រាជធានីភ្នំពេញ ៖ នៅតែល្បីឈ្មោះក្នុងពិភពប្រដាល់ កីឡាករយុគ យក្សផ្លែ ត្រូវបានគេប្រកាសឱ្យឡើងប្រកួតក្នុងនាមជាគូអន្តរជាតិជាមួយថៃនៅថ្ងៃសៅរ៍ស្អែក ដើម្បីកំដរសង្វៀនបន្តការប្រកួតជ្រើសរើសជើងឯករដូវកាលទី៧ក្នុងវគ្គជម្រុះ៨នាក់យក៤នាក់បន្ត ដែលជាវគ្គកាន់តែសំខាន់នៅប៉ុស្តិ៍លេខ៥ ។ នេះជាព្រឹត្តិការណ៍ Tv5 Knock Out Serie by K-Cement រដូវកាលទី៧ ក្នុងប្រភេទទម្ងន់៦៣,៥ គីឡូក្រាមដែលកាន់តែកៀកនឹងរកឃើញម្ចាស់ពាន។
លោក សេង កដិកា អ្នករៀបចំកម្មវិធីប្រកួត បញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ យុគ យក្សផ្លែ ដោយសារតែគេគឺជាជើងខ្លាំង ។
ម្យ៉ាងមកពីលោកចង់លើកមុខម្ចាស់ពានផង ទើបលោកសម្រេចដាក់ឱ្យប្រកួតជាលក្ខណៈអន្តរជាតិ ដើម្បីឱ្យកាន់តែទទួលបានការចាប់អារម្មណ៍នៅក្នុងវិស័យប្រដាល់ ។
លោកប្រកាសថា វត្តមានចុះមករបស់កីឡាករថៃខាងលើ លោកចង់ផ្ដល់ឱកាសឱ្យយុគ យក្សផ្លែ ដោយសារតែអ្នកទាំងពីរសុទ្ធតែជាជើងខ្លាំងដូចគ្នា បើទោះជាមានអ្នកគាំទ្រភាគច្រើនថាកីឡាករកម្ពុជាអាចនឹងពិបាកទប់ជាមួយកីឡាករថៃក្ដី ។ លោកថា កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើន ដោយរំពឹងថានឹងមានអ្នកស្នេហាវិស័យប្រដាល់ជក់ចិត្ត និងចង់ដឹងពីបទពិសោធន៍អ្នកទាំងពីរនៅពេលប៉ះគ្នា។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២ លោកជឿជាក់ថានឹងកក្រើក ដោយសារកីឡាករថៃលោកស្គាល់ថ្វីដៃច្បាស់ហើយថា មិនធម្មតា ហើយសម្រាប់កីឡាករកម្ពុជា វិញ ក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ។ កីឡាករកម្ពុជាដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់ថាជាជើងឯកមិនល្អទើបតម្រូវឱ្យគេត្រូវតែប្រកួតឱ្យខ្លាំង៕ (កែសម្រួលដោយ ៖ បុប្ផា)
ចែករំលែកព័តមាននេះ