សហរដេ្ឋអាមេរិក ៖ សភាអាមរិកបានអនុម័តកាលពីថ្ងៃទី៥មីនា ផែនការបន្ទាន់មួយ មានទឹកប្រាក់៨,៣ពាន់លានដុល្លារ សម្រាប់ផ្គត់ផ្គង់ដល់ការតស៊ូប្រឆាំងវីរុសCOVID-19 ដែលកំពុងឆ្លងរាលដាល នៅសហរដ្ឋអាមេរិក ខណៈដែលកំពុងមានការសង្ស័យលើការឆ្លងវីរុសនេះ ក្នុងនាវាកម្សាន្តមួយនៅដែនទឹកក្រុងសាន់ហ្វ្រាន់ស៊ីស្កូ។…
សហរដេ្ឋអាមេរិក ៖ សភាអាមរិកបានអនុម័តកាលពីថ្ងៃទី៥មីនា ផែនការបន្ទាន់មួយ មានទឹកប្រាក់៨,៣ពាន់លានដុល្លារ សម្រាប់ផ្គត់ផ្គង់ដល់ការតស៊ូប្រឆាំងវីរុសCOVID-19 ដែលកំពុងឆ្លងរាលដាល នៅសហរដ្ឋអាមេរិក ខណៈដែលកំពុងមានការសង្ស័យលើការឆ្លងវីរុសនេះ ក្នុងនាវាកម្សាន្តមួយនៅដែនទឹកក្រុងសាន់ហ្វ្រាន់ស៊ីស្កូ។
ព្រឹទ្ធសភាអាមេរិកក៏បានបោះឆ្នោតស្ទើរតែជាឯកច្ឆ័ន្ទ មានតែមួយសំឡេងប្រឆាំងគាំទ្រដល់ការបញ្ចេញប្រាក់នេះ។ ប្រធានាធិបតីអាមេរិកលោកដូណាល់ត្រាំ បានស្នើថវិកាដំបូង២,៥ពាន់លានដុល្លារ ដែលពួកប្រឆាំងនៃគណបក្សប្រជាធិបតេយ្យលើកឡើងថា គ្រប់គ្រាន់ដើម្បីប្រឈមមុខនឹងការឆ្លងរាលដាលនៃវីរុសនេះ។
ព្រឹទ្ធសមាជិកនៃគណបក្សប្រជាធិបតេយ្យលោកPATRICK LEAHYអះអាងថា ផែនការនោះគឺសំដៅកែលម្អសកម្មភាពរបស់រដ្ឋអំណាចសាធារណៈ ក្នុងការបង្ការ រៀបចំនិងឆ្លើយតបចំពោះការឆ្លង។ ផែនការនោះគ្រោងជាពិសេសផ្គត់ផ្គង់ប្រាក់ដល់ការស្រាវជ្រាវ និងការផលិតវ៉ាក់សាំង ការព្យាបាលនិងលើការពិនិត្យព្រមទាំងជួយដល់បណ្ដាសេវាកម្មសុខាភិបាលពីចម្ងាយ ឬផ្ដល់ជាប្រាក់កម្ចីមានការប្រាក់ទាបសម្រាប់បណ្ដាសហគ្រាសធុនតូច។
ការបោះឆ្នោតអនុម័តនេះ កើតមានខណៈសហជីពគិលានុប្បដ្ឋាករបស់ប្រទេស បានបរិហារពីការមិនបានប្រុងប្រៀបរៀបចំខ្លួនទុកមុន ព្រមទាំងពីការខ្វះបណ្ដាឧបករណ៍ការពារ និងការបណ្ដុះបណ្ដាលវិជ្ជាជីវៈ ដល់បណ្ដាបុគ្គលិកសុខាភិបាល ក្នុងមន្ទីរពេទ្យនិងគ្លីនិកជាច្រើន។ សហជីពរិះគន់ម្យ៉ាងទៀតចំពោះការគ្រប់គ្រងការឆ្លង របស់អាជ្ញាធរសហព័ន្ធដែលមានការយឺតយ៉ាវនិងមិនសូវស្ទុះស្ទារ។
មនុស្សជាង១៨០នាក់ហើ់យបានឆ្លងវីរុសនៅសហរដ្ឋអាមេរិក ក្នុងនោះយ៉ាងតិច១២នាក់បាត់បង់ជីវិត។ រដ្ឋវ៉ាស៊ិនតោនជារដ្ឋដែលរងការប៉ះពាល់ខ្លាំងជាងគេ ជាមួយមនុស្សបាត់បង់ជីវិត១១នាក់និងអ្នកឆ្លងជាង៧០នាក់។ ក្នុងតំបន់ក្រុងSEATTLEជាទីក្រុងធំជាងគេរបស់រដ្ឋនេះ បណ្ដាក្រុមហ៊ុនយក្សដូចជាAMAZON MICROSOFT GOOGLE និង FACEBOOKបានស្នើដល់បណ្ដានិយោជិតពួកគេ ឲ្យធ្វើការប្រសិនបើអាចទៅរួចពីផ្ទះរបស់ខ្លួន ក្នុងបណ្ដាសប្ដាហ៍ខាងមុខ។
ក្រុមហ៊ុនធំៗមួយចំនួនបានរិតត្បិតការធ្វើដំណើរទៅកាន់រដ្ឋវ៉ាស៊ិនតោនឬកាលីហ្វ័រនីញ៉ាដែលនៅទីនោះទើបមានអ្នកបាត់បង់ជីវិតដំបូងម្នាក់។ អាជ្ញាធរអាមេរិកប្រកាសថាវីរុសបន្តឆ្លងរាលដាល ក្នុងប្រទេសជាមួយអ្នកឆ្លងដំបូងម្នាក់នៅរដ្ឋកូឡូរ៉ាដូ និង៣នាក់ក្នុងរដ្ឋតូចម៉ារីឡែន កៀករដ្ឋធានីសហព័ន្ធក្រុងវ៉ាស៊ិនតោន។
អាជ្ញាធរសុខាភិបាលអាមេរិក នាថ្ងៃទី៥មីនាបានធ្វើតេស្តរកអ្នកឆ្លង ក្នុងនាវាកម្សាន្តមួយគ្រឿង ដែលនៅក្នុងនាវានោះមានករណីអ្នកសង្ស័យឆ្លងវីរុស៣៥នាក់។ នាវានេះត្រូវបានឃាត់ទុកនាថ្ងៃទី៥មីនា នៅកន្លែងមួយចម្ងាយប្រមាណជា១០០គីឡូម៉ែត្រ ក្នុងដែនទឹកនៃឆ្នេរសមុទ្ររដ្ឋកាលីហ្វ័រនីញ៉ា។
នាវាGRAND PRINCESSនោះ បានវិលមកកាន់ក្រុងសាន់ហ្វ្រាន់ស៊ីស្កូវិញ ក្រោយការរកឃើញរោគសញ្ញា ក្នុងខ្លួនអ្នកដំណើរនិងសមាជិកក្រុមនាវិកមួយចំនួន ក្នុងចំណោមអ្នកដំណើរនិងសមាជិកក្រុមនាវិកនៃនាវានោះប្រមាណជា៣.៤៨៣នាក់។ បុរសអាយុ៧១ឆ្នាំម្នាក់ដែលធ្វើដំណើរតាមនាវានេះបានបាត់បង់ជីវិត ដោយសារវីរុសCOVID-19 ពេលត្រឡប់មកដល់ទីក្រុងសាក្រាមេនតូ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ