រាជធានីភ្នំពេញ៖ ក្នុងរយៈពេលពីរ ឬបីខែចុងក្រោយនេះវិស័យឯកជនដែលប្រកបមុខរបរ ផ្គត់ផ្គង់សាច់ជ្រូកនៅលើទីផ្សារមើលឃើញថាការថមថយនៃចំនួនភ្ញៀវទេចរបានជះឥទ្ធិពល ឬធ្វើឱ្យប៉ះពាល់ទៅដល់តម្រូវការនៃការបរិភោគសាច់ជ្រូកនៅលើទីផ្សារប្រចាំថ្ងៃបន្ទាប់ វីរុស កូវីដ-១៩ មាននៅកម្ពុជា ។
លោក ស្រ៊ុន ពៅ ប្រធានសមាគមអ្នកចិញ្ចឹមជ្រូកកម្ពុជា បានឱ្យដឹងថា តម្រូវការនៃការ បរិភោគសាច់ជ្រូកប្រចាំថ្ងៃមានការថយចុះដោយសារចំនួនភ្ញៀវទេសចរថយចុះ ហើយ សាច់ជ្រូកដែលផ្គត់ផ្គង់នៅលើទីផ្សារបច្ចុប្បន្នភាគច្រើននាំចូលមកពីប្រទេសថៃ ។ លោកបន្តថា «សព្វថ្ងៃនេះសាច់ជ្រូកដែលប្រជាពលរដ្ឋទទួលទានភាគច្រើនសាច់ជ្រូកនាំ មកពីប្រទេសថៃ ។ នៅក្នុងមួយថ្ងៃតម្រូវការសាច់ជ្រូកនៅទូទាំងប្រទេសមានប្រមាណ ៧ពាន់ក្បាល តែឥឡូវវាថយមកនៅត្រឹម ៦ពាន់ ឬជាង៥ពាន់ក្បាលប៉ុណ្ណោះ ដូចនេះការ ទទួលទានសាច់ជ្រូកក្នុងមួយថ្ងៃៗ គឺមានការថយចុះ» ។
បើតាមប្រធានសមាគមបានឱ្យដឹងទៀត ការធ្លាក់ចុះនៃតម្រូវការសាច់ជ្រូកមកពីមូលហេតុ ការថមថយនៃចំនួនភ្ញៀវទេសចរ ប៉ុន្តែតម្លៃសាច់ជ្រូកមិនបានធ្លាក់ថ្លៃនោះទេ គឺនៅរក្សា បានតម្លៃសមរម្យក្នុងពេលបច្ចុប្បន្ន ។ លោក ស្រ៊ុន ពៅ បន្តថា «តម្លៃសាច់ជ្រូកមិនមានធ្លាក់ថ្លៃនោះទេ មានតែឡើងថ្លៃ ។ តម្លៃ ជ្រូករស់នៅតាមកសិដ្ឋានក៏ដូចជានាំមកពីប្រទេសថៃ ដែលយកមកនេះលក់នៅក្នុងស្រុក នេះថ្លៃ ១២.០០០រៀលក្នុងមួយគីឡូក្រាម ហើយតម្លៃសាច់ជ្រូកនៅលើទីផ្សារជាង ២០.០០០រៀល» ។
អ្នកស្រី ភា ដែលជាអាជីវករលក់សាច់ជ្រូកបានឱ្យដឹងថា នៅក្នុងរយៈពេល ១ខែចុងក្រោយ នេះការលក់សាច់ជ្រូកមានការថយចុះហើយពិបាកនឹងលក់ បើប្រៀបធៀបនឹងពេលមុនៗ ដែលក្នុងមួយថ្ងៃអាចលក់សាច់ជ្រូកអស់ពីរក្បាល តែសព្វថ្ងៃនេះលក់សាច់ជ្រូកមួយក្បាល មិនចង់អស់ ហើយតម្លៃសាច់ជ្រូកឡើងថ្លៃទៀត ។ អ្នកស្រីបន្តថា « តម្លៃជ្រូករស់ទិញចូលថ្លៃ ១៣.០០០រៀលក្នុងមួយគីឡូក្រាម ហើយចេញ ទៅវិញថ្លៃ ២០.០០០រៀលតែបើហ៊ានលក់ថ្លៃជាងនេះ គឺអត់មានអ្នកទិញយកទៅបរិភោគ នោះទេ» ។
ទន្ទឹមនឹងការធ្លាក់ចុះនៃចំនួនភ្ញៀវទេសចរបានជះឥទ្ធិពលដល់ការផ្គត់ផ្គង់សាច់ជ្រូកទីផ្សារក្នុងស្រុកនេះ គេក៏បានដឹងថាការថមថយនៃចំនួនភ្ញៀវទេសចរមកកាន់កម្ពុជា នេះក៏ធ្វើឱ្យ អាជីវកម្មពាក់ព័ន្ធ និងវិស័យទេសចរណ៍មួយចំនួនបានផ្អាកអាជីវកម្ម និងមួយចំនួនផ្សេង ទៀតកំពុងប្រឈមមុខការបិទទ្វាលើសពីនេះធ្វើឱ្យកម្ពុជាអាចនឹងបាត់ចំណូលដែលធ្លាប់ទទួលបានពីវិស័យនេះ អស់មួយចំណែកដោយសារវីរុស កូវីដ-១៩ ។
បើតាមលោក ទិត ចន្ថា មន្ត្រីជាន់ខ្ពស់នៃក្រសួងទេសរណ៍ បានបង្ហាញការព្យាការណ៍កាល ថ្មីៗនេះថា ក្នុងឆ្នាំ ២០២០នេះកម្ពុជា អាចនឹងបាត់បង់ប្រាក់ចំណូលជិត ១លានដុល្លារអា មេរិក ហើយអាជីវកម្មដែលរងផលប៉ះពាល់ច្រើនជាងគេភាគច្រើនមានទីតាំងស្ថិតនៅក្នុង ខេត្តសៀមរាប ៕ កែសម្រួលដោយ ៖ សុឃាក់
ចែករំលែកព័តមាននេះ