សហរដ្ឋអាមេរិក ៖ ២ថ្ងៃបន្ទាប់ពីរដ្ឋកាលីហ្វ័រនីញ៉ាចេញការប្រកាសអាសន្នក្នុងដែនដីខ្លួន ពីការឆ្លងរាលដាលនៃវីរុស COVID-19 បណ្ដាហាងលក់ដុំ នៅក្រុងឡូសអេនចឺឡេស មិនអាចឆ្លើយតបបាន ចំពោះសេចក្ដីត្រូវការកាន់តែខ្លាំងនូវផលិតផលចាំបាច់នានាពិសេសគ្រឿងហូបចុក។
នៅតាមផ្សារទំនើបៗ ក្រដាសសម្រាប់ជូតដៃ ឬសម្រាប់បន្ទប់ទឹក ក៏ដូចជាទឹកសុទ្ធត្រូវគេប្រមូលទិញអស់គ្មានសល់ ដោយខ្លាចការឆ្លងរាលដាលនៃវីរុសនេះ។ និយោជិតដែលធ្វើការក្នុងផ្សារទំនើបមួយនៃក្រុងឡូសអេនចឺឡេស និយាយថា ពិតជារញ៉េរញ៉ៃមនុស្សមារហាក់ផ្អើលខ្លាំង ហើយលើកគ្នាសម្រុកទិញដែលតួលេខនៃការទិញកើនដល់ទ្វេដងខុសពីទម្លាប់។ ពេលនេះអ្នកផ្អើលទិញក្លាយជាមិនអាចត្រួតត្រាបាន។ បែបបនេះផ្សាររបស់យើងគ្មានសល់ក្រដាសអនាម័យក៏ដូចជាទឹកសុទ្ធព្រមទាំងទឹកGELលាងដៃលក់ឡើយ។
ទោះបីមានការអំពាវនាវរបស់អាជ្ញាធរក៏ពលរដ្ឋកាលីហ្វ័រនីញ៉ាចាប់ផ្ដើមផ្អើល ហើយលើកគ្នាទិញឥវ៉ាន់ស្តុកទុក មិនខុសគ្នាពីតំបន់នានានៅអាស៊ី និងកន្លែងផ្សេងៗទៀតឡើយ។ នៅកាលីហ្វ័រនីញ៉ាទើបមានអ្នកបាត់បង់ជីវិតម្នាក់ដោយសារវីរុសCOVID-19 ហើយមានអ្នកឆ្លងច្រើនលំដាប់ទី២ បន្ទាប់ពីរដ្ឋវ៉ាស៊ិនតោន ដែលពេលនេះមានអ្នកបាត់បង់ជីវិត១១នាក់។
ការព្រួយបារម្ភមានការកើនឡើងកាលពីថ្ងៃទី៧មីនា ក្នុងចំណោមពួកអ្នកដំណើរដែលជាប់ក្នុងនាវាកម្សាន្តមួយ ក្នុងដែនទឹករដ្ឋកាលីហ្វ័រនីញ៉ា បន្ទាប់ពីមានការអះអាងពីអ្នកដែលឆ្លងវីរុសនេះ ខណៈរដ្ឋញូវយ៉កក៏ប្រកាសអាសន្នដែរ ដើម្បីជម្រុញការតស៊ូប្រឆាំងវីរុស។
ក្នុងនាវាកម្សាន្តនោះគេរកឃើញមនុស្ស២១នាក់ឆ្លងវីរុស។ នាវាGRAND PRINCESSនេះ ដែលចាកចេញពីសាន់ហ្វ្រាន់ស៊ីស្កូ ហើយត្រូវបកក្រោយវិញបានផ្អាកដំណើរ ក្រោយរកឃើញសញ្ញានៃការឆ្លងលើមនុស្សមួយចំនួន ក្នុងចំណោមអ្នកដំណើរនិងសមាជិកក្រុមនាវិកទាំង៣.៥៣៣នាក់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ