ខេត្តព្រះសីហនុ ៖ បើតាមសេចក្តីបឋមបានឱ្យដឹងថា ស្ត្រីជាភរិយាបានបីកូនតូចអាយុទើបតែ២០ថ្ងៃ ទួញយំ សោកស្តាយបុរសជាប្តីដែលបានបាត់បង់ជីវិត ដោយសារតែឆក់នឹងខ្សែភ្លើងកាលវេលាម៉ោង៨និង៣០នាទីព្រឹក នាថ្ងៃទី៩ ខែមីនា ឆ្នាំ២០២០ នៅចំណុចកំពេញចាស់ ស្ថិតក្នុងក្រុម១ ភូមិ១ សង្កាត់លេខ៣ ក្រុង/ខេត្តព្រះសីហនុ ដែលនេះជារឿងដ៏គួរសោកស្តាយមួយនាំឱ្យមានការព្រាត់និរាសគ្រួសារក្នុងពេលបុរសជាប្តី ជាឪពុក ទៅស៊ីឈ្នួលការងារដើម្បីរកប្រាក់មកចិញ្ចឹមជីវិតគ្រួសារ។
សេចក្តីរាយការណ៍បន្តថា ជនរងគ្រោះខាងលើមានឈ្មោះ អ៊ុក រ៉ាមី ភេទប្រុស អាយុ៣១ឆ្នាំ ស្រុកកំណើតក្រុងភ្នំពេញ បច្ចុប្បន្នស្នាក់នៅក្រុមទីភូមិ៥ សង្កាត់លេខ៤ ក្រុងនិងខេត្តព្រះសីហនុ របរជាងលាបថ្នាំ បានបាត់បង់ជីវិតខណៈនៅពេលកំពុងធ្វើការ (លាបថ្នាំផ្ទះ) រីឯម្ចាស់ផ្ទះឈ្មោះ ទូច តុធា ភេទប្រុស អាយុ៤២ឆ្នាំ មុខរបរលក់ដូរ។
បើតាមសមត្ថកិច្ចមូលដ្ឋានសង្កាត់លេខ៣ បានឱ្យដឹងថា ករណីបុរសម្នាក់ដែលបានបាត់បង់ជីវិតដោយសារតែឆក់និងចរន្តភ្លើងអគ្គិសនី គឺខណៈពេលដែលជនរងគ្រោះឡើងលាបថ្នាំជញ្ជាំងផ្ទះមួយកន្លែង ជិតបង្គោលខ្សែបណ្តាញភ្លើងអគ្គិសនី នៅម្តុំសាលារៀនកំពេញចាស់ ស្ថិតក្នុងសង្កាត់លេខ៣ ក្រុងព្រះសីហនុ ។
បើតាមសាក្សីបានឱ្យដឹងថា នៅម៉ោង៨និង៣០នាទីព្រឹក គេឃើញជនរងគ្រោះកំពុងធ្វើការ ស្រាប់តែឮសូរសំឡេងផ្ទុះ ហើយមានផ្សែងចេញមក ស្របពេលនោះក៏ឃើញជនរងគ្រោះបានបាត់បង់ជីវិតនៅនឹងកន្លែងកើតហេតុ បណ្ដាលមកពីឆក់ខ្សែភ្លើងទៅហើយ បន្ទាប់មកក៏បានរាយការណ៍ជូនសមត្ថកិច្ចនគរបាលប៉ុស្តិ៍លេខ៣។
ដោយឡែកយោងតាមប្រភពពីម្ចាស់ផ្ទះបានបង្ហើបឱ្យដឹងថា បង្គោលភ្លើងដែលធ្វើឱ្យអ្នកលាបថ្នាំផ្ទះរបស់គាត់ឆក់នោះ គឺជាបង្គោលភ្លើងកម្មសិទ្ធិរបស់ក្រុមហ៊ុនមួយ ដែលកាលនោះក្រុមហ៊ុនបានដាក់នៅជាប់របងផ្ទះរបស់គាត់តែម្តង ដោយពុំមានការអនុញ្ញាត្តិពីគាត់ឡើយ ។ ក្រោយមកគាត់ក៏បានស្នើទៅតំណាងក្រុមហ៊ុនឱ្យមកនិយាយគ្នា ព្រោះថាបង្គោលនេះ មានខ្សែកម្លាំងធំនៅជាប់ផ្ទះរបស់គាត់ទៀត ខ្លាចមានបញ្ហាដល់ផ្ទះរបស់គាត់ តែតំណាងក្រុមហ៊ុនពុំបានមកនិយាយសម្របសម្រួលជាមួយគាត់ឡើយ រហូតនៅព្រឹកថ្ងៃទី៩ មីនានេះ ក៏កើតមានរឿងបែបនេះតែម្តង។
ខណៈពេលក្រោយកើតហេតុនោះ សពជនរងគ្រោះ បានរក្សាមិនទាន់បានយកទៅណាទេ គឺទុកនៅកន្លែងកើតហេតុនិងរង់ចាំជំនាញបច្ចេកទេសមកពិនិត្យជាមុនសិន៕ (កែសម្រួលដោយ ៖ បុប្ផា)
ចែករំលែកព័តមាននេះ