អ្នកនេសាទនៅតំបន់ទំនាបទន្លេមេគង្គប្រទេសវៀតណាម ចាប់បានអន្ទង់យក្សមួយក្បាលកាលពីពេល ថ្មីៗនេះ ។ សារព័ត៌មានក្នុងស្រុករបស់វៀតណាម កាលពីថ្ងៃទី២៧ សីហា ២០១៤ ផ្សាយថា នៅថ្ងៃទី២០ សីហា ២០១៤ អ្នកនេសាទនៅក្នុងស្រុក Long Xuyen ខេត្តអានយ៉ាង ចាប់បានអន្ទង់យក្សនៅក្នុងទន្លេ «Hau» ជាដៃទន្លេមេគង្គ។ អន្ទង់នេះមានប្រវែង១,៦ម៉ែត្រ ទម្ងន់១១គីឡូក្រាម ។ អ្នកនេសាទដែលចាប់បានអន្ទង់នោះបានលក់វាឱ្យអាជីវករនៅក្នុងស្រុក Rach Gia ខេត្តគៀនយ៉ាង ក្នុងតម្លៃ២០០ដុល្លារ។
អន្ទង់នោះមានទំហំធំបំផុតនៅវៀតណាម ខណៈពេលក្នុងតំបន់ទំនាបទន្លេមេគង្គមានកសិករបង្កើតកសិដ្ឋានចិញ្ចឹមអន្ទង់ជាច្រើនប្រភេទ ប៉ុន្តែភាគច្រើនជាអន្ទង់នៅតាមវាលស្រែ មានដងខ្លួនតូច ។កាលពីមុនធ្លាប់មានអន្ទង់យក្សជាប់សន្ទូចរបស់អ្នកនេសាទនៅស្រុក Long Xuyen ចំនួន២ក្បាល មានទម្ងន់៨,៥គីឡូក្រាម និង១០,៥គីឡូក្រាម ។ ដោយឡែកនៅដើមខែមករា ២០១៤ កសិករនៅក្នុងស្រុក Vinh ខេត្តង៉ែអាន ភាគកណ្តាលប្រទេសចាប់បានអន្ទង់យក្សមួយក្បាលទៀតនៅវាលស្រែ មានប្រវែង១,៥ម៉ែត្រ និងទម្ងន់១០គីឡូក្រាម ។
អន្ទង់យក្សជាទីពេញនិយមរបស់ពលរដ្ឋវៀតណាម ដោយគេយកចំអិនជាអាហារច្រើនប្រភេទ ។ ជនជាតិវៀតណាមភាគច្រើនមានជំនឿថា អន្ទង់យក្សជាឱសថបង្កើនអាយុ និងជួយបង្កើនចំណង់ផ្លូវភេទ ៕ ម៉ុក សេង
ចែករំលែកព័តមាននេះ