នាយករដ្ឋមន្ត្រីនៃប្រទេសអុីតាលី លោក Giuseppe Conte បានប្រកាសថា ការប្រកួតលីគក្របខ័ណ្ឌ Serie A រួមទាំងព្រឹត្តិការណ៍កីឡាផ្សេងទៀត ត្រូវបានផ្អាកដោយគ្មានពេលកំណត់…
នាយករដ្ឋមន្ត្រីនៃប្រទេសអុីតាលី លោក Giuseppe Conte បានប្រកាសថា ការប្រកួតលីគក្របខ័ណ្ឌ Serie A រួមទាំងព្រឹត្តិការណ៍កីឡាផ្សេងទៀត ត្រូវបានផ្អាកដោយគ្មានពេលកំណត់ ខណៈដែលប្រទេសនេះនៅតែបន្តតស៊ូដើម្បីទប់ស្កាត់ការរីករាលដាលនៃវីរុស Covid-19។
ជាមួយនឹងតួលេខចុងក្រោយដែលបង្ហាញថាមនុស្សចំនួន៤៦៣នាក់ ក្នុងប្រទេសនេះមានអ្នកបាត់បង់ជីវិតដោយសារវីរុសដ៏កាចសាហាវខាងលើ ខណៈការឆ្លងកើនឡើងដល់ចំនួន៩.១៧២ករណី រដ្ឋាភិបាលអុីតាលីបានដាក់ប្រទេសនេះក្រោមការរឹតបន្តឹង។
វិធានការណ៍ដែលបានអនុវត្តរួចហើយ នៅភាគខាងជើងនៃប្រទេសអុីតាលីរួមមាន ការហាមឃាត់ការប្រមូលផ្តុំជាសាធារណៈ និងការដាក់កម្រិតលើរាល់ចលនាទាំងអស់ក្រៅពីការងារ និងសេវាកម្មបន្ទាន់។
លក្ខខណ្ឌថ្មីរបស់អុីតាលីនឹងចូលជាធរមាននៅព្រឹកថ្ងៃអង្គារនេះ ហើយនឹងប៉ះពាល់ដល់ប្រជាជន៦០លាននាក់របស់ខ្លួន។ ការហាមឃាត់ការប្រមូលផ្តុំជាសាធារណៈនឹងរួមបញ្ចូលទាំងព្រឹត្តិការណ៍កីឡា និងព្រឹត្តិការណ៍សាធារណៈ, ការបិទរោងភាពយន្ត, កន្លែងកាយសម្ព័ន្ធ, កន្លែងផឹកស៊ី រួមទាំងពិធីបុណ្យផ្សេងៗជាច្រើន។
កីឡាបាល់ទាត់ត្រូវបានប៉ះពាល់យ៉ាងខ្លាំងដោយវីរុសនេះ ដែលធ្វើឱ្យការប្រកួតBពានរង្វាន់អឺរ៉ុបនឹងត្រូវលេងដោយគ្មានអ្នកទស្សនានៅសប្តាហ៍នេះ ។ ជាក់ស្តែងការប្រកួតជើងទី២ នៃពានរង្វាន់ Champions League រវាង PSG និង Dortmund នៅប្រទេសបារាំង នឹងលេងដោយគ្មានអ្នកគាំទ្រទស្សនា ខណៈការប្រកួតរវាង Sevilla Vs Roma, Olympiacos Vs Wolves និង Valencia Vs Atalanta ក៏ត្រូវធ្វើឡើងបែបនេះដូចគ្នា ៕ (ប្រភព៖ Goal.com)
ចែករំលែកព័តមាននេះ