ខេត្តបន្ទាយមានជ័យ ៖ ស្ត្រីម្នាក់បានរមូរសំពត់ចូលដុំម៉ូតូពេលកំពុងធ្វើដំណើរដោយជិះម៉ូតូឌុប តែសំណាងល្អមិនខ្មាសគេនោះទេ ព្រោះក្រោយសភាពការមិនស្រួលអ្នកបើកបរបានឈប់ម៉ូតូទាន់ពេល ។ ហេតុការណ៍នេះបានកើតឡើងលើដងផ្លូវជាតិលេខ៥ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយបែ៉ត (ក្បែររង្វង់មូលច្រកទ្វារអន្តរជាតិប៉ោយប៉ែត) កាលពីព្រឹកថ្ងៃទី២៩ សីហា ។
ក្នុងពេលកើតហេតុ គេឃើញស្ត្រីរងគ្រោះចុះពីលើម៉ូតូឈរទ្រឹងមិនហ៊ានកម្រើកទេពីដំបូង។ លុះមើលទៅសំពត់របស់គាត់រមូរតែផ្នែកខាងក្រោមត្រូវដុំម៉ូតូបួងយក រកដោះទាញចេញវិញអត់បានទេ ។ ដោយម៉ូតូទាញយកសាច់សំពត់តឹងពីចង្កេះបែបនេះ ស្ត្រីរូបនោះក៏សុខចិត្តទាញផ្តាច់ហែកចេញមួយកំណាត់ ទុកមួយកំណាត់ក្នុងរមូរដុំម៉ូតូ រួចដើរចេញពីកន្លែងកើតហេតុបាត់ទៅទាំងមុខក្រហម ។
រឿងរ៉ាវខាងលើកោះសន្តិភាពមិនបញ្ចេញមុខ ឬសួរនាំពីអត្តសញ្ញាណស្ត្រីរងគ្រោះទេ ព្រោះជាកេរ្តិ៍ខ្មាសរបស់ស្ត្រី ។ ប៉ុន្តែសុំអំពាវនាវដល់ស្ត្រីដទៃទៀត មេត្តាមានការប្រុងប្រយ័ត្នក្នុងពេលធ្វើដំណើរដោយស្លៀកសំពត់ប្រយ័ត្នខ្យល់បក់ជាយសំពត់ចូលក្នុងកាំឬដុំម៉ូតូ ។ ដើម្បីសុវត្ថិភាព គួរតែស្លៀកពាក់ឱ្យបានសមរម្យផង ៕
ចែករំលែកព័តមាននេះ