ប្រទេសអ៊ីតាលី ៖ ជាវិធានការមួយពុំធ្លាប់ដែលមានឡើយតាំងពីមុនមកនៅអឺរ៉ុប ដោយប្រជាជនអ៊ីតាលីជាង១៥លាននាក់ ត្រូវបង្ខាំងឲ្យនៅដាច់ពីគេ ចាប់ពីថ្ងៃទី៨ ខែមីនា ទៅ ដើម្បីប៉ុនប៉ង ទប់ស្កាត់ការឆ្លងរាលដាលនៃវីរុស COVID-19 ដែលឆ្លងរាលដាលខ្លាំងក្នុងប្រទេសនេះ ខណៈវីរុសនោះប៉ះពាល់ដល់មនុស្សជាង១០០.០០០នាក់ហើយលើពិភពលោក។ អាមេរិកឡាទីនទើបរាយការណ៍ពីមនុស្សម្នាក់ស្លាប់ដោយសារវីរុសនេះដែរ។
ការចេញចូលក្នុងតំបន់ដ៏ធំនៅភាគខាងជើងអ៊ីតាលី ចាប់ពីក្រុងមីឡាន ទីក្រុងសេដ្ឋកិច្ចរបស់ប្រទេស រហូតដល់ក្រុងវេនីស ជាកន្លៃងទេសចរណ៍សំខាន់មួយនៃពិភពលោក ចាប់ពីពេលនេះទៅត្រូវរិតត្បិតខ្លាំងបំផុត។ នេះជាក្រិត្យចេញផ្សាយតាមវេបសាយរបស់រដ្ឋាភិបាល។
វិធានការដ៏ខ្លាំងបំផុតបែបនោះត្រូវបានប្រកាន់យកក្នុងប្រទេសអឺរ៉ុបនេះ ដែលកំពុងរងការប៉ះពាល់ខ្លាំងបំផុត ដោយមានលំនាំមិនខុសគ្នាពីវិធានការ ដែលចិនបានចាត់នៅខេត្តហ៊ូប៉ីរបស់ខ្លួនឡើយ។
ក្នុងតំបន់LOMBAERDIE និងក្នុងខេត្ត១៤របស់អ៊ីតាលី រាល់ទស្សនីយភាពវប្បធម៌ កីឡាឬសាសនាត្រូវហាមឃាត់ រួចហាងឌីស្កូ រោងភាពយន្ត រោងមហោស្រព ការប្រគំតន្ត្រី ព្រមទាំងបណ្ដាទីកន្លែងប្រហាក់ប្រហែលគ្នាត្រូវបិទ រហូតដល់ថ្ងៃទី៣មេសា។ ចំណែកសម្ដេចប៉ាបហ្វ្រង់ស័រត្រូវផ្ដល់ការសូត្រធម៌ក្នុងនិវេសនដ្ឋានរបស់ព្រះអង្គតាមរយៈវីដេអូ។
ការឆ្លងរាលដាលនៃវីរុសនោះ ត្រូវបានអង្គការសុខភាពពិភពលោក WHO ចាត់ទុកថា ពិតជាលឿន និងគួរឲ្យព្រួយបារម្ភបំផុត។ ប្រទេសសរុប៩៤ហើយពេលនេះបានរងការប៉ះពាល់ដោយវីរុសនេះ ដែលបណ្ដាលឲ្យមនុស្សជាង៣.៥០០នាក់ហើយត្រូវបាត់បង់ជីវិតលើពិភពលោក។ អាមេរិកឡាទីនទើបមានអ្នកបាត់បង់ជីវិតម្នាក់ជាបុរសអាយុ៦៤ឆ្នាំម្នាក់ នៅក្រុងបុ៊យណូស៊ែប្រទេសអាហ្សង់ទីន។
នៅអ៊ីតាលីរយៈពេល២៤ម៉ោងចុងក្រោយនេះ កំណត់ឃើញអ្នកឆ្លងថ្មីជាង១.២៤៧នាក់ ព្រមទាំងអ្នកបាត់បង់ជីវិតថ្មី៣៦នាក់ នាំឲ្យចំនួនអ្នកបាត់បង់ជីវិតឡើងដល់២៣៣នាក់ក្នុងប្រទេសនេះ។ រដ្ឋាភិបាលអ៊ីតាលីបានសម្រេចបញ្ជូនមនុស្ស២០.០០០នាក់ទៀត ទៅបន្ថែមកម្លាំងជួយដល់បណ្ដាមន្ទីរពេទ្យ។ បែបនេះនឹងអាចបង្កើនចំនួនគ្រែពី៥.០០០ទៅដល់៧.៥០០សម្រាប់ការព្យាបាលបន្ទាន់។
ប្រទេស៥រងការប៉ះពាល់ខ្លាំង
ក្រៅពីអ៊ីតាលីប្រទេសបារាំងក៏រងការប៉ះពាល់ខ្លាំងដែរ ដោយសារវីរុសនោះជាមួយមនុស្សបាត់បង់ជីវិត១៦នាក់ និងអ្នកឆ្លង៩៤៩នាក់។ ប្រទេសចិនរាយការណ៍នាថ្ងៃទី៨មីនា ពីមនុស្សឆ្លងថ្មី៤៤នាក់ និងអ្នកបាត់បង់ជីវិតថ្មី២៧នាក់ នាំឲ្យចំនួនអ្នកបាត់បង់ជីវិតសរុបក្នុងប្រទេសនោះឡើងដល់៣.០៩៧នាក់។ ក្នុងប្រទេសនេះសរុបមានអ្នកជំងឺ៥៧.០៦៥នាក់ហើយ បានជាចាកចេញពីមន្ទីរពេទ្យក្រោយជាសះស្បើយ ហើយមនុស្សសរុប៣.០៩៧នាក់ត្រូវបានបាត់បង់ជីវិត។
ម្យ៉ាងទៀតបណ្ដាសារព័ត៌មានចិនរាយការណ៍ ពីមនុស្សជិត៣០នាក់ដែលនៅជាប់ក្រោមគំនរបាក់បែក ក្រោយពីសណ្ឋាគារមួយនៅក្រុងQUANZHOUខេត្តហ្វូជាន កន្លែងដាក់មនុស្សសង្ស័យឆ្លងវីរុសឲ្យនៅដាច់ពីគេបានបាក់។ ៤ម៉ោងក្រោយការបាក់សណ្ឋាគារផ្កាយ៥នោះសាលាក្រុងនេះគូសបញ្ជាក់ថា មនុស្ស៣៨នាក់ ក្នុងចំណោមមនុស្សទាំង៧០នាក់ស្ថិតក្នុងសណ្ឋាគារនោះបានត្រូវជួយសង្គ្រោះ។
ប្រទេសកូរ៉េខាងត្បូងរាយការណ៍នាថ្ងៃទី៨មីនា ពីអ្នកឆ្លងថ្មី៣៦៧នាក់ក្នុងថ្ងៃទី៧មីនាតែមួយគត់ នាំឲ្យចំនួនអ្នកឆ្លងសរុបឡើងដល់៧.១៣៤នាក់ ហើយមនុស្ស៥០នាក់បានបាត់បង់ជីវិត។
បន្ទាប់ពីកូរ៉េខាងត្បូងគឺប្រទេសអ៊ីរ៉ង់ ដែលក៏មានអ្នកបាត់បង់ជីវិតថ្មី២១នាក់និងអ្នកឆ្លងថ្មី១.០៧៦នាក់រយៈពេល២៤ម៉ោងចុងក្រោយនេះ។ ចំនួនអ្នកបាត់បង់ជីវិតសរុបក្នុងប្រទេសនេះ មានដល់១៤៥នាក់និងអ្នកឆ្លងសរុប៥.៨២៣នាក់។
នៅសហរដ្ឋអាមេរិកវីរុសត្រូវបានរកឃើញលើមនុស្ស២១នាក់ ក្នុងនាវាកម្សាន្តGRAND PRINCESSដែលឲ្យស្ថិតនៅក្នុងដែនទឹកកាលីហ្វ័រនីញ៉ា ក្រោយរកឃើញរោគសញ្ញាលើមនុស្សជាច្រើន ក្នុងចំណោមអ្នកដំណើរនិងសមាជិកក្រុមនាវិក៣.៥៣៣នាក់។
ម្យ៉ាងទៀតមនុស្ស២នាក់បានបាត់បង់ជីវិតដោយសារវីរុសនោះ នៅរដ្ឋផ្លរីដាដែលជាជនរងគ្រោះអាមេរិក ដំបូងនៅក្រៅឆ្នេរសមុទ្រខាងលិចរបស់ប្រទេស។ នៅតំបន់ឆ្នេរសមុទ្រខាងកើតរបស់ប្រទេស រដ្ឋញូវយ៉កបានចេញការប្រកាសអាសន្នក្រោយមនុស្សម្នាក់បាត់បង់ជីវិត ដើម្បីជម្រុញការតស៊ូប្រឆាំងជំងឺ។ នៅរដ្ឋវ៉ាស៊ិនតោនមានអ្នកបាត់បង់ជីវិតដល់១២នាក់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ