រាជធានីភ្នំពេញ ៖អតីតារាចម្រៀងវ៉ាន់ នីឡា បានប្រកាសជំហរចង់ស្រោចស្រង់អាជីពចម្រៀងរបស់ខ្លួនឡើងវិញ បន្ទាប់ពីខកខានជាច្រើនឆ្នាំ ក្រោយបែកធ្លាយរឿងអាស្រូវនិងក្តីក្តាំងនៅតុលាការ ។ អតីតារាចម្រៀងផលិតកម្មភ្លេងរីខតដែលជាឧបសម្ព័ន្ធផលិតកម្មហង្សមាសរូបនេះបានចាត់ទុកការច្រៀង គឺជាផ្នែកមួយនៃជីវិតរបស់នាង បើទោះបីជាពេលនេះនាងនៅមិនទាន់មានភាពក្លាហានកាន់ក្បាលមេក្រូច្រៀងតាមឆាកតន្ត្រីជាសាធារណៈឡើងវិញក្តី ។
វ៉ាន់ នីឡា បានបង្ហោះតាមហ្វេសប៊ុក ថ្មីៗនេះថា «អ្នកទាំងអស់គ្នាប្រហែលជាមិនដឹងទេថា ការច្រៀងគឺជាចំណែកមួយនៃជីវិតរបស់ខ្ញុំ។ ខ្ញុំពិតជាចង់ស្រោចស្រង់ក្តីស្រមៃរបស់ខ្ញុំមួយនេះត្រលប់មកវិញ ហើយបើសិនជាខ្ញុំមានឱកាសត្រលប់រកអាជីពរបស់ខ្ញុំម្តងទៀត ខ្ញុំនឹងខំប្រឹងប្រែងឲ្យកាន់តែល្អជាងមុន »។
ការអះអាងរបស់ វ៉ាន់ នីឡា នាពេលនេះបានធ្វើឡើងបន្ទាប់ពីបងប្រុសរបស់ខ្លួនលោកសុខ ជំនោរ ធ្លាប់បាននិយាយថា លោកបានរៀបចំបទចម្រៀង និងផលិតកម្មរួចជាស្រេចដើម្បីការវិលមកច្រៀងឡើងវិញរបស់ប្អូនស្រីខ្លួន ។ បើទោះបីជាការបញ្ជាក់ថា លោកបានរៀបចំរួចជាស្រេចសម្រាប់វ៉ាន់ នីឡា ក៏ដោយ ក៏លោក សុខ ជំនោរ នៅមិនទាន់បញ្ចេញឲ្យដឹងទេថា តារាចម្រៀងរូបនេះនឹងច្រៀងក្នុងផលិតកម្មណាមួយនោះ ប៉ុន្តែលោកគ្រាន់តែអះអាងថា ប្អូនស្រីរបស់លោកនឹងច្រៀងក្នុងផលិតកម្មថ្មី ពោលមិនមែនផលិតកម្មចាស់របស់នាងឡើយ ខណៈពេលដែលការច្រៀងក៏ត្រូវបានរៀបចំជាលក្ខណៈថ្មី ប្លែកខុសពីមុនផងដែរ ។
វ៉ាន់ នីឡា បានចាប់ឈោងភាពល្បីក្នុងអាជីពសិល្បៈ ក្រោមការជួយផ្ទុងផ្តើមពីបងប្រុសរបស់នាងគឺលោកសុខ ជំនោរ ដែលនាំនាងមកកាន់ផលិតកម្មភ្លេងរីខត ។ នៅក្នុងផលិតកម្មនេះនាងបានចេញបទចម្រៀងជាបន្តបន្ទាប់ ហើយបទចម្រៀងរបស់នាងក៏ទទួលបានការគាំទ្រពីមិត្តយុវវ័យជាច្រើនផងដែរ កាលពីពេលនោះ ។ ទោះជាយ៉ាងណាក្ដីឈ្មោះជាតារាដ៏ភ្លឺថ្លារបស់នាងបានប្រែជាស្រអាប់ពណ៌ទៅវិញ បន្ទាប់ពីរូបភាពអាក្រាតកាយរបស់នាងត្រូវបានបែកធ្លាយតាមបណ្តាញអុីនធើរណេត ក្រោយពីនាងបានបែកបាក់ស្នេហាជាមួយសង្សារដែលជាកូនមន្ត្រីថ្នាក់ខ្ពស់មួយរូប ។ រឿងរ៉ាវនេះបានធ្វើឲ្យនាងត្រូវតតាំងក្តីគ្នាជាមួយអតីតគូស្នេហ៍នៅតុលាការ អូសពេលអស់ប៉ុន្មានឆ្នាំ ធ្វើឲ្យតារារូបនេះខកខាន និងមិនហ៊ានចេញមុខក្នុងពិភពសិល្បៈជាសាធារណៈដូចមុនឡើយ ។
ទោះបីជាវ៉ាន់ នីឡា បានទទួលពន្លឺយុត្តិធម៌ដោយតុលាការសម្រេចឲ្យនាងឈ្នះក្តីក៏ដោយប៉ុន្តែនាងមិនទាន់មានភាពក្លាហានចូលពិភពសិល្បៈជាថ្មីនៅឡើយទេ ។ ប៉ុន្តែគេតែងឃើញសកម្មភាពនាងជាហូរហែនៅលើបណ្តាញសង្គម ដែលបង្ហាញពីការច្រៀងលេងកម្សាន្ត និងការដើរលេងទៅតាមរមណីយដ្ឋាននានាទាំងក្នុង និងក្រៅប្រទេស ៕ (កែសម្រួលដោយ ៖ បុប្ផា)
ចែករំលែកព័តមាននេះ