រាជធានីភ្នំពេញ ៖ ដើម្បីឱ្យច្បាប់ស្តីពីទេសចរណ៍នៅក្នុងប្រទេសកម្ពុជាកាន់តែមានតម្លាភាព ប្រសិទ្ធភាព ក្រសួងទេសចរណ៍បានដាក់ចេញនូវវិធានការក្នុងការបណ្តុះបណ្តាលដល់អ្នកធ្វើអាជីវកម្ម សេវាកម្ម ក្នុងវិស័យទេសចរណ៍ទាំងអស់ឱ្យបានយល់ដឹងកាន់តែច្បាស់ និងចូលរួមអនុវត្តឱ្យបានគ្រប់គ្នា ជាពិសេសការធ្វើបដិសណ្ឋារកិច្ច ចំពោះភ្ញៀវនៅគ្រប់ទីកន្លែង ដើម្បីធានាបាននូវអាជីវកម្មរីកធំធាត់ និងយូអង្វែង ។
ជាក់ស្តែង កាលពីរសៀលថ្ងៃទី១២ មីនានេះ មន្ទីរទេសចរណ៍រាជធានីភ្នំពេញសហការជាមួយរដ្ឋបាលខណ្ឌដូនពេញបានកោះអញ្ជើញ ម្ចាស់ ឬអ្នកគ្រប់គ្រង អាជីវកម្ម សេវាកម្ម ក្នុងវិស័យទេសចរណ៍ និងអាជ្ញាធរមូលដ្ឋាន ប្រមាណជាង១៥០នាក់ មកទទួលការបណ្តុះបណ្តាល និងផ្សព្វផ្សាយច្បាប់ស្តីពីទេសចរណ៍ និងបដិសណ្ឋារកិច្ចនេះ ។
លោក ចាន់ គន្ថេត អភិបាលរងខណ្ឌដូនពេញ បានលើកឡើងថា មូលដ្ឋានខណ្ឌដូនពេញជាចំណុចកណ្តាល និងជាបេះដូងដ៏សំខាន់របស់រាជធានីភ្នំពេញ ដូច្នេះរាល់ការធ្វើអាជីវកម្ម សេវាកម្ម ក្នុងវិស័យទេសចរណ៍ត្រូវតែយល់ដឹងពីច្បាប់ទម្លាប់ ជាពិសេសត្រូវសុំច្បាប់ធ្វើអាជីវកម្មឱ្យបានគ្រប់គ្រាន់ ដើម្បីធានាដល់ការគ្រប់គ្រងបានល្អ និងងាយស្រួលក្នុងការធ្វើអន្តរាគមន៍ ពេលមានឧបទ្ទវហេតុណាមួយកើតឡើង ។
មួយវិញទៀតក៏ត្រូវតែគោរពតាមការណែនាំរបស់មន្ត្រីជំនាញ ផ្នែកទេសចរណ៍ និងបដិសណ្ឋារកិច្ច ដើម្បីឱ្យអាជីវកម្ម សេវាកម្មទាំងអស់ក្នុងខណ្ឌអនុវត្តនូវស្តង់ដាជាតិ និងអន្តរជាតិព្រោះថា វិស័យទេសចរណ៍ ជាវិស័យសេដ្ឋកិច្ចមួយដែលមានកំណើនរីកលូតលាស់ខ្លាំងទាមទារឱ្យមានកិច្ចសហការជាប្រព័ន្ធគ្រប់ផ្នែកទាំងរដ្ឋ ឯកជន និងដៃគូរអភិវឌ្ឍន៍នានា ។
លោកអភិបាលរងសុំឱ្យប្រជាពលរដ្ឋក្នុងខណ្ឌដូនពេញក៏ដូចជា អ្នកធ្វើអាជីវកម្ម សេវាកម្មគ្រប់ផ្នែកបន្តចូលរួមសកម្មភាពប្រលងប្រណាំងទីក្រុងស្អាត រមណីយដ្ឋានស្អាត សេវាកម្ម និងបដិសណ្ឋារកិច្ចល្អផ្តល់ភាពកក់ក្តៅ និងទទួលខុសត្រូវ រួមគ្នារក្សាពានជ័យលាភី ទីក្រុងស្អាតថ្នាក់ជាតិ ផ្ការំដួល៣ទង ដែលទទួលបានជាប់ៗគ្នា២អាណត្តិមកនេះ និងពានជ័យលាភីទីក្រុងទេសចរណ៍ស្អាតអាស៊ាន លើកទី២ សម្រាប់ឆ្នាំ២០២០-២០២២ ដែលជាមុខមាត់និងកិត្តិយសរបស់យើងទាំងអស់គ្នា ។
ចំណែកលោក ម៉ម វាសនា ប្រធានមន្ទីរទេសចរណ៍រាជធានីភ្នំពេញ ក៏បានទទួចឱ្យម្ចាស់អាជីវកម្ម សេវាកម្មក្នុងវិស័យទេសចរណ៍ទាំងអស់ ដែលមិនទាន់សុំច្បាប់អនុញ្ញាតិ ត្រូវរូតរះទៅដាក់ពាក្យសុំឱ្យបានគ្រប់ៗគ្នា បើមិនដូច្នេះទេ នៅពេលខាងមុខនេះនឹងទទួលរងការផាកពិន័យជាមិនខាន ។ លោកថា ច្បាប់សុំធ្វើអាជីវកម្មនេះមានតម្លៃតិចតួចប៉ុណ្ណោះ ហើយងាយៗមិនស្មុគស្មាញនោះទេ មានមន្ត្រីជំនាញរង់ចាំបំរើគ្រប់ពេលម៉ោងធ្វើការ នៅតាមច្រកចេញចូលតែ១ ទាំងនៅរដ្ឋបាលខណ្ឌក៏ដូចជា នៅរដ្ឋបាលរាជធានីភ្នំពេញ ។
ជាមួយគ្នានោះលោក ម៉ម វាសនា ក៏បានអំពាវនាវឱ្យម្ចាស់អាជីវកម្ម សេវាកម្ម អប់រំបុគ្គលិក និងអ្នកដឹកនាំទាំងអស់ ឱ្យមានការប្រុងប្រយ័ត្ន គិតគូរពីសុខភាពផ្ទាល់ខ្លួន ក៏ដូចជាសុខភាពភ្ញៀវ ត្រូវគោរពតាមការគោលការណែនាំរបស់ក្រសួង ស្ថាប័នជំនាញ ជាពិសេសពាក់ព័ន្ធនឹងជំងឺផ្លូវដង្ហើមថ្មី កូវីដ ១៩ ស្របពេលដែលជំងឺនេះបាន និងកំពុងរាតត្បាតទៅលើប្រទេសជាច្រើន ក្នុងតំបន់និងពិភពលោក ហើយកម្ពុជាក៏ទទួលរងគ្រោះផងដែរ ។ សុំរួមគ្នាការពារ ទប់ស្កាត់មេរោគកូវីដ១៩ និងរួមគ្នាទប់ស្កាត់ ជំងឺភ័យខ្លាចហួសហេតុ ដែលកើតចេញពីក្រុមបំពុលសង្គម តាមរយៈប្រព័ន្ធព័ត៌មានសង្គម ឬ ហ្វេសបុក ដែលផ្សាយព័ត៌មានមិនពិត បង្ករចលាចលដល់សង្គមជាតិរបស់យើង ៕
ចែករំលែកព័តមាននេះ