ប្រទេសអ៊ីតាលី ៖ ទីភ្នាក់ងារការពារស៊ីវិលអ៊ីតាលីថ្លែងកាលពីថ្ងៃទី១០មីនាថា ប្រទេសអ៊ីតាលីពេលនេះ អ្នកឆ្លងវីរុស COVID-19 កើនដល់លើសពី១០.០០០នាក់ហើយ ជាមួយអ្នកបាត់បង់ជីវិត ៦៣១នាក់ទល់នឹង៤៦៣នាក់កាលពីថ្ងៃទី៩មីនា។
ជាមួយអ្នកបាត់បង់ជីវិត១៦៨នាក់ថែមទៀត រយៈពេល២៤ម៉ោងចុងក្រោយនេះ បង្ហាញពីតួលេខខ្ពស់ប្រចាំថ្ងៃនៃចំនួនអ្នកបាត់បង់ជីវិត ក្នុងប្រទេសនោះមកពីការឆ្លងវីរុស។ អ៊ីតាលីមកទល់ពេលនេះ មានអ្នកឆ្លងវីរុស COVID-19 ឡើងដល់១០.១៤៩នាក់ ទល់នឹង៩.១៧២នាក់នាថ្ងៃទី៩ មីនា ដែលមានការកើនឡើងជាង១០%។ ក្នុងចំណោមអ្នកឆ្លងទាំងនោះមនុស្ស១.០០៤នាក់បានជាសះស្បើយទាំងស្រុង ទល់នឹង៧២៤នាក់នាពេលមុននេះ រួចមនុស្ស៨៧៧នាក់កំពុងទទួលការសង្គ្រោះបន្ទាន់។
ដើម្បីទប់ការឆ្លងរាលដាលនៃវីរុសនេះ ប្រទេសអ៊ីតាលី កាលពីថ្ងៃទី១០មីនាបានចាត់វិធានការរិតត្បិតខ្លាំងដោយអំពាវនាវដល់ប្រជាជនទាំងមូលឲ្យស្ថិតនៅក្នុងផ្ទះ។
ផ្អែកលើតួលេខផ្លូវការទាំងឡាយ ទីភ្នាក់ងារព័ត៌មានបារាំង AFP លើកឡើងថា ខាងក្រៅចិនដីគោក ចំនួនអ្នកបាត់បង់ជីវិតដោយសារវីរុសនោះ បានឡើងដល់ជាង១.១០០នាក់។ ខាងក្រៅប្រទេសចិន ការឆ្លងវីរុសបន្តយ៉ាងលឿន ជាមួយនឹងការកើនឡើងនៃចំនួនជនរងគ្រោះក្នុងប្រទេសជាច្រើន ដូចជាក្រៅពីអ៊ីតាលី អ៊ីរ៉ង់មានអ្នកឆ្លងឡើងដល់ជាង៨.០០០នាក់និងជិត៣០០នាក់បានបាត់បង់ជីវិត។
នៅអេស្ប៉ាញមានអ្នកឆ្លងជាង១.៦០០នាក់ នៅម៉ារ៉ុកមានអ្នកបាត់បង់ជីវិតម្នាក់ ក៏ដូចជានៅលីបង់ក៏មានមនុស្សម្នាក់បានបាត់បង់ជីវិតដែរ។ មនុស្សដំបូងម្នាក់បានឆ្លងវីរុសនៅសាធារណរដ្ឋប្រជាធិបតេយ្យកុងហ្គោ ម្នាក់នៅបួគីណាហ្វាសូ ម្នាក់នៅប៉ាណាម៉ាឬម៉ុងហ្គោលី។ល។
សរុបមនុស្សជាង១១៧.០០០នាក់ឆ្លងវីរុសនេះ ក្នុងនោះប្រមាណជា៣៦.០០០នាក់នៅក្រៅប្រទេសចិន ត្រូវបានជំរឿនឃើញក្នុងប្រទេស និងដែនដី១០៧។ ម្យ៉ាងទៀតដោយមិនគិតពីផលប៉ះពាល់ធំធេងទូទៅដោយសារវីរុស COVID-19 បណ្ដាសាលារៀនត្រូវបិទទ្វារក្នុងប្រទេស១៥ ប៉ះពាល់ដល់សិស្ស និងនិស្សិត៣៦៣លាននាក់។ នេះជាការលើកឡើងរបស់អង្គការយូនេស្កូ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ