ប្រទេសបារាំង ៖ ការឆ្លងរាលដាលនៃវីរុសCOVID-19បន្តកាន់តែខ្លាំងនៅបារាំង ដោយនាថ្ងៃទី៥មីនាតែមួយគត់ មានអ្នកឆ្លងថ្មីដល់ទៅ១៣៨នាក់ នាំឲ្យចំនួនសរុបនៃអ្នកឆ្លងឡើងដល់៤២៣នាក់។
អគ្គនាយកសុខាភិបាលបារាំង លោកJEROME SALOMONគូសបញ្ជាក់ថា នេះជាការកើនឡើងដ៏ខ្លាំងនៃចំនួនអ្នកឆ្លងព្រមទាំងអ្នកបាត់បង់ជីវិត ក្នុងពេលតែ១ថ្ងៃចាប់តាំងពីមានវិបត្តិវីរុសនេះមក។ មានអ្នកបាត់បង់ជីវិតថ្មី៣នាក់ត្រូវបានរាយការណ៍ នាំឲ្យចំនួនអ្នកបាត់បង់ជីវិត សរុបឡើងដល់៧នាក់។ ក្នុងចំណោមអ្នកជំងឺ ២៣នាក់ស្ថិតក្នុងសភាពធ្ងន់ធ្ងរ។
ចំណែកសភាបារាំងប្រកាសកាលពីយប់ថ្ងៃទី៥មីនាថា សមាជិកសភាមួយរូបនៃតំបន់HAUT RHIN ក៏បានឆ្លងវីរុសនេះដែររួមជាមួយបុគ្គលិកម្នាក់នៃរដ្ឋសភា។ តាមកាសែតបារាំងL’ALSACEថា សមាជិកសភារូបនោះលោកJEAN LUC REITZER ត្រូវបញ្ជូនមកកាន់មន្ទីរពេទ្យស្ថិតក្នុងស្ថានភាពធ្ងន់ធ្ងរ។ បុគ្គលិកក្នុងសភាដែលឆ្លងដែរ ក្រោយពីឲ្យចេញពីពេទ្យត្រូវដាក់ឲ្យនៅក្នុងផ្ទះដាច់ពីគេ។
ភាគច្រើននៃមនុស្សដែលទើបឆ្លងថ្មី ជាអ្នកដែលទៅចូលរួមក្នុងការប្រមូលផ្ដុំគ្នាច្រើន បែបសាសនាអេវង់ហ្សេលិកមួយនៅក្រុងMULHOUSEរវាងថ្ងៃទី១៧មក២៤កុម្ភៈ។
ចំណែកប្រទេសអង់គ្លេសទើបប្រកាសនាថ្ងៃទី៥មីនា ពីមនុស្សដំបូងដែលបាត់បង់ជីវិតដោយសារវីរុសនោះក្នុងដែនដីខ្លួន។ អ្នកស្លាប់ជាអ្នកជំងឺមានវ័យចំណាស់ដែលមានបញ្ហាសុខភាពស្រាប់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ