បណ្ដាប្រទេសអឺរ៉ុប ៖ ជាមួយអ្នកឆ្លងវីរុសCOVID-19 កើនដល់ជាង១៣០.០០០នាក់ និងអ្នកបាត់បង់ជីវិត ឡើងដល់ជិត៥.០០០នាក់លើពិភពលោក ការឆ្លងរាលដាលនៃវីរុសនោះកាន់តែរាលដាល ដោយពេលនេះបានឆ្លងចាប់ពីតំបន់ស្កង់ឌីណាវអឺរ៉ុប ដល់ឥណ្ឌា អាមេរិកឡាទីន មជ្ឈឹមបូព៌ា។ បណ្ដារដ្ឋាភិបាលពិសេសនៅអឺរ៉ុបកំពុងតែស្ទុះស្ទារទប់ការឆ្លងជំងឺនោះ។
ប្រទេសបារាំងដែលមានអ្នកបាត់បង់ជីវិតដោយសារវីរុសនេះឡើងដល់៦១នាក់ នាយប់ថ្ងៃទី១២មីនាបានរាប់បញ្ចូល ក្នុងបញ្ជីបណ្ដាប្រទេសដែលបិទសាលារៀននិងសាកលវិទ្យាល័យ។
ប្រធានាធិបតីបារាំងលោកអេមម៉ានុយអែលម៉ាក្រុន ក្រៅពីប្រកាសពីវិធានការនោះបានស្នើដល់បណ្ដាមនុស្សចាស់ មានអាយុលើសពី៧០ឆ្នាំឡើងទៅ ឲ្យស្ថិតតែក្នុងផ្ទះកុំចេញក្រៅ តែពុំសម្រេចពន្យារពេលការបោះឆ្នោតក្រុងជុំទីមួយ ដែលគ្រោងធ្វើនាថ្ងៃទី១៥មីនាឡើយ។
លោកម៉ាក្រុនប្រកាសទៀតថា ការបិទព្រំដែននឹងអាចចាំបាច់នាប៉ុន្មានថ្ងៃឬប៉ុន្មានសប្ដាហ៍ខាងមុខនេះ។ លោកបន្តថា សហភាពអឺរ៉ុបត្រូវមានប្រតិកម្មដោយឆាប់រហ័សនិងខ្លាំង ដើម្បីជម្នះវិបត្តិសេដ្ឋកិច្ចពិភពលោក បណ្ដាលមកពីការឆ្លងរាលដាលនៃវីរុសនោះ។
លើពិភពលោកពិសេសនៅអឺរ៉ុប ដែលមានអ្នកឆ្លងវីរុសជា២០.០០០នាក់រួចហើយ ការឆ្លងបន្តកើននាំឲ្យប៉ះពាល់ខ្លាំងដល់ជីវភាពប្រចាំថ្ងៃរបស់បណ្ដាប្រជាជន កម្រិតការដើរហើរធ្វើដំណើរនិងបិទព្រំដែន។
អ៊ីតាលីអ្នកបាត់បង់ជីវិតឡើងដល់ជាង១ពាន់នាក់
ចំនួនអ្នកស្លាប់ដោយសារវីរុសCOVID-19នៅអ៊ីតាលី ជាប្រទេសអឺរ៉ុបរងការប៉ះពាល់ខ្លាំងជាងគេ ពេលនេះបានឡើងដល់លើសពី១.០០០នាក់ រួចចំនួនអ្នកឆ្លងមានលើស១៥.០០០នាក់។ នេះជាការប្រកាសកាលពិថ្ងៃទី១២មីនា របស់អាជ្ញាធរសុខាភិបាលអ៊ីតាលី។
ផ្នែកការពារស៊ីវិលអ៊ីតាលីនិយាយថាតុល្យការនៃការឆ្លង ដែលកើតមានក្នុងប្រទេសចាប់តាំងពី៣សប្ដាហ៍មកហើយ ពេលនេះបានឡើងដល់១៥.១១៣នាក់ក្នុងនោះ១.០១៦នាក់បានបាត់បង់ជីវិត។ បែបនេះតំណាងឲ្យការកើនឡើង២៣%នៃចំនួនអ្នកបាត់បង់ជីវិតរយៈពេល២៤ម៉ោងចុងក្រោយនេះ។ មកទល់ពេលនេះមនុស្សសរុប១.២៥៨នាក់ទទួលការព្យាបាលបានជាសះស្បើយ។
អ៊ីតាលីបន្តបង្ខាំងខ្លួនខណៈប្រជាជនប្រទេសនោះទាំង៦០លាននាក់ ចាប់តាំងពីថ្ងៃទី១០មីនាមកម្ល៉េះ រងការរិតត្បិតខ្លាំងបំផុតមិនឲ្យចេញទៅណាមកណា នាំឲ្យមានការលំបាកខ្លាំងប៉ះពាល់ដល់ជីវភាពប្រចាំថ្ងៃ។ បណ្ដាទីក្រុងក្លាយជាស្ងាត់ជ្រងំ រួចព្រលានយន្តហោះអន្តរជាតិមួយក្នុងចំណោមព្រលានយន្តអន្តរជាតិ២របស់ប្រទេស គឺព្រលានយន្តហោះROME CIAMPINOនឹងត្រូវបិទទ្វារ ចាប់ពីថ្ងៃទី១៣មីនាទៅដោយសារការឆ្លងរាលដាលនៃវីរុស។ ព្រលានយន្តហោះក្រុងរ៉ូមមួយទៀតគឺព្រលានយន្តហោះFIUMICINOក៏កាត់បន្ថយសកម្មភាពចាប់ពីថ្ងៃទី១៧មីនាទៅដែរ។
ចំណែកបុរីវ៉ាទីកង់បានចេញបញ្ជាកាលពីថ្ងៃទី១២មីនា ឲ្យបិទបណ្ដាព្រះវិហារកាតូលិកក្រុងរ៉ូម ដើម្បីកម្រិតការឆ្លងរាលដាលនៃវីរុស ដែលនោះជាវិធានការ ចាត់ទុកថាពុំធ្លាប់មានពីមុនមកក្នុងប្រវត្តិសាស្ត្រ។
អេស្ប៉ាញតេស្តរកវីរុស សមាជិករដ្ឋាភិបាលទាំងមូលរហូតដល់ព្រះមហាក្សត្រនិងមហាក្សត្រីយានី
ប្រទេសអេស្ប៉ាញដែលពេលនេះជាប្រទេសអឺរ៉ុបមួយ ក្នុងចំណោមប្រទេសអឹរ៉ុបដែលរងការប៉ះពាល់ខ្លាំងដោយវីរុសCOVID-19កាលពីថ្ងៃទី១២មីនា បានធ្វើតេស្តខ្លាចមានការឆ្លង លើសមាជិករដ្ឋាភិបាលទាំងមូល រហូតដល់ព្រះមហាក្សត្រនិងព្រះមហាក្សត្រីយានី បន្ទាប់ពីរដ្ឋមន្ត្រី១រូបឆ្លងវីរុសនេះមក។
យោងតាមសេចក្ដីប្រកាសមួយរបស់រដ្ឋាភិបាលថា លោកស្រីIRENE MOTEROរដ្ឋមន្ត្រីក្រសួងសមភាព បានធ្វើតេស្តឃើញលទ្ធផលវិជ្ជមាននៃការឆ្លងវីរុស ដែលបែបនេះបង្ខំឲ្យសមាជិករដ្ឋាភិបាលទាំងមូលត្រូវធ្វើតេស្តដែរ ដែលលទ្ធផលនឹងដឹងនាពេលក្រោយបន្តិចទៀតនេះ។
ព្រះមហាក្សត្រនិងព្រះមហាក្សត្រីយានីរបស់ប្រទេសក៏នឹងត្រូវឆ្លងកាត់ការធ្វើតេស្តដែរ ព្រះទ្រង់ទាំង២បានយាងចូលរួម កាលពីប៉ុន្មានថ្ងៃមុននេះ ក្នុងព្រឹត្តិការណ៍មួយជាមួយលោកស្រីរដ្ឋមន្ត្រីដែលឆ្លងវីរុស។ លោកស្រីIRENE MOTEROដែលកាលពីថ្ងៃទី៨មីនា បានចូលរួមក្នុងបាតុកម្មមួយមានមនុស្សចូលរួម១២០.០០០នាក់ ក្នុងឱកាសទិវាសិទ្ធិនារី ពុំមែនជាអ្នកនយោបាយតែម្នាក់គត់ដែលឆ្លងវីរុសឡើយ។ សមាជិកច្រើនរូបនៃគណបក្សស្ដាំនិយមជ្រុលVOXក៏ធ្វើតេស្តឃើញលទ្ធផលវិជ្ជមានដែរ។
បែលហ្ស៊ិកបិទសាលាភោជនីយ ដ្ឋានហាងកាហ្វេ
កាលពីយប់ថ្ងៃទ១២មីនានាយករដ្ឋមន្ត្រីបែលហ្សុិកលោកស្រីSOPHIE WILMESប្រកាសពីការបិទសាលារៀនភោជនីយដ្ឋាននិងហាងកាហ្វេក្នុងប្រទេស ដើម្បីតស៊ូប្រឆាំងការឆ្លងរាលដាលនៃវីរុស ហើយរាល់ការប្រមូលផ្ដុំមនុស្សទាំងមូលត្រូវហាមឃាត់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ