ខេត្តកំពង់ឆ្នាំង ៖ សិស្សថ្នាក់ទី១១«G» នៃវិទ្យាល័យប៊ុនរ៉ានីហ៊ុនសែន រលាប្អៀរ បានដួលសន្លប់ជាបន្តបន្ទាប់ចំនួន៩នាក់ក្នុងរយៈពេល២ថ្ងៃកន្លងទៅនេះ គឺកាលពីថ្ងៃទី៩ និងថ្ងៃទី១០ ខែមីនា ឆ្នាំ២០២០ ។
តាមប្រភពពីលោកគ្រូអ្នកគ្រូនៅវិទ្យាល័យបុនរ៉ានីហ៊ុនសែនរលាប្អៀរ ដែលស្ថិតក្នុងភូមិស្ពករាជ ឃុំអណ្ដូងស្នាយ ស្រុករលារប្អៀរ បានអោយដឹងថា កាលពីថ្ងៃទី៩ ខែមីនា មាន សិស្សថ្នាក់ទី១១«G» ដែលរៀននៅអគារ២ជាន់ បានដួលសន្លប់ចំនួន៥នាក់ ដោយឡែកនៅវេលាម៉ោងប្រមាណជាង១០ព្រឹកថ្ងៃទី១០ ខែមីនានេះដែរ ក៏មានសិស្សដួលសន្លប់ចំនួន៤នាក់ទៀតផងដែរ ដែលតាមការបញ្ជាក់ជាជំហានដំបូងសង្ស័យដោយសារអាកាសធាតុក្តៅខ្លាំង ។ ទោះបីជាយ៉ាងនេះក្តី ក្រោយពេលកើតហេតុសិស្សរងគ្រោះទាំងអស់ត្រូវបានបញ្ជូនទៅសង្គ្រោះនៅឯមន្ទីរពេទ្យបង្អែកខេត្តកំពង់ឆ្នាំង ។
នៅព្រឹកថ្ងៃទី១០ មីនា នេះផងដែរ គេសង្កេតឃើញអភិបាលស្រុក រួមទាំងមន្ត្រីរាជការ របស់សាលាស្រុក និងលោកគ្រូអ្នកគ្រូក៏បានទៅសាកសួរសុខទុក្ខសិស្សរងគ្រោះនៅមន្ទីរពេទ្យបង្អែកខេត្តផងដែរ ។
ជុំវិញបញ្ហាខាងលើនេះ លោក សឹម ប្រឹម ប្រធានមន្ទីរអប់រំយុវជននិងកីឡាខេត្តកំពង់ឆ្នាំង បានឲ្យដឹង តាមទូរស័ព្ទនៅរសៀលថ្ងៃទី១០ ខែមីនានេះ ថា ពិតជាមានសិស្សដួលសន្លប់២ថ្ងៃនេះមែន គឺកាលពីថ្ងៃទី៩ និងថ្ងៃទី១០ ដោយសរុបទាំង២ថ្ងៃមានសិស្សចំនួន៩នាក់ដែលបានសន្លប់ គឺដោយសារអាកាសធាតុក្តៅខ្លាំង និងខ្លះទៀតមានការខ្វះនូវជាតិស្ករក្នុងខ្លួនន។
លោកប្រធានមន្ទីរអប់រំយុវជននិងកីឡាខេត្តក៏បានដាក់ការសង្ស័យថា សិស្សខ្លះអាចប្រឹងរៀនខ្លាំងពេក គួបផ្សំនឹងអាកាសធាតុក្តៅខ្លាំងទៀតនោះ ទើបបណ្ដាលឲ្យដួលសន្លប់បែបនេះ ។ សិស្សដែលដួលសន្លប់គឺសិស្សរៀននៅថ្នាក់ទី១១«G» នៃអគារបណ្ដោយថ្ងៃ ដែលមានកម្ពស់២ជាន់។
ទោះបីជាយ៉ាងនេះក្តី សិស្សដែលរៀននៅថ្នាក់មានបញ្ហាខាងលើនោះ គឺត្រូវបានបញ្ជូនឲ្យទៅរៀននៅថ្នាក់ផ្សេងដែលមានខ្យល់អាកាសល្អជាងនេះ ចំណែកថ្នាក់រៀនដែលមានបញ្ហានឹងរៀបចំដាក់កង្ហារ និងរៀបចំប្រព័ន្ធភ្លើងបន្ថែមទៀតមុននឹងដាក់សិស្សឲ្យមកចូលរៀន វិញ ៕ (កែសម្រួលដោយ ៖ ធីតា)
ចែករំលែកព័តមាននេះ