សហរដ្ឋអាមេរិក ៖ សហរដ្ឋអាមេរិកគិតមកដល់ថ្ងៃទី៨មីនា មានអ្នកឆ្លងវីរុសCOVID-19ឡើងដល់ជិត៤៥០នាក់ និងអ្នកបាត់បង់ជីវិត១៩នាក់ទាក់ទិននឹងវីរុសនោះ ដែលជម្រុញឲ្យរដ្ឋញូវយ៉កចេញការប្រកាសអាសន្ន។ ចំនួនអ្នកឆ្លងវីរុសក្នុងរដ្ឋញូវយ៉កបានឡើងដល់១០៥នាក់ ពោល១៦នាក់ច្រើនជាងការប្រកាសនាពេលមុន។ នេះជាការអះអាងកាលពីថ្ងៃទី៨មីនា របស់អភិបាលរដ្ឋនោះលោកANDREW…
សហរដ្ឋអាមេរិក ៖ សហរដ្ឋអាមេរិកគិតមកដល់ថ្ងៃទី៨មីនា មានអ្នកឆ្លងវីរុសCOVID-19ឡើងដល់ជិត៤៥០នាក់ និងអ្នកបាត់បង់ជីវិត១៩នាក់ទាក់ទិននឹងវីរុសនោះ ដែលជម្រុញឲ្យរដ្ឋញូវយ៉កចេញការប្រកាសអាសន្ន។
ចំនួនអ្នកឆ្លងវីរុសក្នុងរដ្ឋញូវយ៉កបានឡើងដល់១០៥នាក់ ពោល១៦នាក់ច្រើនជាងការប្រកាសនាពេលមុន។ នេះជាការអះអាងកាលពីថ្ងៃទី៨មីនា របស់អភិបាលរដ្ឋនោះលោកANDREW CUOMO។ តុល្យការនោះរាប់បញ្ចូលអ្នកឆ្លង៨២នាក់ ដែលជំរឿនឃើញនៅក្នុងទីក្រុងWESTCHESTER ស្ថិតនៅជាយក្រុងញូវយ៉កស៊ីធី ជាទីក្រុងមានប្រជាជនច្រើនជាងគេបំផុតរបស់ប្រទេស។
ជាងពាក់កណ្ដាលនៃរដ្ឋទាំង៥០របស់អាមេរិក សុទ្ធតែប្រកាសពីមានអ្នកឆ្លងវីរុសដែលលេចពីដំបូងកាលពីខែធ្នូនៅចិន ដែលចាប់តាំងពីពេលនោះមក មានមនុស្សបាត់បង់ជីវិតជាង៣.៦០០នាក់ហើយលើពិភពលោក។ នៅសហរដ្ឋអាមេរិកបណ្ដាការប្រគំតន្ត្រីនិងសន្និសីទត្រូវលុបចោលក្នុងប្រទេស ហើយបណ្ដាសាកលវិទ្យាល័យត្រូវណែនាំដល់និស្សិត ឲ្យស្ថិតនៅក្នុងផ្ទះហើយរៀនតាមអនឡាញ។
ផ្ទុយទៅវិញយុទ្ធនាការឃោសនាបោះឆ្នោតប្រធានាធិបតីនាខែវិច្ឆិកាខាងមុខនេះនឹងបន្ត។ កាលពីថ្ងៃទី៧មីនាប្រធានាធិបតីអាមេរិកលោកដូណាល់ត្រាំគូសបញ្ជាក់ថា លោកនឹងបន្តរៀបចំការប្រមូលផ្ដុំមនុស្សខាងនយោបាយ ដែលជួនកាលមានមនុស្សចូលរួមដល់២០.០០០នាក់។
កាលពីថ្ងៃទី៨មីនាតាមកម្មវិធីទូរទស្សន៍FOX NEWS SUNDAY នាយកផ្នែកជំងឺឆ្លងនៃវិទ្យាស្ថានជាតិសុខភាព លោកANTHONY FAUCIពុំបដិសេធឡើយបណ្ដាវិធានការបង្ខាំងមានលំនាំដូចគ្នានឹងការបង្ខាំង ដែលប្រកាន់យកនៅចិននិងអ៊ីតាលីដែរ។ លោកថាយើងមិនចង់បំភ័យមនុស្សម្នាឡើយ តែយើងត្រូវចាត់បណ្ដាវិធានការតាមការជាក់ស្ដែង។ គឹហេតុផលនេះហើយដែលយើងត្រូវត្រៀមចាត់រាល់សកម្មភាពសមស្រប ដើម្បីទប់និងកម្រិតការឆ្លង។
តំបន់ដែលរងការប៉ះពាល់ខ្លាំងជាងគេនៅសហរដ្ឋអាមេរិក គឺផ្ទះសម្រាប់និវត្តន៍ជនមួយ ស្ថិតនៅជាយក្រុងSEATTLE។ អភិបាលរដ្ខវ៉ាស៊ិនតោនលោកJAY INSLEEគូសបញ្ជាក់ថា លោកគ្រោងហាមឃាត់ការប្រមូលផ្ដុំមនុស្សច្រើន តែមិនចាំបាច់ចាត់បណ្ដាវិធានការដាក់ឲ្យនៅដាច់ពីគេតឹងតែងបំផុតនោះឡើយ។ សេតវិមានក៏ត្រូវប្រឈមមុខដែរ នឹងករណីនៃការឆ្លងក្នុងនាវាកម្សាន្ត GRAND PRINCESS ដែលត្រូវចូលចតនាថ្ងៃទី៩មីនានៅOAKLAND ក្រោយពីឲ្យនៅក្នុងដែនទឹកនៃឆ្នេរសមុទ្រកាលីហ្វ័រនីញ៉ាអស់ពេលច្រើនថ្ងៃមក៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ