ប្រទេសកូរ៉េខាងត្បូង ៖ អាជ្ញាធរសុខាភិបាលកូរ៉េខាងត្បូងគូសបញ្ជាក់នាថ្ងៃទី៦មីនាថា វីរុសCOVID-19បានឆ្លងដល់មនុស្ស៥១៨នាក់ថ្មីទៀត នាំឲ្យចំនួននៃអ្នកឆ្លងសរុបក្នុងប្រទេសនេះឡើងដល់៦.២៨៤នាក់។
ក្នុងសេចក្ដីរាយការណ៍ប្រចាំថ្ងៃ មជ្ឈមណ្ឌលត្រួតពិនិត្យនិងបង្ការជំងឺកូរ៉េខាងត្បូង រៀបរាប់ពីអ្នកស្លាប់ថ្មី៧នាក់ទៀត នាំឲ្យចំនួនអ្នកបាត់បង់ជីវិតដោយសារវីរុសនេះឡើងដល់៤២នាក់។ ភាគច្រើននៃអ្នកឆ្លងវីរុសនេះគឺនៅតែទីក្រុងDAEGU។
នាថ្ងៃទី៥មីនាវិមានប្រធានាធិបតីកូរ៉េខាងត្បូងឲ្យដឹងថា មេដឹកនាំកូរ៉េខាងជើងលោកគីមជុងអ៊ុន ទើបបានផ្ញើរសារលិខិតផ្ទាល់ខ្លួនមួយច្បាប់ ជូនចំពោះលោកប្រធានាធិបតីMOON JAE INដើម្បីសម្ដែងការគាំទ្ររបស់លោកចំពោះកូរ៉េខាងត្បូង ក្នុងការជម្នះការឆ្លងរាលដាលនៃវីរុសដ៏សាហាវនេះ។
ក្នុងលិខិតនោះលោកគីមជុងអ៊ុនសេសេរថា លោកមានជំនឿជាក់ ដែលកូរ៉េខាងត្បូងនឹងជម្នះបានលើសភាពការណ៍នេះ និងសូមឲ្យកូរ៉េខាងត្បូងមានសុខភាពល្អ។ មេដឹកនាំកូរ៉េខាងជើងថ្លែងថា លោកគាំទ្រដោយស្ងៀមស្ងាត់ ការតស៊ូរបស់កូរ៉េខាងត្បូងប្រឆាំងវីរុសCOVID-19 និងសម្ដែងមិត្តភាពព្រមទាំងទំនុកចិត្តចំពោះលោកMOON។ លោកMOONបានបញ្ជូនលិខិតតបវិញ ដោយថ្លែងអំណរគុណចំពោះមេដឹកនាំកូរ៉េខាងជើងដែលសម្ដែងសាមគ្គីភាព៕ ដកស្រង់ចេញពីវេបសាយ ៖ yna (កែសម្រួលដោយ ៖ បុប្ផា)
ចែករំលែកព័តមាននេះ