ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា ប្រជាពលរដ្ឋជាច្រើនបានសម្ដែងនូវការមិនពេញចិត្តចំពោះអាជ្ញាធរថ្នាក់ដឹកនាំភូមិ-ឃុំ បន្ទាប់ពីពួកគាត់អះអាងថា ចាញ់បោកការឃោសនារបស់ក្រុមអាជ្ញាធរក្នុងការផ្តិតមេដៃលក់ដីរួមភូមិមួយកន្លែង ស្ថិតនៅភូមិព្រៃក្តី សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។…
ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា ប្រជាពលរដ្ឋជាច្រើនបានសម្ដែងនូវការមិនពេញចិត្តចំពោះអាជ្ញាធរថ្នាក់ដឹកនាំភូមិ-ឃុំ បន្ទាប់ពីពួកគាត់អះអាងថា ចាញ់បោកការឃោសនារបស់ក្រុមអាជ្ញាធរក្នុងការផ្តិតមេដៃលក់ដីរួមភូមិមួយកន្លែង ស្ថិតនៅភូមិព្រៃក្តី សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
សេចក្តីរាយការណ៍បន្តថា កាលពីកំឡុងប៉ុន្មានខែមុន អាជ្ញាធរមានលោកមេភូមិ លោកចៅសង្កាត់ បានហៅពួកគាត់ទៅប្រជុំដោយប្រាប់ថា ដីស្រះមួយកន្លែងទំហំប្រមាណជិតមួយហិកតា មានគេសុំទិញ ដើម្បីធ្វើការអភិវឌ្ឍន៍ក្នុងមូលដ្ឋាន ។ ទន្ទឹមនោះក្រុមអាជ្ញាធរក៏បានប្រាប់ដល់ប្រជាពលរដ្ឋថា ក្នុងការលក់នេះ ទាល់តែមានស្នាមមេដៃប្រជាពលរដ្ឋឯកភាពរួមគ្នាទាំងអស់ ទើបធ្វើការលក់បាន ដោយមានអាជ្ញាធរភូមិ-ឃុំជាអ្នកចុះហត្ថលេខាដឹងឮ ។
សេចក្តីរាយការណ៍បន្តថា ចំពោះលុយដែលបានពីការលក់ស្រះរួមភូមិនេះ អាជ្ញាធរបានអះអាងថា នឹងយកមកធ្វើការអភិវឌ្ឍហេដ្ឋារចនាសម្ព័ន្ធក្នុងមូលដ្ឋានឲ្យសមស្របទៅតាមគោលការណ៍របស់ថ្នាក់ដឹកនាំ។ តែក្រោយពីពួកគាត់ផ្ដិតមេដៃអស់ហើយ អាជ្ញាធរដែលមានមេភូមិលោកចៅសង្កាត់ និងជនដែលទុកជាអ្នករត់ការនោះ ក្រោយពេលដែលបានលុយហើយ គឺស្ងាត់ឈឹងតែម្ដង មិនបានយកមកធ្វើការអភិវឌ្ឍហេដ្ឋារចនាសម្ព័ន្ធនៅក្នុងភូមិ ដូចកាលពីមុនឡើយ។
ប្រភពដដែលបន្តទៀតថា ហើយលុយទាំងនោះត្រូវបានប្រជាពលរដ្ឋសង្ស័យថា អស់លោកថ្នាក់ដឹកនាំមូលដ្ឋានប្រហែលជាឃុបឃិតគ្នាចែកគ្នាបក្ខពួករបស់គាត់អស់ទៅហើយ ទើបបានជាមិនយកមកចែកឲ្យប្រជាពលរដ្ឋ ។ តែបើចែកឱ្យប្រជាពលរដ្ឋវិញ គឺម្នាក់បាន 50ដុល្លារ, 100ដុល្លារ និង150ដុល្លារទៅតាមប្រភេទ1 និង2 និង 3 ដោយក្រុមអាជ្ញាធរទាំងនោះជាអ្នកធ្វើបញ្ជីចាត់ជាប្រភេទ1 និង2 និង3 ដោយគេត្រូវធ្វើយ៉ាងណា ដើម្បីឲ្យសល់ប្រាក់បានច្រើនក្នុងការចែកគ្នាបក្ខពួករបស់ពួកគាត់។
ក្រុមប្រជាពលរដ្ឋបានលើកឡើងថា បើកូនចៅរបស់លោកមេភូមិ លោកជុំ ទប់ និងលោកចៅសង្កាត់វិញ ត្រូវចាត់ចូលទៅក្នុងប្រភេទលេខ១ ដោយគ្រួសារខ្លះទទួលបានប្រាក់រាប់ពាន់ដុល្លារ ចំណែកដែលគ្រួសារខ្លះវិញទៀតដែលមិនមែនជាបក្ខពួករបស់អស់លោកទាំងនោះ គេចាត់ទុកក្នុងប្រភេទលេខ3 ដោយម្នាក់ឱ្យ 50 ដុល្លារ ការធ្វើបែបនេះប្រជាពលរដ្ឋហាក់មិនពេញចិត្តនោះទេ គឺបានប្រៀបប្រដូចខ្លួនថា ចាញ់កលក្រុមអាជ្ញាធរ ដើម្បីជាស្ពានចម្លងឲ្យអស់លោកទាំងនោះ បានទទួលប្រាក់រាប់សិបម៉ឺនដុល្លារសោយសុខយ៉ាងសប្បាយ។
ព័ត៌មានពិស្តារនឹងមានផ្សាយនៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ