រាជធានីភ្នំពេញ ៖រូបភាពវីដេអូបង្ហាញពីការនាំគ្នារាំឡកយ៉ាងសប្បាយរីករាយនៅក្នុងពិធីហែជំនូននៃមង្គលការត្រូវបណ្តាអ្នកលេងហ្វេសប៊ុកចែកចាយជាមួយនឹងការរិះគន់ ។ គេរិះគន់ដោយចាត់ទុកថា ជាការបំផ្លាញប្រពៃណី ទំនៀមទម្លាប់នៃមង្គលការខ្មែរ ។
យ៉ាងណាក្ដីគេនៅមិនទាន់ដឹងពីមូលហេតុពិតដែលនៅពីក្រោយនាំឲ្យគេនាំគ្នាធ្វើរឿងនេះឡើយ បើទោះបីជាសកម្មភាពនេះគឺគ្រាន់តែជាការបង្កឱកាសសប្បាយរីករាយក៏ដោយ ប៉ុន្តែវាផ្ទុយទាំងស្រុងទៅនឹងប្រពៃណីខ្មែរ ។ តារាសម្តែងអ្នកនាងខាត់ សុឃីម បានលើកឡើងថា «នេះជារឿងហួសចិត្ត ព្រោះអ្វីដែលគេកំពុងនាំគ្នាថែរក្សា បែរជាពួកគាត់នាំគ្នាបំផ្លាញ ខណៈពេលដែលសកម្មភាពមួយនេះគឺពិបាកនឹងទទួលយកបានណាស់។
ពួកគាត់នាំគ្នារាំឡកមុខពិធីហែជំនូនគឺខុសទាំងស្រុង បើទោះបីជាពួកគាត់គិតថា ពួកគាត់មានលុយអាចធ្វើអ្វីក៏បាន ប៉ុន្តែពួកគាត់មិនបានគិតពីផលប៉ះពាល់បញ្ហាអនាគតដល់ ក្មេងៗទាំងអស់នោះឡើយ ដោយពួកគេអាចនឹងមិនទទួលស្គាល់នូវអ្វីដែលជារបស់ខ្លួនឯង ។ សកម្មភាពនេះគឺជាការសម្លាប់វប្បធម៌ខ្លួនដោយខ្លួនឯង និងត្រជាក់បំផុត ដឹងតែធ្វើមិនដឹង ហើយ ចាស់ៗនៅជិតនោះក៏ព្រើលតាម។ ទៅតែម្តងទាំងប៉ី ទាំងទ្រ អត់មានអ្នកណាទប់អ្នកណាបានឡើយ »។
អ្នកនាង ខាត់ សុឃីម បានអំពាវនាវដល់ប្រជាពលរដ្ឋខ្មែរទាំងអស់ចូលរួមថែរក្សាមរតកដូនតាខ្មែរដែលបានបន្សល់ទុកឲ្យបានល្អ និងសូមឲ្យផ្តល់តម្លៃដល់ភ្លេងប្រពៃណីខ្មែរផង ។
ដោយឡែកលោកឌួង សុខគា ក៏បានសរសេរសារបង្ហោះនៅលើហ្វេសប៊ុករបស់លោកពាក់ព័ន្ធទៅនឹងបញ្ហានេះដែរថា «ចម្រៀងមរតកទៅចុះគេកែប៉ារ៉ូល កាឡៃបទភ្លេង ដូរឧបករណ៍ប្រគំពាសវាលពាសកាល ! ចុះពិធីមង្គលការ ដែលជាពិធីបែបទំនៀមទម្លាប់ប្រពៃណីនេះ បើមានគេកែឱ្យខុសពីបទដើមលំនាំដូនតា និងការណែនាំរបស់ក្រសួង ស្ថាប័ន ពាក់ព័ន្ធនានាដែរនោះ តើលោកអ្នកយល់យ៉ាងម៉េច ? បើខ្ញុំវិញនៅអត់សុខទេ ! ទោះជាស្មារតីអភិវឌ្ឍ ក៏មិនអាចយកអង្គរវត្តមកកែច្នៃដែរ គេគួររកវិធីផ្សេង! មែនទេអស់លោក ? បងប្អូនយល់យ៉ាងណាដែរ ? បើខ្ញុំមិនហ៊ានយល់ទេ ! គេធ្លាប់ស្តីឲ្យខ្ញុំ ព្រមទាំងលើកហេតុផលថា «ធ្វើបែបនេះអាចឲ្យវប្បធម៌សម្បូរណ៍បែប» គេពន្យល់ទៀតថា «ត្រូវគិតតាមបច្ចេកទេស មិនត្រូវគិតតាមអារម្មណ៍ទេ»។ ខ្ញុំអត់បច្ចេកទេសមិនហ៊ានថាអីទេ! ខ្ញុំអ្នកបុរាណប្រហែលមានឆន្ទាគតិជ្រុលនិយមរឿងរបស់ ចាស់ៗបែបហ្នឹងឯង ។
ជាចុងក្រោយខ្ញុំខ្លាចថាបើនាំគ្នាធ្វើបែបនេះគ្រប់តែគ្នា ចុះបទចៅព្រាហ្មណ៍ បទជើតមន គេត្រូវយកទៅផ្ញើនៅឯណា ?» ។
ដោយឡែកលោកអាចារ្យមង្គលរុន សុភ័ក សមាជិកគណៈកម្មការសមាគមអាចារ្យខ្មែរប្រចាំស្រុកកៀនស្វាយបានលើកឡើងថា តាមរយៈសកម្មភាពនេះលោកអាចហៅពួកគេថា ជាក្មេងអសីលធម៌ ដោយសារស្លៀកសម្លៀកបំពាក់ប្រពៃណីហើយ បែរជាធ្វើសកម្មភាពមិនគប្បីបែបនេះ ។ លោកបញ្ជាក់ថា «ក្នុងនាមជាអាចារ្យមង្គលមួយរូបសូមប្រឆាំងដាច់ខាត និងមិនអាចទទួលយកបានឡើយនូវទង្វើមួយនេះ ព្រោះវាបានធ្វើឲ្យប៉ះពាល់ដល់ប្រពៃណីវប្បធម៌ដូចតាខ្មែរ ។
មួយរយៈចុងក្រោយនេះតាមរយះការអង្កេតឃើញរបស់ខ្ញុំ នៅតំបន់ដូចជាខេត្តបាត់ដំបង បន្ទាយមានជ័យ និងតំបន់មួយចំនួននៅក្បែរថៃ ហាក់មានការចម្លងនូវរបៀបប្លែកក្នុងពិធីមង្គលការ ដែលមើលទៅច្របូកច្របល់ មិនដឹងចាប់អាណាមុខអាណាក្រោយ ដែលនាំឲ្យបញ្ចុះតម្លៃវប្បធម៌ ប្រពៃណីខ្មែរ »។
បើតាមលោកអាចារ្យរុន សុភ័ក្រ ពួកគាត់ទាំងអស់នោះអាចរាំបានក្នុងករណីដែលពួកគាត់ស្លៀកពាក់ធម្មតាមិនមានអ្នកណាហាមឃាត់ទេ ប៉ុន្តែអ្វីដែលចម្លែកនោះគឺពួកគេតុបតែងខ្លួនរបៀបជាអ្នកប្រពៃណីបុរាណ ហើយបញ្ចេញអាកប្បកិរិយាមិនសមទៅនឹងសម្លៀកបំពាក់ ។ យ៉ាងណាលោកជឿថា តំបន់ទាំងនោះគឺជាតំបន់នៅជិតប្រទេសជិតខាង ដូចនេះវាងាយនឹងចម្លងនូវវប្បធម៌គ្នា ខណៈពេលដែលចាស់ទុំ អាចារ្យនៅទីនោះក៏ពិបាកនឹងនិយាយ វាហាក់ដូចជាពាក្យចាស់ថា ហាស្លាក់ ខ្ជាក់ស្លែងដូច្នេះដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ