រាជធានីភ្នំពេញ ៖ យោងតាមរបាយការណ៍របស់មន្ទីរធម្មការ និងសាសនារាជធានីភ្នំពេញបានឲ្យដឹងថា សម្រាប់់ឆ្នាំ២០១៩ នៅរាជធានីភ្នំពេញ មានកឋិនដង្ហែចេញ និងចូលចំនួន៣៧២កឋិន ក្នុងនោះកឋិនដង្ហែចូលរាជធានីភ្នំពេញមានចំនួន១៤៩ និងដង្ហែចេញទៅតាមបណ្តាលខេត្តនានា…
រាជធានីភ្នំពេញ ៖ យោងតាមរបាយការណ៍របស់មន្ទីរធម្មការ និងសាសនារាជធានីភ្នំពេញបានឲ្យដឹងថា សម្រាប់់ឆ្នាំ២០១៩ នៅរាជធានីភ្នំពេញ មានកឋិនដង្ហែចេញ និងចូលចំនួន៣៧២កឋិន ក្នុងនោះកឋិនដង្ហែចូលរាជធានីភ្នំពេញមានចំនួន១៤៩ និងដង្ហែចេញទៅតាមបណ្តាលខេត្តនានា ចំនួន២២៣កឋិន កើន៥៨លើក ។
កឋិនសុំច្បាប់ដល់មន្ទីរមានតែ២៦ប៉ុណ្ណោះ ក្រៅពីនោះសុំច្បាប់អាជ្ញាធរមូលដ្ឋាន ។ ចំពោះបច្ច័យដែលប្រមូលបានពីអង្គកឋិនបានប្រមាណ១១.៩២៧.៨៦៨.០០០រៀល តិចជាងឆ្នាំមុនប្រមាណ៧១៩.៥១៦.៥០០រៀល ។
របាយការណ៍ដដែលបានឱ្យដឹងទៀតថា ជារៀងរាល់ឆ្នាំរដូវបុណ្យកឋិនទានមានរយៈពេលមួយខែតាមប្រពៃណីព្រះពុទ្ធសាសនាតាំងពីបុរាណកាលមក គឺចាប់ពីថ្ងៃ១រោច ខែអាសុច ដល់ថ្ងៃទី១៥កើត ខែកត្តិក ត្រូវបានបញ្ចប់ ។
នៅរាជធានីភ្នំពេញមានវត្តអារាម និងទីកន្លែងគោរពសម្រាប់សានានានា ចំនួន៦៨៧ទីតាំងធំៗ ក្នុងនោះ ព្រះពុទ្ធសាសនាមាន៖ វត្តគណៈមហានិកាយ១៤២វត្ត និងវត្តគណៈធម្មយុត្តិចំនួន៧វត្ត សាលាឆទានមានចំនួន១២កន្លែង ព្រះសង្ឃសរុបចំនួន៨៥៣៥អង្គ ភិក្ខុ៣៤៣១អង្គ សាមណេរ៥១០៤អង្គ ព្រះសង្ឃសរុបខាងមហានិកាយ៨៤០៥អង្គ ភិក្ខុ ៣៣៨៦អង្គ សាមណេរ៥០១៩អង្គ ។ ខាងធម្មយុត្តិសរុប១៣០អង្គ ភិក្ខុ៤៥អង្គ សាមណេរ ៨៥អង្គ ។ គណៈកម្មការអាចារ្យវត្តមានចំនួន ១៩៧៤នាក់ សីលវន្ដសីលវតីចំនួន១៣៤២នាក់ សិស្សនិស្សិតស្នាក់តាមវត្តដើម្បីបន្តការសិក្សាតាមគ្រឹះស្ថានសិក្សានានាក្នុងរាជធានីភ្នំពេញមានចំនួន៣០៧៩នាក់ កើន៥៧៥នាក់ ។
សម្រាប់ពាហិរសាសនា ឥស្លាមសាសនាមានចំនួន១២វិហារ សុរ៉ាវ១៨សាលា អង្គការ៥ និងសមាគម៩ បរិស័ទសរុបចំនួន៧២០៥ ប្រុស៧២០៥នាក់ ស្រី៣៣៩៧នាក់ បើធៀបនឹងប្រជាជនរាជធានីភ្នំពេញ ស្មើនឹង០.៤២% ។ រីឯគ្រឹស្ដសាសនាមានវិហារ១០៤ ទីស្នាក់ការថ្វាយបង្គំ១៨១ អង្គការ១៤ សមាគម៥៩ មាននិកាយចំនួន១០និកាយ បរិស័ទសរុប២១០៤៨នាក់ ស្រី១១២៦៥នាក់ ប្រុស៩៧៨៣នាក់ ។ បើធៀបនឹងប្រជាជនរាជធានីភ្នំពេញស្មើនឹង១.២៤%។
ចំណែកសាសនាមហាយានមានចំនួន៧១វិហារ ខុងបឹង១វិហារ គង់ស៊ីអ៊ីម១៣វិហារ មឹឡឹក៥វិហារ អ៊ីក្វាន់តាវ២០វិហារ ។ មហាធម្មមេត្រីជប៉ុន២វិហារ បរិស័ទសរុប៤៨៧១នាក់ ប្រុស២០៩៧នាក់ ស្រី២៧៧៤នាក់ បើធៀបនឹងប្រជាជនក្នុងរាជធានីភ្នំពេញ ស្មើនឹង០.២៩%។
សម្រាប់មហាយានវៀតណាមវិញ មាន១១វត្ត បរិស័ទសរុប១១១៤នាក់ប្រុស៤៣០នាក់ ស្រី៦៨៤នាក់ បើធៀបនឹងប្រជាជនរាជធានីភ្នំពេញ ស្មើនឹង០.០៧%។ កាវដាយមាន១វិហារ បរិស័ទសរុប១០០នាក់ ប្រុស៤០នាក់ ស្រី៦០នាក់ ស្មើនឹង០.០១% នៃប្រជាជនរាជធានីភ្នំពេញ ។ បាហៃមាន១វិហារ បរិស័ទសរុប២៧នាក់ ប្រុស១០នាក់ ស្រី១៧នាក់ ។
បើសរុបរួមបរិស័ទនៃពាហិរសាសនាទាំងអស់មានចំនួន៣៣២៥១នាក់ ប្រុស១៥៧៣៨នាក់ ស្រី១៧៥១៣នាក់ ស្មើនឹង១.៩៦% នៃប្រជាជនរាជធានីភ្នំពេញ ៕ (កែសម្រួលដោយ ៖ បុប្ផា)
ចែករំលែកព័តមាននេះ