ខេត្តកំពង់ឆ្នាំង ៖ ក្រុមអាជីវករជាង១០០នាក់បានផ្ទុះការតវ៉ាជាថ្មីម្ដងទៀត ដោយបាននាំគ្នាមកកាន់មុខសាលាខេត្តកំពង់ឆ្នាំង នៅព្រឹកថ្ងៃទី០៥ មីនា ដើម្បីទាមទារនិងសំណូមពរឲ្យអាជ្ញាធរខេត្តជួយដោះស្រាយខណៈដែលរដ្ឋបាលសាលាក្រុងកំពង់ឆ្នាំងបានដាក់កំណត់ឱសានវាទ ត្រឹមថ្ងៃទី១០ មីនា ឱ្យពួកគាត់ជាអាជីវករលក់ដូរតាមដើមស្រល់នៅមុខផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ត្រូវចាកចេញឱ្យអស់ បើពុំនោះទេ នឹងត្រូវប្រឈមចំពោះមុខច្បាប់ ។
ក្រុមអាជីវករទាំងនោះ បានលើកឡើងថា ពួកគាត់មានចំនួន១៩៣តូប លក់ដូរនៅតាមដើមស្រល់មុខផ្សារឆ្នាំង ដែលបានប្រកបមុខរបរនេះ ជាយូរយាណាស់មកហើយ ។ ប៉ុន្តែថ្មីៗនេះ អាជ្ញាធរក្រុងកំពង់ឆ្នាំងបានធ្វើលិខិតជូនដំណឹងទៅកាន់ពួកគាត់ ដោយឲ្យពួកគាត់ចាកចេញពីកន្លែងលក់ដូរ នៅជួលដើមស្រល់ នឹងត្រូវទៅលក់នៅទីតាំងផ្សារថ្មី ជាកន្លែងអភិវឌ្ឍចុងកោះវិញ ព្រមទាំងកំណត់ជាកំហិត ត្រឹមថ្ងៃទី១០ មីនា ហើយបើមាននរណារឹងទទឹងអាជ្ញាធរ នឹងចាត់វិធានការតាមផ្លូវច្បាប់ ។
ជុំវិញបញ្ហានេះ ពួកគាត់បានបញ្ជាក់ថា ពួកគាត់មិនអាចចាកចេញពីកន្លែងលក់ដូរចាស់នេះបានទេ ហេតុផលទី១ គឺផ្លូវទៅកាន់កន្លែងថ្មីនៅមិនទាន់អភិវឌ្ឍនៅឡើយ ពេលខែទឹកឡើងគឺជាផ្លូវលិចទឹកពួកគាត់ត្រូវធ្វើដំណើរវាងជិះម៉ូតូឌុបតម្លៃ៥ពាន់រៀលទៅមកថ្លៃ១ម៉ឺនរៀល អ្នកអាជីវករតូចតាចធម្មតា គ្មានលទ្ធភាពទេ ។ ទី២-នៅទីប្រជុំជនផ្សារថ្មី នៅមិនទាន់មានការអភិវឌ្ឍនឹងមានការប្រមូលផ្ដុំមនុស្សនៅឡើយ ។ ទី៣ គឺមិនទាន់មានកំពង់ផែលើកដាក់ទំនិញទៅកាន់ទីផ្សារថ្មីនៅឡើយដែរ ។
ហេតុនេះហើយ ពួកគាត់ជាអាជីវករសំណូមពរឲ្យអាជ្ញាធរក្រុង-ខេត្ត មេត្តាធ្វើផ្លូវឱ្យបានហើយជាមុនសិន និងត្រូវមានទីប្រជុំជនឱ្យបានសមស្រប ព្រមទាំងរុញកំពង់ផែពីដើមសល់ទៅទីនោះឲ្យអស់ ព្រមជាមួយគ្នានេះអាជីវករ ទាំងអស់ត្រូវទៅលក់នៅទីនោះទាំងអស់គ្នាដែរទើបពួកគាត់ព្រមទៅ ។ ការតវ៉ារយៈពេលប្រមាណជាងមួយម៉ោងក្រោយមកគេឃើញលោក យិនសាវ៉េន អភិបាលក្រុងកំពង់ឆ្នាំងបានទៅជួបក្រុមអាជីវករទាំងនោះនឹងបានទទួលយកសំណូមពរព្រមទាំងបានមានប្រសាសន៍ទៅកាន់ក្រុមអាជីវករថា ពេលនេះអាជ្ញាធរក្រុងព្រមទទួលយកសំណើបងប្អូន ហើយបងប្អូនអាចបន្តលក់ដូរលើសពីថ្ងៃទី ១០ មីនានេះបានបន្តទៀត ព្រោះមិនទាន់មានលទ្ធភាព។
ប៉ុន្តែបងប្អូនត្រូវទៅទាក់ទងជាមួយក្រុមហ៊ុនផ្សារថ្មី ដើម្បីចុះឈ្មោះចូលទៅកាន់ទីលក់ដូរកន្លែងថ្មីសិន។ ចំពោះសំណូមពរបងប្អូនប្រជាពលរដ្ឋអាជ្ញាធរនឹងយកទៅពិភាក្សាជាមួយថ្នាក់ខេត្តបន្តទៀត ។ យ៉ាងនេះក្តីមុនពេលចាកចេញត្រឡប់ទៅវិញក្រុមអាជីវករនៅបានបញ្ជាក់ចំពោះអ្នកសារព័ត៌មានថា ការបង្ខំឲ្យពួកគាត់ទាក់ទងនឹងក្រុមហ៊ុនសារថ្មីមិនកើតទេ ព្រោះតែបងប្អូនលក់ដូរនៅទីនេះគឺជាដីរបស់រដ្ឋគ្មានការបង់ប្រាក់ឡើយចំណែកឯងទៅកាន់កន្លែងថ្មីអាជីវករត្រូវបង់ប្រាក់ផ្សារថ្មីចាប់ពី 300 ទៅ 900 ដុល្លា មួយកន្លែង ក្នុងរយៈពេល៥ឆ្នាំ ហេតុនេះហើយ បើលក់ដូរមិនដាច់គ្មានប្រាក់ឯណាបង់ឲ្យគេនោះឡើយ។ពួកគាត់បានបញ្ជាក់ថាការបង្ខំឲ្យពួកគាត់ទៅកាន់កន្លែងថ្មីដូចជាផ្តាច់បាយរបស់ពួកគាត់យ៉ាងដូច្នោះដែរ ៕
ចែករំលែកព័តមាននេះ