ខេត្តបន្ទាយមានជ័យ ៖ នារីជាជំនួយការស្មៀនឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រូវជនមិនស្គាល់មុខចាប់ឡើងរថយន្តនៅវេលាម៉ោង៦និង២០នាទីយប់ ថ្ងៃទី១៣ ខែមីនានេះ រហូតមកទល់ល្ងាចថ្ងៃទី១៤ ខែមីនា…
ខេត្តបន្ទាយមានជ័យ ៖ នារីជាជំនួយការស្មៀនឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រូវជនមិនស្គាល់មុខចាប់ឡើងរថយន្តនៅវេលាម៉ោង៦និង២០នាទីយប់ ថ្ងៃទី១៣ ខែមីនានេះ រហូតមកទល់ល្ងាចថ្ងៃទី១៤ ខែមីនា ឆ្នាំ២០២០ នៅមិនទាន់ដឹងដំណឹងនៅឡើយ ។
លោកវរសេនីយ៍ទោ សែស វិបុល អធិការនគរបាលស្រុកអូរជ្រៅបានឲ្យដឹងថា នារីរងគ្រោះឈ្មោះ អឿន ស្រីនិច អាយុ២៤ឆ្នាំ ជាកូនកំព្រា នៅជាមួយម្តាយមីង នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ សព្វថ្ងៃបំរើការជាជំនួយការស្មៀនឃុំអូរបីជាន់ ស្រុកអូរជ្រៅ ។
លោកវរសេនីយ៍ទោ សែស វិបុល បានបន្តថា ក្រោយពីមានករណីចាប់នារីរងគ្រោះខាងលើ កម្លាំងនគរបាលស្រុកអូរជ្រៅ និងកម្លាំងនគរបាលប៉ុស្តិ៍រដ្ឋបាលឃុំអូរបីជាន់បានចុះធ្វើការស្រាជ្រាវ ជុំវិញករណីនេះ ។ នៅមុនពេលកើតហេតុ ថ្ងៃទី១៣ ខែមីនា ឆ្នាំ២០២០ គឺជនរងគ្រោះបានជិះម៉ូតូជាមួយក្មេងស្រី លាង សុគន្ធា អាយុ១០ឆ្នាំ យកឡេទៅឲ្យគេនៅអូរបីជាន់ ឃុំអូរបីជាន់ ស្រុកអូរជ្រៅ ពេលត្រឡប់មកវិញជិតដល់ផ្ទះ ស្រាប់តែមានជនសង្ស័យចំនួន២នាក់ ក្តាប់អត្តសញ្ញាណមិនបាន បើករថយន្តកាម៉ារីពណ៌ខ្មៅ ក្តាប់ស្លាកលេខមិនបានបានហៅម៉ូតូឲ្យឈប់ ចម្ងាយ៣០ម៉ែត្រ ដើម្បីនិយាយគ្នាពេលនោះនារីរងគ្រោះនិយាយថា យើងមិនដែលស្គាល់គ្នាផង ហើយជនសង្ស័យម្នាក់បានចុះពីលើរថយន្តចាប់ជនរងគ្រោះដោយនិយាយថាអូនឯងធ្វើបាបចិត្តបងណាស់ រួចទាញចូលក្នុងរថយន្តបើកចេញទៅបាត់ ។
លោកអធិការបានបញ្ជាក់ថា ឆ្លងតាមការស្រាវជ្រាវនារីរងគ្រោះធ្លាប់មានសង្សា ហើយបានភ្ជាប់ពាក្យជាមួយបុរសម្នាក់ឈ្មោះ គុណ សារ៉ាក អាយុ២៤ឆ្នាំ ភេទប្រុស នៅភូមិនិមិត្ត១សង្កាត់និមិត្ត ក្រុងប៉ោយប៉ែត នៅថ្ងៃទី២១ ខែតុលា ២០១៩ មកម្លេះនឹងរៀបការ នៅថ្ងៃទី៨ ខែមេសា ២០២០នេះ ៕
ចែករំលែកព័តមាននេះ