ពេលដែលខ្លួនមានភ្ជាប់នូវកំហឹងពេញខ្លួនទៅកាន់ស្ថាប័នការងារ មិត្តរួមការងារ ឬប្រធានក្រុមរបស់ខ្លួន អ្នកប្រហែលជាធ្លាប់គិតហើយពីថ្ងៃដែលអ្នកហុចសំបុត្រលាឈប់ និងដើរចេញពីកន្លែងការងារភ្លាមៗដោយមិនងាយក្រោយសូម្បីតែ ១វិនាទី ។ ប៉ុន្តែវាប្រៀបបានជាស្ថានការមួយដែលមានតែក្នុងរឿងប៉ុននោះ ព្រោះអ្នកប្រៀបដូចជាកាត់ខ្សែចំណងដែលអ្នកមានទាំងស្រុងជាមួយនឹងកន្លែងការងារចាស់ និងមនុស្សដែលអ្នកបានកសាងទំនាក់ទំនងជាមួយមកដល់បច្ចុប្បន្ននេះ ។
ដូច្នេះប្រសិនបើអ្នកចង់លាឈប់ពីការងារ តើអ្នកមានវិធីអ្វីដែលអ្នកអាចធ្វើបានដោយមិនបិទផ្លូវសម្រាប់ខ្លួននៅថ្ងៃមុខ? យោងទៅតាមលោក ដេវ អ៊ីវេន (Dave Evans) និង ប៊ីល បឺណេត (Bill Burnett) ដែលជាសាស្ត្រាចារ្យនៅសាកលវិទ្យាល័យ Standford និងអ្នកជំនាញផ្នែកការងារបានឲ្យដឹងថា អ្នកអាចធ្វើតាមជំហានទាំងបូនខាងក្រោមនេះ៖
១. ដើរចេញពីកន្លែងបោះជំរុំក្នុងសភាពល្អជាងពេលដែលអ្នករកឃើញវា
បន្ទាប់ពីអ្នកហុចសំបុត្រលាឈប់ទៅឲ្យស្ថាប័នការងាររបស់អ្នកហើយ អ្នកគួរតែធ្វើឲ្យកន្លែងការងាររបស់អ្នកកាន់តែប្រសើរជាងមុនក្នុងកំឡុងពេលដែលអ្នកនៅធ្វើការ ។ ការធ្វើដូច្នេះមិនត្រឹមតែជួយដល់មិត្តរួមការងារដទៃទេ តែវាក៏ជួយបង្កើនជំនឿចិត្តរបស់អ្នក និងអនុញ្ញាតឲ្យអ្នករកបានមនុស្សដែលនិយាយល្អពីអ្នកសម្រាប់ឱកាសការងារនៅថ្ងៃក្រោយដែរ ។
២. ពង្រឹងទំនាក់ទំនងជាមួយមនុស្ស
បណ្តាញមនុស្សដែលអ្នកស្គាក់ក្នុងការងារ ឬអាជីវកម្ម គឺជាទ្រព្យសម្បត្តិដែលមានតម្លៃជាងគេមួយរបស់អ្នកសម្រាប់ឱកាសនៅថ្ងៃមុខ ។ ដោយហេតុដូចនេះ អ្នកត្រូវតែចេះរក្សា និងពង្រឹងទំនាក់ទំនងដែលអ្នកមានមុនពេលចាកចេញដោយចំណាយពេលវេលាមួយចំនួនក្នុងការពង្រឹងចំណងទំនាក់ទំនងជាមួយមិត្តរួមក្រុម និងស្គាល់មនុស្សដែលអ្នកមិនមានឱកាសធ្វើការជាមួយឲ្យបានកាន់តែច្រើន ។
៣. ជួយដល់អ្នកមកជំនួសអ្នក
មនុស្សម្នាក់ទៀតដែលមកបន្តតំណែង ឬការងាររបស់អ្នកអាចនឹងត្រូវការការណែនាំនិងពេលវេលាដើម្បីទម្លាប់នឹងការងារថ្មីៗ ។ ជាលទ្ធផល អ្នកគួរតែសរសេរសេចក្តីណែនាំខ្លីៗដែលអាចជួយដល់ការងាររបស់ពួកគេបាន ជាពិសេសគឺលេខទំនាក់ទំនងផ្សេងៗ ។
៤. ចាកចេញដោយសុទិដ្ឋិនិយម
អ្នកត្រូវធ្វើឲ្យមនុស្សដែលអ្នកធ្លាប់ធ្វើការជាមួយមើលមកអ្នកក្នុងផ្លូវវិជ្ជមានពេលដែលអ្នកចាកចេញពីកន្លែងការងារ ។ អ្នកអាចធ្វើដូច្នេះបានដោយផ្តល់ជាមតិយោបល់ល្អៗដែលអាចជួយដល់អ្នកដទៃបាន និងចង្អុលបង្ហាញនូវចំណុចល្អៗដែលអ្នកនិងកន្លែងការងាររបស់អ្នកបានផ្តល់ឲ្យគ្នាទៅវិញទៅមក ៕ កែសម្រួលដោយ ៖ សុឃាក់
ចែករំលែកព័តមាននេះ