ខេត្តបាត់ដំបង ៖ នៅព្រឹកថ្ងៃទី១១ មីនា នេះ កម្លាំងនគរបាលការិយាល័យសណ្ដាប់ សហការជាមួយកម្លាំងនគរបាលក្រុងបាត់ដំបង ដែលដឹកនាំដោយលោកឧត្តមសេនីយ៍ត្រី ប៉ែន ឬទ្ធី…
ខេត្តបាត់ដំបង ៖ នៅព្រឹកថ្ងៃទី១១ មីនា នេះ កម្លាំងនគរបាលការិយាល័យសណ្ដាប់ សហការជាមួយកម្លាំងនគរបាលក្រុងបាត់ដំបង ដែលដឹកនាំដោយលោកឧត្តមសេនីយ៍ត្រី ប៉ែន ឬទ្ធី ស្នងការរងខេត្ត បានចុះរៀបចំសណ្ដាប់ធ្នាប់ និងបញ្ឈប់ឱ្យមានការលក់ដូរអនាធិបតេយ្យ នៅលើដងផ្លូវជុំវិញផ្សារធំបាត់ដំបង (ផ្សារណាត់) ដែលកន្លងមក មានភាពរញ៉េរញ៉ៃបំផុត ។
លោកឧត្តមសេនីយ៍ត្រី ប៉ែន ឬទ្ធី ស្នងការរងខេត្ត ដែលដឹកនាំកម្លាំងចុះរៀបចំសណ្ដាប់ធ្នាប់ បាននិយាយកាលពីម្សិលមិញនេះថា ការរៀបចំនេះ គឺមិនអនុញ្ញាតឱ្យមានការលក់ដូរនៅលើដងផ្លូវទៀតទេ ។ លោក ស្នងការរងបានបញ្ជាក់ថា កម្លាំងជំនាញនឹងរៀបចំសណ្ដាប់ធ្នាប់ ហើយជាមួយគ្នានេះ មន្ត្រីចរាចរណ៍ក៏នឹងចុះអនុវត្តច្បាប់ចរាចរណ៍លើអ្នកដំណើរ ដែលមិនគោរពច្បាប់ដែរ។ ដូចជាជិះម៉ូតូមិនពាក់មួកសុវត្ថិភាព និង បើកបរបញ្ច្រាសទិស និងការចតយានយន្តគ្មានសណ្ដាប់ធ្នាប់ ។
ដោយឡែក អធិការក្រុងបាត់់ដំបង លោកឆាង វណ្ណឆៃ ដែលបានចុះអនុវត្តផ្ទាល់ដែរ បានប្រាប់កោះសន្តិភាពថា នេះជាការអនុវត្តតាមបទបញ្ជារបស់លោកស្នងការខេត្ត ហើយក៏យោងលើស្មារតីក្នុងអង្គប្រជុំដែរ ដែលបានសម្រេចបញ្ឈប់មិនឱ្យមានការលក់ដូរនៅលើដងផ្លូវ ជុំវិញផ្សារណាត់ ដែលស្ថិតចំកណ្ដាលក្រុងបាត់ដំបងនេះ ។ លោកអធិការរូបនេះបានបញ្ជាក់ថា ផែនការនេះ យើងនឹងរៀបចំឱ្យមានសណ្ដាប់ធ្នាប់ល្អស្អាតនៅជុំវិញផ្សារណាត់ ហើយក៏មិនអនុញ្ញាតឱ្យអាជីវករលក់ដូរនៅលើដងផ្លូវជុំវិញផ្សារនេះ។
លោកឆាង វណ្ណឆៃ បានបញ្ជាក់ថា ចាប់ពីថ្ងៃនេះតទៅ គ្មានការដាក់ទំនិញលក់ដូរនៅលើដងផ្លូវជុំវិញផ្សារណាត់ទៀតទេ ហើយមន្ត្រីជំនាញនឹងចុះត្រូតពិនិត្យជាប្រចាំនៅទីនោះ ។ ប៉ុន្តែលោកបញ្ជាក់ដែរថា ការចុះអនុវត្តច្បាប់ ដើម្បីរៀបចំសណ្ដាប់ធ្នាប់ និងបញ្ឈប់មិនឱ្យមានការលក់ដូរនេះ អាជីវករហាក់មានការចូលរួមយ៉ាងរលូនដោយគ្មានការជំទាស់នឹងផែនការនេះទេ។
គេសង្កេតឃើញក្រុមអាជីវករ ហាក់មានការយល់ព្រមចំពោះការចុះរៀបចំសណ្ដាប់ឬបញ្ឈប់ការលក់ដូរនេះ។ ប៉ុន្តែក្រុមអាជីវករភាគច្រើនដែលបាត់បង់កន្លែងលក់ គ្រាន់តែរអ៊ូរទាំថា ពួកគេមិនជំទាស់នឹងផែនការរបស់សមត្ថកិច្ចទេ តែពួកគេពិបាកក្នុងការរកទីផ្សារផ្សេងដើម្បីលក់ដូរ។ ព្រោះធ្លាប់លក់នៅផ្សារណាត់ ដែលមានម៉ូយស្រាប់ តែពេលទៅលក់នៅកន្កែងផ្សេងពួកគេអាចជួបការលំបាកបន្តិចទំរាំមានម៉ូយឡើងវិញ។
ចែករំលែកព័តមាននេះ