដុល្លារ ។ ពិតណាស់ថា តាលាងដែលជាឈ្មួញរកស៊ីទិញនិងជីកដីលក់នោះ ត្រូវចាញ់បោកលោក សំ សារិទ្ធ អស់ប្រាក់ជាង១ម៉ឺនដុល្លារ ដែលលទ្ធផលគ្មានបានអ្វីសោះ ។
នៅថ្ងៃទី៨ កញ្ញា លោក សំ សារិទ្ធ បានទារប្រាក់ពីលោក ហ៊ុន ប៊ុនធឿន ចំនួន១៥ម៉ឺនដុល្លារ ដោយនិយាយថា ដើម្បីបញ្ចប់រឿង ។ ពេលនោះ តាលាង គិតថា នេះជារឿងដដែលពេក ហើយទាររហូតដល់១៥ម៉ឺនដុល្លារ ធ្វើឱ្យគាត់ទ្រាំមិនបានក៏ប្តឹងទៅអង្គភាពប្រឆាំងអំពើពុករលួយ ឱ្យចាត់ការរឿងនេះ ។ លុះនៅព្រឹកថ្ងៃទី៨ កញ្ញា អង្គភាពប្រឆាំងអំពើពុករលួយ ក៏បានរៀបអន្ទាក់ចាប់ឈ្មោះ សំ សារិទ្ធ នៅពេលទៅទទួលយកប្រាក់ពីតាលាង ។ នាព្រឹកថ្ងៃទី១១ កញ្ញា អង្គភាពប្រឆាំងអំពើពុករលួយ បានបញ្ជូនឈ្មោះ សំ សារិទ្ធ ទៅកាន់សាលាដំបូងរាជធានីភ្នំពេញ ទើបតំណាងអយ្យការចោទប្រកាន់ជាផ្លូវការពីបទឆបោក តាមមាត្រា៣៧៧និង៣៨០ នៃក្រមព្រហ្មទណ្ឌ ហើយនៅរសៀលថ្ងៃដដែល ចៅក្រមបានសម្រេចឃុំខ្លួនឈ្មោះ សំ សារិទ្ធ ដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ