រាជធានីភ្នំពេញ ៖ បុរសម្នាក់ដែលក្រុមគ្រួសារអះអាងថា មានជំងឺផ្លូវចិត្ត ហើយបានធ្វើដំណើរទៅមន្ទីរពេទ្យ ហើយវង្វេងផ្លូវចូលទៅក្នុងបរិវេណផ្ទះអ្នកក្បែរខាងរួចដួលសន្លប់ បង្កអោយមានការភ្ញាក់ផ្អើលកាលពីវេលាម៉ោងប្រមាណ៨និង១៥នាទីព្រឹកថ្ងៃទី១១ ខែមីនា ឆ្នាំ២០២០ នៅខាងលិចផ្សារទឹកថ្លា ស្ថិតក្នុងភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ។
បុរសម្នាក់ដែលដួលសន្លប់ខាងលើឈ្មោះជាម យ៉ុន អាយុ៥០ឆ្នាំ មានលំនៅភូមិកណ្តាល ឃុំកំពង់សឹង ស្រុកព្រះស្តេច ខេត្តព្រៃវែង និងស្នាក់នៅជាមួយកូនក្បែរកន្លែងកើតហេតុខាងលើ។
តាមប្រភពពីសាក្សីនៅកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសរងគ្រោះម្នាក់ខាងលើបានដើរចូលទៅក្នុងរបងបរិវេណផ្ទះអ្នកជិតខាង ដោយទឹកមុខស្លេកស្លាំង ហើយក៏ដួលសន្លប់ និងប្រកាច់ បន្ទាប់ពីដួលសន្លប់ប្រមាណ១០នាទីក្រោយមកក៏បានដឹងខ្លួនវិញ រួចក្រោកអង្គុយ ។ ភ្លាមៗនោះបង្កអោយមានការភ្ញាក់ផ្អើលដល់អ្នកដំណើរ និងអ្នកភូមិ ដោយពុំមាននរណាម្នាក់ចូលទៅជិតឬជួយធ្វើចលនាសង្គ្រោះបឋមនោះទេ ។ នៅព្រឹកនោះដែរ អាជ្ញាធរ និងសមត្ថកិច្ចក៏បានចុះទៅដល់កន្លែងកើតហេតុសួរនាំពីមូលហេតុដែលនាំឱ្យបុរសម្នាក់ខាងលើដួលសន្លប់។
តាមប្រភពពីបុរសរងគ្រោះបានប្រាប់នគរបាលឱ្យដឹងថា នៅមុនពេលដួលសន្លប់ គាត់បានធ្វើដំណើរចេញពីផ្ទះទៅគ្លីនិកក្បែរនោះ លុះពេលត្រឡប់មកវិញក៏រង្វេងផ្លូវ ហើយទន់ដៃជើងដួលសន្លប់តែម្តង ។
តាមប្រភពដដែលបានបន្តអោយដឹងថា កន្លងមក គាត់មានជំងឺភ្លឹក ហើយតែងតែដួលសន្លប់ ហើយនៅព្រឹកនោះដែរ នគរបាលក៏បានទាក់ទងកូនប្រុសអោយមកទទួលយកត្រឡប់ទៅវិញផងដែរ ។
តាមប្រភពពីកូនប្រុសរបស់រងគ្រោះបានអោយដឹងថា ឪពុករបស់គាត់មានជំងឺផ្លូវចិត្តអស់រយៈពេលប្រមាណ៥ឆ្នាំមកហើយ និងបានទៅបើកថ្នាំនៅមន្ទីរពេទ្យមិត្តភាពខ្មែរ-សូវៀត ហើយកន្លងមកឪពុករបស់គាត់ចេះតែរង្វេង និងភ្លឹក ព្រមទាំងដួលសន្លប់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ