រាជធានីភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីបញ្ជាក់ថា សម្តេចនឹងប្រកាសវិធានការថ្មីបន្ថែមពីវិធានការមុន ដើម្បីស្រោចស្រង់សេដ្ឋកិច្ចកម្ពុជាឡើងវិញ ។ ការប្រកាសនេះ ខណៈកម្ពុជាប៉ះពាល់ផ្នែកសេដ្ឋកិច្ចពីជំងឺកូវីដ១៩…
រាជធានីភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីបញ្ជាក់ថា សម្តេចនឹងប្រកាសវិធានការថ្មីបន្ថែមពីវិធានការមុន ដើម្បីស្រោចស្រង់សេដ្ឋកិច្ចកម្ពុជាឡើងវិញ ។ ការប្រកាសនេះ ខណៈកម្ពុជាប៉ះពាល់ផ្នែកសេដ្ឋកិច្ចពីជំងឺកូវីដ១៩ ចំពោះវិស័យកាត់ដេរ និងទេសចរណ៍ដែលជំងឺនេះបានកំពុងតែវាយលុកនៅបណ្តាប្រទេសលើសកលលោក ។
សម្តេចតេជោ បានថ្លែងក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា នាព្រឹកថ្ងៃទី១០ ខែមីនា យ៉ាងដូច្នេះថា ៖«គេនិយាយឡើង EBAៗ អា EBA ហ្នឹងវាគង់តែបាត់ទេ គ្រាន់តែបាត់មុន ឬក្រោយប៉ុណ្ណឹង ឥឡូវបាត់២០ភាគរយយើងកុំយកអធិបតេយ្យជាតិទៅដោះដូរតម្លៃប៉ុណ្ណឹង ។ ខ្ញុំនឹងប្រកាសចេញនៅថ្ងៃទី១ ខែមេសាខាងមុខនេះនូវវិធានការបន្ថែមទៀតលើវិធានការដែលប្រកាស កាលពីថ្ងៃទី២៩ ខែមីនា ឆ្នាំ២០១៩ កន្លងមកនូវវិធានការស្រោចស្រង់ផ្នែកសេដ្ឋកិច្ច» ។
សម្តេចបន្តថា សម្តេចមិនព្រួយបារម្ភចំពោះការនាំចេញផលិតកម្មរបស់កម្ពុជាទៅកាន់ទីផ្សារអឺរ៉ុបនោះទេ ប៉ុន្តែបារម្មណ៍ចំពោះអឺរ៉ុបខ្លួនឯងមានវិបត្តិដូចជា រឿងអង់គ្លេសចាកចេញពីអឺរ៉ុបដែលពេលនេះអង់គ្លេសកំពុងចរាចរណ៍យ៉ាងសកម្មជាមួយអឺរ៉ុបលើវិធានការផ្សេងៗទាំងអស់ ព្រោះអង់គ្លេសមិនមែនជាសមាជិកអឺរ៉ុបទៀតទេ ។ សម្តេចបន្ថែមថា វិបត្តិសេដ្ឋកិច្ចសកលនៅអឺរ៉ុប កាលពីឆ្នាំ២០០៨ -២០០៩ ផងដែរ ។
សម្តេចថា ពេលនេះអឺរ៉ុបបានកំពុងទទួលរងបញ្ហាចំនួន២ គឺជំងឺកូវីដ១៩ និងរឿងសិទ្ធិមនុស្សដែលពេលនេះប្រទេសតួគីពាក់ព័ន្ធនឹងជនភ្ញៀវខ្លួននៅក្នុងប្រទេស ។ នៅពេលដែលបញ្ហាសេដ្ឋកិច្ចអឺរ៉ុបមិនល្អ ហើយការបញ្ជាទិញពីបណ្តាប្រទេសនានាក៏ធ្លាក់ចុះដែរ ។ សម្តេចថា កុំនឹកស្មានថា ឲ្យកម្ពុជាធ្វើតាមការទាមទារអឺរ៉ុបដើម្បីបាន២០ភាគរយនោះមិនអាចទៅរួចទេ ។ កម្ពុជាមិនយកអធិបតេយ្យរបស់ខ្លួន ទៅដោះដូរផ្នែកជំនួយ ឬការអនុគ្រោះណាមួយនោះទេ ។
សូមជម្រាបថា ទោះបីជាប្រមុខរាជដ្ឋាភិបាលប្រកាសថ្ងៃកំណត់នូវការដាក់ចេញវិធានការបន្ថែមថ្មី ដើម្បីស្រោចស្រង់សេដ្ឋកិច្ចឡើងវិញក្តីក៏វិធានការទាំងនេះមិនទាន់ត្រូវបានទម្លាយឲ្យដឹងនោះទេ ៕ កែសម្រួលដោយ ៖ សុឃាក់
ចែករំលែកព័តមាននេះ