រាជធានីភ្នំពេញ៖ ចូលមកដល់ដើមសប្តាហ៍ទីពីរនៃខែមីនានេះតម្លៃស្រូវប្រាំង ឬស្រូវអ៊ីអ៊ែរ បស់ប្រជាកសិករស្ថិតនៅក្នុងឃុំសំបួរស្រុកទ្រាំង ខេត្តតាកែវបានធ្លាក់ថ្លៃពី ៧៨០រៀលមក នៅត្រឹម ៧៥០រៀលក្នុងមួយគីឡូក្រាមនឹងមិនមានភាពប្រាកដប្រជាថាឈ្មួញវៀតណាម ទិញ ឬកក់ប្រាក់មុននោះទេ…
រាជធានីភ្នំពេញ៖ ចូលមកដល់ដើមសប្តាហ៍ទីពីរនៃខែមីនានេះតម្លៃស្រូវប្រាំង ឬស្រូវអ៊ីអ៊ែរ បស់ប្រជាកសិករស្ថិតនៅក្នុងឃុំសំបួរស្រុកទ្រាំង ខេត្តតាកែវបានធ្លាក់ថ្លៃពី ៧៨០រៀលមក នៅត្រឹម ៧៥០រៀលក្នុងមួយគីឡូក្រាមនឹងមិនមានភាពប្រាកដប្រជាថាឈ្មួញវៀតណាម ទិញ ឬកក់ប្រាក់មុននោះទេ ដោយសារមានការរឹតបណ្តឹងការដឹកជញ្ជូនឆ្លងកាត់ព្រំដែន តាមទូកដោយខ្លាចវីរុស កូវីដ-១៩ ។
លោក ឈឿន អ្នកប្រមូលទិញស្រូវឱ្យឈ្មួញវៀតណាម និងឈ្មួញកម្ពុជាបានឱ្យដឹងនៅ ថ្ងៃទី ១២មីនាថា « កាលពីម្សិលមិញវៀតណាម (ឈ្មួញ) ប្រាប់ស្រូវប្រាំង ឬអ៊ីអ៊ែហ៊ានទិញ ៧៥០រៀលក្នុងមួយគីឡូក្រាម តែសម្រាប់អ្នកប្រមូលទិញស្រូវដឹកតាមរថយន្តទិញក្នុងតម្លៃ ៧៨០រៀលដោយសារគេដឹងហាងឆេងយឺតជាងវៀតណាមហើយនៅពេលវៀតណាមទម្លាក់ថ្លៃតែពីរ ឬបីថ្ងៃជាប់គ្នា នោះនឹងធ្វើឱ្យអ្នកទិញស្រូវដឹកតាមរថយន្តនឹងទម្លាក់ថ្លៃស្រូវដូច គ្នា» ។
លោកបន្តថា មកដល់ថ្ងៃនេះឈ្មួញវៀតណាមហ៊ានទិញស្រូវតាមវាលស្រែប្រាំងក្នុងតម្លៃតែ ៧៥០រៀលក្នុងមួយគីឡូក្រាម ហើយមិនទាន់ហ៊ានថាយក ឬកក់ប្រាក់មុនទេ ព្រោះគេមាន ការរឹតបណ្តឹងការដឹកស្រូវតាមទូកឆ្លងកាត់ព្រំដែនក្រែងមានអ្នកផ្ទុកវីរុស កូវីដ-១៩។
បើតាមអ្នកប្រមូលទិញស្រូវឱ្យឈ្មួញខាងលើឱ្យដឹងថា មកដល់ថ្ងៃនេះឈ្មួញវៀតណាមមិន បានចេញទូកមកដឹកស្រូវដែលខ្លួនបានកត់ ឬទិញពីប្រជាកសិករខ្មែរនាំទៅវៀតណាម នោះទេ ។
ពាក់ព័ន្ធតម្លៃស្រូវប្រាំង ឬស្រូវអ៊ីអ៊ែនេះបើតាមអនុប្រធានសហព័ន្ធស្រូវអង្ករកម្ពុជា មើល ឃើញថា តម្លៃស្រូវប្រាំងឆ្នាំនេះវាមានតម្លៃប្រហាក់ប្រហែលឆ្នាំមុន គឺតម្លៃត្រដំត្រសងគ្នា ហើយវាប្រែប្រួលតម្លៃក្នុងរង្វង់ពី ៥ ទៅ ១០% ។
លោកឧកញ៉ា ចាន់ សុខឃាំង អនុប្រធានសហព័ន្ធស្រូវអង្ករកម្ពុជាមានប្រសាសន៍ថា «ស្រូវ ប្រាំងឆ្នាំនេះយើងប្រមូលទិញបានច្រើនគួរសមបើប្រៀបធៀបនិងឆ្នាំមុន ។ តម្លៃស្រូវប្រាំង នៅតាមតំបន់ខ្លះគេហ៊ានទិញមួយគីឡូក្រាមថ្លៃ ៨៥០ ឬ ៨៧០រៀល ។ សហព័ន្ធស្រូវអង្ករ កម្ពុជា យើងមានទុនបង្វិលប្រហែល ១៥០លានដុល្លារអាមេរិក បើគិតជាបរិមាណនៃការ ទិញស្រូវបានពី ៨០ ទៅ ១លានតោនស្រូវ» ។
យោងតាមសហព័ន្ធស្រូវអង្ករកម្ពុជា ឬហៅថា CRF ការនាំចេញអង្កររបស់កម្ពុជាមាន កំណើនគួរឱ្យកត់សំគាល់ គឺបាននាំចេញជាង ៨៦.០០០តោននៅក្នុងខែកុម្ភៈ ២០២០ ដែល កើនជាង ៣៥.០០០តោន ធៀបទៅខែមករាឆ្នាំ ២០២០ ។ សរុបក្នុងរយៈពេល ២ខែ ឆ្នាំ ២០២០ កម្ពុជាបាននាំចេញអង្ករចំនួន ១៣៦.៤៩៩តោន កើនជាង ២២% បើធៀបទៅ ២ខែដើមឆ្នាំ ២០១៩ ។ បើតាម CRF ការនាំចេញអង្ករនៅ ២ខែដំបូងឆ្នាំ ២០២០ ទៅចិន បាន ៣៧% ខណៈការនាំចេញទៅទីផ្សារដទៃទៀតនាខែកុម្ភៈបង្ហាញកំណើនវិជ្ជមាន ។
CRF គូសបញ្ជាក់ថា «ក្នុងរយៈពេល ២ខែដើមឆ្នាំនេះគឺ ប្រទេសចិនបានស្រូបយក ៣៧% , សហគមន៍អឺរ៉ុបរួមទាំងអង់គ្លេស ៣០%, ប្រទេសនៅក្នុងបណ្តារសហគមន៍អាស៊ាន ១៨% និងបណ្តាគោលដៅផ្សេងមានជាង ១៤% ។ បើយើងក្រឡេកមើលកំណើនក្នុងខែកុម្ភៈដូច គ្នានេះឆ្នាំ ២០២០ និងឆ្នាំ ២០១៩ យើងឃើញថា កំណើនទៅអ៊ឺរ៉ុប កើន ១២៦% កើនពី ១០.០៨០តោន ទៅ ២២.៧៥៣តោន ។ ទីផ្សារប្រទេសចិន កើន ៣៣% ពី ២៧.១៨៦តោន ទៅ ៣៦.០៨៥តោន ទីផ្សារក្នុងប្រទេសអាស៊ាន ១១៩% កើនពី ៨.៨២៥តោន ទៅ ១៩.៣៤៧តោន និងទីផ្សារផ្សេងកើនពី ៦.៧៧០តោន ទៅ ៧.៨៦៤តោន ។ ជារួមសម្រាប់ ខែកុម្ភៈ ២០២០កើន ៦៣% ធៀបទៅខែកុម្ភៈ ឆ្នាំ ២០១៩» ៕ កែសម្រួលដោយ ៖ សុឃាក់
ចែករំលែកព័តមាននេះ