រាជធានីភ្នំពេញ ៖ មន្ដ្រីជលផលបាន បង្កើនការការពារធនធានជលផលយ៉ាងតឹងរ៉ឹង និងជំរុញឱ្យប្រជាពលរដ្ឋធ្វើវារីវប្បកម្ម គឺការចិញ្ចឹមត្រីតាមស្រះនិងតាមស្រែ ឬតាមមធ្យោបាយផ្សេងៗឱ្យបានច្រើន ដើម្បីជួយផ្គត់ផ្គង់ផលត្រីដែលអាចខ្វះខាត ចំពោះតម្រូវការរបស់ប្រជាជន ដែលបណ្ដាលមកពីកម្រិតទឹកទន្លេមេគង្គឆ្នាំនេះ កំពុងតែមានកម្រិតទាបនិងអាចធ្វើឱ្យផលត្រីទឹកសាបថយចុះ ក្នុងកម្រិតមួយគួរឱ្យព្រួយបារម្ភ នៅរដូវនេសាទខាងមុខនេះ ។
តាមសេចក្ដីប្រកាសព័ត៌មានកាលពីថ្ងៃទី ២៦ ខែកុម្ភៈ របស់គណៈកម្មការទន្លេមេគង្គ ដែលមានទីស្នាក់ការបច្ចុប្បន្ននៅប្រទេសឡាវនោះបានឱ្យដឹងថា កំពស់ទឹកទន្លេមេគង្គ ទាបជាងធម្មតា បើប្រៀបធៀបកាលពីខែកុម្ភៈឆ្នាំមុន គឺកំពស់ទឹកទាបជាងពាក់កណ្ដាល ។
បើតាមកម្រិតទឹកនៅស្ថានីយស្ទង់ទឹក ទន្លេចតុមុខកាលពីខែកក្កដា ឆ្នាំ២០០៩ មានកំពស់ជិត៦ម៉ែត្រ ប៉ុន្ដែក្នុងរយៈពេលដូចគ្នា នៅឆ្នាំ២០១០នេះ ទឹកមានកំពស់តែ២,៨០ ម៉ែត្រប៉ុណ្ណោះ ។ លោកណៅ ធួក ប្រតិភូរាជរដ្ឋាភិបាល កម្ពុជាទទួលបន្ទុកជាប្រធានរដ្ឋបាលជលផលបានមានប្រសាសន៍ប្រាប់កោះសន្ដិភាព កាលពីថ្ងៃពុធទី២១ ខែកក្កដាថា មន្ដ្រីរដ្ឋបាលជលផលកំពុងតែអនុវត្ដយ៉ាងម៉ត់ចត់ តាមអនុសាសន៍របស់សម្ដេចអគ្គមហាសេនាបតីតេជោហ៊ុន សែន ប្រមុខរាជរដ្ឋាភិបាល ដែលបានចង្អុលបង្ហាញធ្វើឱ្យមានការបង្ក្រាបបទល្មើសនេសាទខុសច្បាប់ផ្សេងៗបានរហូតដល់ជាង៩៥% ។ លោកមានប្រសាសន៍បន្ដទៀតថា ដើម្បីបង្កើនផលត្រី រដ្ឋាភិបាលបានជំរុញឱ្យមាន ការការពារធនធានជលផល ការរៀបចំអភិរក្សនៅកន្លែងនេសាទសហគមន៍ ការរៀបចំស្រះជំរកត្រីរបស់សហគមន៍ កន្លែងវាលស្រែ ហើយមានគោលការណ៍ក្នុងមួយឃុំមួយកន្លែង ប៉ុន្ដែឥឡូវរៀបចំបានចំនួន៣៤៨កន្លែងហើយ។
ជាមួយនេះជំរុញឱ្យលែងកូនត្រីឱ្យបានច្រើនក្នុងពិធីស្មារតីទិវាមច្ឆជាតិ១ កក្កដា ឱ្យបានគ្រប់សង្កាត់ គ្រប់ខេត្ដ ក្រុង ទូទាំងប្រទេស ប៉ុន្ដែមកដល់ពេលនេះធ្វើបានជាមធ្យម២០០កន្លែង និងជាពិសេសជំរុញឱ្យប្រជាពលរដ្ឋធ្វើវារីវប្បកម្មគឺការចិញ្ចឹមត្រី តាមទន្លេ តាមអាងធារាសាស្ដ្រ និងតាមស្រះ ជាដើម ។ ម្យ៉ាងទៀត ខាងមន្ដ្រីជលផលនឹង គ្រោងភ្ញាស់កូនត្រីចំនួន១.០០០.០០០(មួយលាន)ក្បាលទៀត ។ ទាក់ទងបញ្ហាខាងលើថ្មីៗនេះ សម្ដេច តេជោហ៊ុន សែន នាយករដ្ឋមន្ដ្រីក៏បានចេញ បញ្ជាឱ្យបំផ្លាញអាងស្ដុកទឹកមួយចំនួននៅ តាមអាងទន្លេសាប ដែលអាចប៉ះពាល់ដល់ កន្លែងត្រីសំរាប់ពងនិងកូនផងដែរ ។ លោកណៅ ធួក បានមានប្រសាសន៍ បន្ថែមទៀតថា ក្នុងការជំរុញឱ្យប្រជាពលរដ្ឋចិញ្ចឹមត្រីនេះផងដែរ រដ្ឋាភិបាលបានបង្រៀន ពីរបៀបភ្ញាស់កូនត្រី របៀបបរៀបចំស្រះ របៀបថែរក្សា និងបំប៉នកូនត្រី ថែមទាំងផ្ដល់ឯកសារផ្សេងៗសំរាប់ណែនាំក្នុងការចិញ្ចឹមត្រី អន្ទង់ និងបង្កងទៀតផង ។
លោកប៊ុត ឈឹម កសិករចិញ្ចឹមត្រី និងភ្ញាស់ត្រីនៅភូមិសំរោងជ្រៃ ឃុំតាំងដូង ស្រុកបាទី ខេត្ដតាកែវ បាននិយាយថា លោកបាន ចិញ្ចឹមត្រីតាំងពីឆ្នាំ២០០៧មកម្ល៉េះ ដោយមានការជួយជ្រោមជ្រែងពីក្រសួងកសិកម្ម ដែលបានផ្ដល់ជាកូនត្រីដល់គាត់ចំនួន២០០០ ក្បាល ថ្នាំសំរាប់ចាក់ការពារកូនត្រី និងបង្ហាត់បង្រៀនពីបច្ចេកទេសចិញ្ចឹមល្អៗដល់គាត់ទៀតផង ។ លោកប៊ុត ឈឹម បានបន្ដទៀតថា ការចិញ្ចឹមត្រីរបស់គាត់មានជាច្រើនប្រភេទដូចជា ត្រីឡាបយ៉ា, ឆ្ពិន, កាបសាមញ្ញ, កាបស និងត្រីកាបឥណ្ឌាជាដើម ។ ការចិញ្ចឹមនេះ សព្វថ្ងៃកំពុងតែទទួលបានជោគជ័យដែល ក្នុងមួយឆ្នាំៗគាត់លក់បានរាប់ម៉ឺនក្បាល ដោយឡែកក្នុងឆ្នាំនេះគាត់កត់សំគាល់ឃើញថា ប្រជាពលរដ្ឋបានមកទិញកូនត្រីច្រើនជាងឆ្នាំមុន បើប្រៀបធៀបក្នុងឆមាសទី១ ឆ្នាំ២០១០នេះ ។
លោកក៏បានបញ្ជាក់ដូច្នេះថា “ការចិញ្ចឹមត្រីផ្ដល់អត្ថប្រយោជន៍យ៉ាងច្រើនដល់គ្រួសារខ្ញុំ ហើយវាមិនត្រឹមតែបានត្រីសំរាប់បរិភោគ ទេ ថែមទាំងឱ្យខ្ញុំរកប្រាក់ចំណូលបានច្រើនក្នុងការផ្គត់ផ្គង់ជីវភាព” ។ ទោះជាយ៉ាងនេះក្ដី មន្ដ្រីរាជការ និងសង្គមស៊ីវិលមួយចំនួនបានបង្ហាញថា ការបង្កើនអាជីវកម្មចិញ្ចឹមត្រីក្នុងរយៈពេលនេះ មិនទាន់អាចឆ្លើយតបបានចំពោះតម្រូវការ ទីផ្សារនោះទេ ពីព្រោះកាលពីឆ្នាំកន្លងទៅ កម្ពុជាប្រមូលផលត្រីទាំងទឹកសាបនិង ទឹកប្រៃបានប្រហែលជាង៥១៥ពាន់តោន ៕
ចែករំលែកព័តមាននេះ