រាជធានីភ្នំពេញ៖ ជំងឺ កូវីដ-១៩ នៅតែបន្តសាយភាយនៅប្រទេសជាច្រើនលើពិភពលោក ដែលធ្វើឱ្យផលប៉ះពាល់ដល់សេដ្ឋកិច្ចប្រទេសទាំងនោះកាន់តែធំ ។ ហើយកម្ពុជា ក៏រងនូវ ផលប៉ះពាល់នេះដែរ ពិសេសក្នុងវិស័យសំខាន់ពីរដែលជួយទ្រទ្រង់សេដ្ឋកិច្ច…
រាជធានីភ្នំពេញ៖ ជំងឺ កូវីដ-១៩ នៅតែបន្តសាយភាយនៅប្រទេសជាច្រើនលើពិភពលោក ដែលធ្វើឱ្យផលប៉ះពាល់ដល់សេដ្ឋកិច្ចប្រទេសទាំងនោះកាន់តែធំ ។ ហើយកម្ពុជា ក៏រងនូវ ផលប៉ះពាល់នេះដែរ ពិសេសក្នុងវិស័យសំខាន់ពីរដែលជួយទ្រទ្រង់សេដ្ឋកិច្ច និងផ្ដល់ការ ងារដល់ពលរដ្ឋច្រើនជាងគេ ។
យោងតាមលោក អូន ព័ន្ធមុន្នីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួង សេដ្ឋកិច្ច និង ហិរញ្ញវត្ថុ បានមានប្រសាសន៍ថា ក្នុងពេលនេះវិស័យពីរដែលសំខាន់ៗ ក្នុងការទ្រទ្រង់ កំណើនសេដ្ឋកិច្ចជាតិនោះបានរងផលប៉ះពាល់ជាខ្លាំង រហូតដល់រដ្ឋាភិបាលទំលាក់ការ ព្យាករណ៍កំណើនសេដ្ឋកិច្ចជាតិក្នុងឆ្នាំ ២០២០នេះផងដែរ ។ វិស័យដែលប៉ះពាល់ជាងគេ នោះរួមមាន៖ វិស័យទេសចរណ៍ និងកាត់ដេរ ដោយក្នុងនោះខេត្តសៀមរាប ជាខេត្តមាន ឧស្សាហកម្មទេសចរណ៍ច្រើនជាងគេ និងត្រូវបានរងផលប៉ះពាល់ធ្ងន់ជាងគេផងដែរ ។ លោកបន្តថា សម្រាប់វិស័យកាត់ដេរ ដោយសារតែពឹងលើវត្ថុធាតុដើមនាំចូលពីប្រទេស ចិន ហើយនៅពេលដែលចិនជាទីផ្ទុះជំងឺ កូវីដ-១៩ បណ្ដាលឱ្យរោងចក្រផលិតវត្ថុធាតុមួយ ចំនួនត្រូវបានបិទ និងមិនមានវត្ថុធាតុដើមគ្រប់គ្រាន់ សម្រាប់បម្រើឱ្យខ្សែចង្វាក់ផលិតកម្ម កាត់ដេរកម្ពុជា ។
លោកបន្តទៀតថា ក្នុងបរិការណ៍នេះ ក្នុងស្មារតីបុរេសកម្ម និងការយក ចិត្តទុកដាក់ខ្ពស់ ដល់ការធានាលំនឹងសេដ្ឋកិច្ច និងសង្គម ពិសេសលំនឹងជីវភាពរស់នៅរបស់កម្មករ និយោជិ ត រាជរដ្ឋាភិបាលបានសម្រេចចិត្តដាក់ចេញនូវវិធានការអន្តរាគមន៍បន្ទាន់មួយចំនួន ដោយ គិតគូរលើគ្រប់ទិដ្ឋភាព សំដៅជួយដល់គ្រប់តួអង្គពាក់ព័ន្ធផង និងជំរុញលើកស្ទួយកំណើន នៅតាមវិស័យដែលមានសល់សក្តានុពលផងរួមមាន៖ ទី ១-ជួយដល់ក្រុមហ៊ុនដែលទទួល រងផលប៉ះពាល់ខ្លាំង ដើម្បីឲ្យក្រុមហ៊ុនទាំងនោះអាចបន្ត អាជីវកម្មបាននៅក្នុងពេលដ៏លំ បាកនេះ, ទី ២-ជួយដល់កម្មករ និយោជិត ក្នុងករណីត្រូវបាត់បង់ ឬត្រូវព្យួរការងារឱ្យមាន លំនឹងជីវភាព និងអាចលើកកម្ពស់ជំនាញ ព្រមទាំងផលិតភាពការងាររបស់ខ្លួនសម្រាប់ អនាគត និងទី ៣-ជួយទ្រទ្រង់លើកស្ទួយកំណើន ជាពិសេសជួយដល់សហគ្រាសធុនតូច និងមធ្យម ដែលជាឆ្អឹងខ្នងនៃសេដ្ឋកិច្ចជាតិ ។
លោកថា ៖ «រាជរដ្ឋាភិបាលមានជំនឿថា វិធានការដែលត្រូវបានដាក់ចេញមកនេះមិនត្រឹម តែជួយកាត់បន្ថយផលប៉ះពាល់ចំពោះមុខប៉ុណ្ណោះទេ តែក៏នឹងជួយលើកស្ទួយភាពប្រកួត ប្រជែងដល់វិស័យទាំងនោះ និងសេដ្ឋកិច្ចជាតិទាំងមូល នៅពេល ជំងឺ ខូវិដ-១៩ បានឆ្លង ផុតទៅផងដែរ» ។ យោងតាមការផ្សព្វផ្សាយរបស់បណ្ដាញផ្សព្វផ្សាយក្នុងស្រុកបានបង្ហាញផងដែរថា សណ្ឋា គារលំដាប់ផ្កាយមួយចំនួនបានផ្អាក និងបិទទ្វារមួយរយៈ ព្រោះតែមិនមានភ្ញៀវចូលស្នាក់ នៅដូចកាលពីមុន ដែលធ្វើឱ្យចំនូលមិនគ្រប់គ្រាន់សម្រាប់តែបើកប្រាក់ខែបុគ្គលិក និងថ្លៃ ទឹក ថ្លៃភ្លើងផង បើទោះបីជាកន្លងទៅនេះ រដ្ឋាភិបាលបានប្រកាសពីការលើកលែងពន្ធដល់ អាជីវកម្មសណ្ឋាគារ និងផ្ទះសំណាក់ក្នុងខេត្តសៀមរាបក្ដី ។
បើតាមលោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹង ថា បើស្ថានភាពបែបនេះ វិស័យទេសចរណ៍កម្ពុជាកាន់តែពិបាក ហើយអាចនឹងប៉ះពាល់ កាន់តែធ្ងន់ និងធ្វើឱ្យក្រុមហ៊ុនទេសចរណ៍នានាក្នុងប្រទេសអាចនឹងបិទទ្វារផងដែរ ។
លោក ស៊ីន ចាន់សេរីវុត្ថា អ្នកនាំពាក្យរដ្ឋលេខាធិការអាកាសចរណ៍ស៊ីវិល ក៏បានអឱ្យដឹង ផងដែរថា ក្នុងខែកុម្ភៈ ឆ្នាំ ២០២០នេះ ចំនួនភ្ញៀវឆ្លងកាត់អាកាសយានដ្ឋានអន្តរជាតិទាំងបី បានធ្លាក់ចុះគួរឱ្យកត់សម្គាល់ ដោយសារតែបញ្ហាវីរុស កូរ៉ូណា ហើយយើងរំពឹងថាស្ថាន ភាពនេះនឹងល្អប្រសើរឡើងវិញ ក្រោយពេលពិភពលោករកដំណោះស្រាយឃើញនូវវីរុស កូរ៉ូណា ឬ កូវីដ-១៩នេះ ។
គួរបញ្ជាក់ថា ជំងឺ កូវីដ-១៩ ត្រូវបានផ្ទុះឡើងកាលពីអំឡុងបុណ្យចូលឆ្នាំចិនកាលពីចុងខែ មករា ឆ្នាំ ២០២០កន្លងទៅនេះ ដោយចាប់ផ្ដើមដំបូងនៅទីក្រុងវូហាន ខេត្ត Hubei ប្រទេស ចិន និងបានរាលដាលទៅកាន់តំបន់ផ្សេងនៃប្រទេសចិន ព្រមទាំងបន្តរាលដាលទៅកាន់ ប្រទេសជាច្រើននៅលើពិភពលោក ៕ កែសម្រួលដោយ ៖ សុឃាក់
ចែករំលែកព័តមាននេះ