កម្ពុជារកឃើញករណីទី៣ លើស្ត្រីអង់គ្លេសម្នាក់ មានឆ្លងវីរុសកូវីដ-១៩
រាជធានីភ្នំពេញ ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៃព្រះរាជាណាចក្រកម្ពុជា បានប្រកាសតាមរយៈសន្និសីទសារព័ត៌មាន អោយដឹងថា កម្ពុជារកឃើញនូវករណីទី៣…
រាជធានីភ្នំពេញ ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៃព្រះរាជាណាចក្រកម្ពុជា បានប្រកាសតាមរយៈសន្និសីទសារព័ត៌មាន អោយដឹងថា កម្ពុជារកឃើញនូវករណីទី៣…
រាជធានីភ្នំពេញ ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៃព្រះរាជាណាចក្រកម្ពុជា បានប្រកាសតាមរយៈសន្និសីទសារព័ត៌មាន អោយដឹងថា កម្ពុជារកឃើញនូវករណីទី៣ លើស្ត្រីជនជាតិអង់គ្លេសម្នាក់ ដែលមានផ្ទុកវីរុសកូវីដ-១៩ បានចូលមកដល់ទឹកដីនៃខេត្តកំពង់ចាម របស់កម្ពុជា ។
នៅម៉ោង៤ និង៣០នាទីរសៀល ថ្ងៃទី១០ មីនា ២០២០នេះ លទ្ធផលពីវិទ្យាស្ថានប៉ាស្ទ័រកម្ពុជា បានបញ្ជាក់ថា ស្ត្រីជនជាតិអង់គ្លេសម្នាក់ មានអាយុ៦៥ឆ្នាំ វិជ្ជមាន ចំពោះវីរុស COVID-19 ។
ស្ត្រីរូបនេះ ជាអ្នកដំណើរតាមនាវា ឈ្មោះ Viking Cruise Journey ចេញពីកំពង់ផែ My Tho នៃទីក្រុងហូជីមីញ សំដៅមកទីក្រុងភ្នំពេញ តាមរយៈចូវដុក ច្រកទ្វារអន្តរជាតិក្អមសំណរ និងហួសទៅចូលចត នៅទីរួមខេត្តកំពង់ចាម ។
បច្ចុប្បន្ន ក្រសួងសុខាភិបាលកម្ពុជា កំពុងចាត់ចែងឲ្យយកស្ត្រីជនជាតិអង់គ្លេសរូបនេះ មកដាក់នៅបន្ទប់ដាច់ដោយឡែក ក្នុងមន្ទីរពេទ្យខេត្តកំពង់ចាម ដើម្បីព្យាបាល និងតាមដានសុខភាពគាត់ ។
ក្រៅពីស្ត្រីជនជាតិអង់គ្លេសមានផ្ទុកវីរុសកូវីដ-១៩ ម្នាក់ខាងលើនេះ ក៏មានស្ត្រីជនជាតិអង់គ្លេសម្នាក់ទៀត ដែលជិតដិត ប៉ុន្តែលទ្ធផលធ្វើតេស្ត អវិជ្ជមាន ។ យ៉ាងណាស្ត្រី អវិជ្ជមានរូបនេះ ក៏ត្រូវបានដាក់ឲ្យនៅបន្ទប់ដាច់ដោយឡែក នៅលើនាវា រួមទាំងអ្នកដំណើរផ្សេងទៀត សរុបចំនួន៣០នាក់ និងបុគ្គលិកនាវា៣៤នាក់ទៀត សរុបចំនួន៦៤នាក់ ត្រូវដាក់ឲ្យនៅលើនាវាទាំងអស់ មិនអនុញ្ញាតអោយចុះមកលើគោកទេ រង់ចាំយកសំណាកទៅវិភាគ នៅវិទ្យាស្ថានប៉ាស្ទ័រ ជាមុនសិន ។
ស្ត្រីមានផ្ទុកវីរុសកូវីដ-១៩ ដែលមានគ្នា៥នាក់ (ជនជាតិអង់គ្លេសទាំងអស់ ប៉ុន្តែ៤នាក់ អវិជ្ជមាន) បានធ្វើដំណើរតាមយន្តហោះចេញពីទីក្រុងឡុង នៃប្រទេសអង់គ្លេស មកដល់ទីក្រុងហាណូយ ប្រទេសវៀតណាម នៅថ្ងៃទី២ មីនា ២០២០ ។ បន្ទាប់មកនៅថ្ងៃទី៥ មីនា ២០២០ ពួកគេបានបន្តដំណើរតាមនាវាខាងលើ ពីទីក្រុងហូជីមីញ មកដល់រាជធានីភ្នំពេញ នៅថ្ងៃទី៧ មីនា ២០២០ ។
ប៉ុន្តែមុននឹងមកដល់ទីក្រុងភ្នំពេញ អ្នកទទួលខុសត្រូវលើនាវាទេសចរណ៍នេះ បានទទួលដំណឹងថា យន្តហោះដែលស្ត្រីជនជាតិអង់គ្លេសបានជិះមក មានជនជាតិវៀតណាមម្នាក់ដែលអង្គុយជិតស្ត្រីជនជាតិអង់គ្លេស វ័យ៦៥ឆ្នាំខាងលើនេះ ត្រូវបានគេរកឃើញមានផ្ទុកវីរុសកូវីដ-១៩ ក្នុងខ្លួន នៅទីក្រុងហាណូយ ។
ពេលមកដល់រាជធានីភ្នំពេញ នៅថ្ងៃទី៧ មីនានោះ ជនជាតិអង់គ្លេសទាំង៥រូប ត្រូវបានបញ្ជូនទៅពិនិត្យសុខភាពនៅមន្ទីរពេទ្យមិត្តភាពខ្មែរ-សូវៀត ហើយបានយកសំណាកវត្ថុវិភាគចំនួនតែ៣នាក់ ទេ (ដោយ២នាក់ ប្រកែកមិនព្រមឲ្យយកដាច់ខាត ដោយសំអាងថា ពួកគាត់មិនមានបញ្ហាសុខភាព ឫរោគសញ្ញាអ្វីឡើយ) ជាលទ្ធផល អ្នកទាំង៣នាក់នេះ អវិជ្ជមាន ទើបពួកគេទាំង៥នាក់ បានបន្តដំណើរទៅដល់ទីរួមខេត្តកំពង់ចាម ។
ដើម្បីឲ្យមានភាពច្បាស់លាស់ មន្ទីរពេទ្យមិត្តភាពខ្មែរ-សូវៀត បានផ្តល់ព័ត៌មានទៅ មន្ទីរសុខាភិបាលខេត្តកំពង់ចាម ដើម្បីយកសំណាកទាំង២នាក់ទៀត មកធ្វើតេស្ត ដោយមានការសម្របសម្រួលពីអ្នកគ្របគ្រងនាវាផង ទើបក្រុមមន្ត្រីពេទ្យខេត្តកំពង់ចាមអាចយកបានសំណាកអ្នកទាំង២ បញ្ជូនមកពិនិត្យនៅវិទ្យាស្ថានប៉ាស្ទ័រកម្ពុជា នៅថ្ងៃទី៩ មីនា ។ រហូតមកដល់ ថ្ងៃទី១០ មីនា វេលាម៉ោង៤និង៣០នាទីរសៀល ក៏ទទួលបានលទ្ធផល វិជ្ជមាន លើស្ត្រីជនជាតិអង់គ្លេសអាយុ៦៥ឆ្នាំម្នាក់ (ម្នាក់ទៀត មិនឆ្លងវីរុសទេ) ។
គិតត្រឹមយប់ថ្ងៃទី១០ មីនានេះ ប្រទេសកម្ពុជាបានរកឃើញករណីអ្នកឆ្លងវីរុសកូវីដ-១៩ សរុបចំនួន៣ករណីហើយ ៖ ទី១ គឺជនជាតិចិន ភេទប្រុស អាយុ៦០ឆ្នាំ ជាសះស្បើយ ហើយត្រឡប់ទៅប្រទេសចិនវិញហើយ ទី២ គឺបុរសជនជាតិខ្មែរ ភេទប្រុស អាយុ៣៨ឆ្នាំ កំពុងដាក់ព្យាបាលនៅមន្ទីរពេទ្យបង្អែកខេត្តសៀមរាប ហើយបច្ចុប្បន្នគាត់មានសុខភាពល្អ មិនមានរោគសញ្ញាអ្វីទេ តែគាត់បន្តវិជ្ជមានកូវីដ-១៩ និងទី៣ គឺស្ត្រីជនជាតិអង់គ្លេស អាយុ៦៥ឆ្នាំ កំពុងដាក់ព្យាបាលនៅមន្ទីរពេទ្យបង្អែកខេត្តកំពង់ចាម ហើយគាត់មានសុខភាពល្អ មិនមានរោគសញ្ញាអ្វីគួរឱ្យកត់សម្គាល់ទេ ៕
ចែករំលែកព័តមាននេះ