ប្រធានាធិបតីអាមេរិកលោកបារ៉ាក់ អូបាម៉ា វាយតម្លៃកាលពីថ្ងៃទី២៦ មីនា ថា បេសកកម្ម អន្តរជាតិនៅលីប៊ី ដែលច្បាស់និងតម្រង់លើគោលដៅទាំងឡាយកំពុងតែទទួលបានជោគជ័យ ។
សហរដ្ឋអាមេរិកកំពុងតែសិក្សាពីលទ្ធភាពផ្តល់អាវុធឱ្យដល់ពួកប្រឆាំងលីប៊ី ។ យោងតាមអ្នកកាសែតទាំងឡាយនៅលើទីលានថា ក្រុង AJDABIYA ត្រូវបានរំដោះជាថ្មី ។ ទីក្រុងយុទ្ធសាស្ត្រនេះស្ថិតនៅភាគខាងកើតលីប៊ីធ្លាក់ក្នុងកណ្តាប់ដៃពួកឧទ្ទាមកាលពីព្រឹកថ្ងៃទី២៦ មីនា ។ នេះជាជ័យជំនះសំខាន់លើកដំបូងរបស់ពួកបះបោរចាប់តាំងពីកងកម្លាំងចម្រុះធ្វើការវាយប្រហារយ៉ាងខ្លាំងក្លាលើកងកម្លាំងលោកកាដាហ្វី ដើម្បីឱ្យពួកបះបោរដែលរហូតមកទល់ពេលនេះ នៅពុំទាន់មានការរុលទៅមុខពិតប្រាកដធ្វើការវាយលុកជាថ្មី ។ ការវាយប្រហារតាមអាកាសកាលពីរសៀលថ្ងៃទី២៥ កុម្ភៈ លើទីតាំងទាំងឡាយរបស់កងកម្លាំងស្មោះត្រង់នឹងលោកកាដាហ្វីក្នុងទីក្រុងជាប់ឆ្នេរសមុទ្រនេះញុំងឱ្យកងកម្លាំងនេះដកខ្លួនថយចេញហើយនៅសល់តែខ្មោចរថក្រោះដែលត្រូវភ្លើងឆេះប៉ុណ្ណោះ ។
ក្រុមប្រឹក្សាជាតិរបស់ពួកបះបោរបានថ្លែង អំណរគុណដល់ប្រទេសបារាំង ដែលបានជួយខ្លួន ក៏ប៉ុន្តែពុំត្រូវការកងទ័ពជើងគោកឡើយ ។ កងយន្តហោះបារាំងបានកំទេចកាលពីថ្ងៃទី២៦ មីនា នូវយន្តហោះ៥គ្រឿង និងឧទ្ធម្ភាគចក្រ២គ្រឿង របស់លីប៊ី នៅព្រលានយន្តហោះក្រុង MAS-RATA ។ ក្រសួងការពារប្រទេសបារាំងក្នុងសេចក្តីប្រកាសមួយនិយាយថា កងយន្តហោះបារាំង កាលពីថ្ងៃទី២៦ មីនា បានចេញធ្វើការវាយប្រហារជាច្រើនលើកក្នុងតំបន់ ZENTA-NE និងក្រុងMISRATA ។ សេចក្តីប្រកាសនេះ និយាយថា ការត្រួតពិនិត្យដំបូងអាចបញ្ជាក់ពីការបំផ្លាញនៅលើដីក្នុងទីក្រុង MISRATA នូវយន្តហោះប្រយុទ្ធធុន GALEB យ៉ាងតិច៥គ្រឿង និងឧទ្ធម្ភាគចក្រប្រយុទ្ធធុន MI-35 យ៉ាងតិច២គ្រឿង ៕
ចែករំលែកព័តមាននេះ