ខេត្តបាត់ដំបង ៖ យោងតាមសមត្ថកិច្ចបានឱ្យដឹងថា ជនដៃដល់ដែលគាស់ទ្វារផ្ទះស្ត្រីម្នាក់ចូលលួចលុយនិងគ្រឿងអលង្ការអស់យ៉ាងច្រើនសន្ធឹលសន្ធាប់ នៅចំកណ្ដាលក្រុងបាត់ដំបង គឺជាក្មួយប្រុសរបស់ស្ត្រីរងគ្រោះ ។ នេះបើយោងលើរូបភាពជនសង្ស័យ ដែលបន្សល់ទុកនៅក្នុងកាម៉េរ៉ាសុវត្ថិភាព ដែលមន្ត្រីជំនាញឆែករកឃើញ។…
ខេត្តបាត់ដំបង ៖ យោងតាមសមត្ថកិច្ចបានឱ្យដឹងថា ជនដៃដល់ដែលគាស់ទ្វារផ្ទះស្ត្រីម្នាក់ចូលលួចលុយនិងគ្រឿងអលង្ការអស់យ៉ាងច្រើនសន្ធឹលសន្ធាប់ នៅចំកណ្ដាលក្រុងបាត់ដំបង គឺជាក្មួយប្រុសរបស់ស្ត្រីរងគ្រោះ ។ នេះបើយោងលើរូបភាពជនសង្ស័យ ដែលបន្សល់ទុកនៅក្នុងកាម៉េរ៉ាសុវត្ថិភាព ដែលមន្ត្រីជំនាញឆែករកឃើញ។ គួររំលឹកថា៖ ចោរគាស់ផ្ទះទាំងថ្ងៃ ហើយនៅចំកណ្ដាលក្រុងបាត់ដំបងទៀត
សមត្ថកិច្ចមិនទាន់បង្ហាញមុខនិងអត្តសញ្ញាណជនសង្ស័យរូបនោះទេ តែត្រូវគេសង្ស័យថា ជាក្មួយម្ចាស់ផ្ទះរងគ្រោះ ។ លោកឧត្តមសេនីយ៍ត្រី ជេត វណ្ណនី ស្នងការរងខេត្តបានមានប្រសាសន៍ថា ដំបូងយើងមិនទាន់វាយតំលៃបែបណាទៅលើបទល្មើសនោះទេ។ ប៉ុន្តែក្រោយពីមន្ត្រីជំនាញឆែកឆេរមើលក្នុងកាម៉េរ៉ាសុវត្ថិភាព ទើបដឹងថា ជនដៃដល់ដែលធ្វើសកម្មភាពគាស់ផ្ទះជនរងគ្រោះ គឺជាក្មួយរបស់ខ្លួន ហើយជនរងគ្រោះក៏អះអាងបែបនេះដែរ។
សូមបញ្ជាក់ថា ជនមិនស្គាល់មុខ(ចោរ) បានធ្វើសកម្មភាពគាស់ទ្វារផ្ទះស្ត្រីម្នាក់ឈ្មោះ ទាវ ចិនហ៊ន ភេទស្រីអាយ៦៧ឆ្នាំ ដែលនៅខាងលិចផ្សារណាត់ប្រហែល១០០ម៉ែត្រ ស្ថិតក្នុងភូមិ២០ឧសភា សង្កាត់ស្វាយប៉ោ ក្រុងបាត់ដំបង ដែលគាត់អះអាងថា បានកើតឡើងនៅអំឡុងម៉ោង៣រសៀលថ្ងៃទី០៤ មីនា ខណៈដែលគាត់ចេញទៅផ្សារផុត ។ ស្ត្រីរងគ្រោះបានអះអាងប្រាប់សមត្ថកិច្ចថា ចោរបានគាស់បំបែកសោរទ្វារខាងក្រោយ រួចចូលទៅខាងក្នុងគាស់ទូរើកកាយលួចយកលុយ និងគ្រឿងអលង្ការអស់គ្មានសល់ ។ គាត់បានបញ្ជាក់ថា ចោរបានគាស់ទ្វារចូលលួចទ្រព្យសម្បត្តិគាត់ នៅពេលគាត់ចេញទៅផ្សារបាត់ រីឯកូនៗគាត់រវល់ចេញទៅបង្រៀន ។ លុះគាត់ត្រឡប់មកពីផ្សារវិញ ចូលដល់ក្នុងផ្ទះឃើញស្នាមរើកកាយពាសពេញផ្ទះបាត់លុយ និងគ្រឿងអលង្ការអស់គ្មានសល់ ទើបមានការភ្ញាក់ផ្អើលតែម្ដង។
ជាមួយនឹងអំពើចោរកម្មនេះ បើតាមព័ត៌មានបឋមដែល ម្ចាស់ផ្ទះឈ្មោះ ទាវ ចិនហ៊ន បានរាយការណ៍ប្រាប់សមត្ថកិច្ចថា ទ្រព្យសម្បត្តិគាត់ដែលបានបាត់បង់ រួមមាន ប្រាក់ខ្មែរចំនួន១០៣លានរៀល, ប្រាក់ដុល្លារចំនួន១៨,០០០ដុល្លាអាមេរិក, ប្រាក់អឺរ៉ូចំនួន៤,០០០អឺរ៉ូ, ប្រាក់ថៃចំនួន៣ម៉ឺនបាត និងមានគ្រឿងអល័ង្ការមួយចំនួនទៀត ដែលជារបស់បងប្អូននៅសហរដ្ឋអាមេរិកផ្ញើទុក ។
ដំបូងសមត្ថកិច្ច ហាក់មិនទាន់ហ៊ានធ្វើការសន្និដ្ឋានបែបណានៅឡើយទេ។ ព្រោះពេលនេះ មន្ត្រីជំនាញបច្ចេកទេសកំពុងធ្វើការពិនិត្យកន្លែងកើតហេតុ រីឯមន្ត្រីជំនាញព្រហ្មទណ្ឌកំពុងសាកសួរព័ត៌មានលំអិតពីម្ចាស់ផ្ទះ។ ប៉ុន្តែក្រោយពីធ្វើការស្រាវជ្រាវអស់រយ:មួយកំណាត់ថ្ងៃ នៅថ្ងៃទី០៥ មីនា នេះ ទើបមន្ត្រីជំនាញសម្រេចធ្វើការសន្និដ្ឋានជំហានដំបូងថា ជនដៃដល់ដែលគាស់កំទេចទ្វារផ្ទះចូលលួចទ្រព្យសម្បត្តិស្ត្រីរងគ្រោះខាងលើនេះ អាចជាក្មូយប្រុសរបស់ខ្លួន ដោយយោងលើរូបភាពយ៉ាងច្បាស់ក្រឡែតនៅក្នុងកាមេរ៉ាសុវត្ថិភាព។
លោកឧត្តមសេនីយ៍ត្រី ជេត វណ្ណនី ស្នងការរងខេត្តបានបញ្ជាក់ថា ពេលនេះ យើងអាចកំណត់មុខសញ្ញាជនសង្ស័យបាមហើយ តែស្របពេលជាមួយគ្នានេះ ជនសង្ស័យទំនងជាដឹងខ្លួនមុន ហើយបានរត់គេចខ្លួនបាត់ពីផ្ទះរហូតក្រោយប្រព្រឹត្តបទល្មើស។ ប៉ុន្តែយ៉ាងណាក៏ដោយពេលនេះ កម្លាំងជំនាញបាននិងកំពុងតាមស្វែងរកចាប់ខ្លួន មុខសញ្ញាដែលកំពុងស្ពាយលុយរាប់ម៉ឺនដុល្លារ និងរាប់រយលានរៀលរត់គេចខ្លួននោះហើយ។
ចែករំលែកព័តមាននេះ