រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា គ្រោះថ្នាក់ចរាចរណ៍២ករណីផ្ទួនៗគ្នាបានកើតឡើងបណ្តាលឲ្យមនុស្សរងរបួសធ្ងន់២នាក់ និងរងការខូចខាតម៉ូតូ៤គ្រឿង ក្នុងនោះម៉ូតូសមត្ថកិច្ច៣គ្រឿង ខណៈដែលអ្នកបើកបររថយន្ត២គ្រឿងខ្វះការប្រុងប្រយ័ត្ន ។ ហេតុការណ៍នេះបានកើតឡើងនៅម៉ោង៧យប់ ថ្ងៃទី៤ ខែមីនា ឆ្នាំ២០២០ ជិតនិងស្ពានថ្មមួយ តាមបណ្ដោយផ្លូវ៦០ម៉ែត្រ ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
សេចក្តីរាយការណ៍បន្តថា រថយន្តបង្កគ្រោះថ្នាក់ចរាចរណ៍មាន២គ្រឿងខាងលើ មួយគ្រឿងពណ៌ខ្មៅ ពាក់ស្លាកលេខ ភ្នំពេញ 2U 2717 បើកបរដោយបុរសមិនស្គាល់អត្តសញ្ញាណ ត្រូវសមត្ថកិច្ចឃាត់ខ្លួនបាន និងមួយគ្រឿងទៀត ម៉ាក CRV ពណ៌ទឹកប្រាក់ ពាក់ស្លាកលេខ ភ្នំពេញ 2M 1745 បើកបរដោយប្តីប្រពន្ធ២នាក់ មិនស្គាល់អត្តសញ្ញាណដូចគ្នា ។ ដោយឡែកម៉ូតូរងគ្រោះមានចំនួន៤គ្រឿង ក្នុងនោះមានម៉ូតូរបស់សមត្ថកិច្ចចំនួន៣គ្រឿងផងដែរ ។
បើតាមប្រភពពីកន្លែងកើតហេតុបានឲ្យដឹងថា មុនកើតហេតុ គេឃើញប្តីប្រពន្ធ២នាក់ជិះម៉ូតូម៉ាកហុងដាឌ្រីម១គ្រឿង ធ្វើដំណើរតាមបណ្ដោយផ្លូវ៦០ម៉ែត្រពីត្បូងទៅជើង លុះមកដល់ចំណុចកើតហេតុ ស្រាប់តែបុរសម្នាក់បានបើករថយន្ត១គ្រឿងពណ៌ខ្មៅ ធ្វើដំណើរក្នុងទិសដៅបញ្ច្រាសគ្នាពីជើងទៅត្បូងក្នុងល្បឿនលឿន មិនដឹងថា គេចនឹងអ្វីនោះទេ ក៏បានរេចង្កូតចូលគន្លងផ្លូវម្ខាងទៀត ហើយក៏ជ្រុលទៅបុកនឹងម៉ូតូដែលជិះដោយប្តីប្រពន្ធ២នាក់ចំពីមុខពេញទំហឹងតែម្តង បណ្តាលឲ្យរងរបួសបាក់ជើងទាំងពីរនាក់ ។
ប្រភពដដែលបន្តថា ភ្លាមៗនោះដែរ សមត្ថកិច្ចមូលដ្ឋានក៏បានចុះទៅកន្លែងកើតហេតុ រួចក៏ឃាត់ខ្លួនបុរសបើករថយន្តយកទៅសាកសួរនៅអធិការនគរបាលខណ្ឌមានជ័យ ក្រោយក៏បានទំនាក់ទំនងហៅរថយន្តឱ្យមកដឹកជនរងគ្រោះប្តីប្រពន្ធយកទៅសង្គ្រោះនៅមន្ទីរពេទ្យកាល់ម៉ែតភ្លាមៗផងដែរ ។
ប្រភពដដែលបន្តទៀតថា នៅពេលនោះ ដែលសមត្ថកិច្ចមូលដ្ឋាន ក៏ដូចជាជំនាញចរាចរណ៍ខណ្ឌមានជ័យ កំពុងពិនិត្យ និងធ្វើការសំរួលចរាចរណ៍ ព្រោះតែផ្លូវងងឹតនោះ គាប់ជួនពេលនោះដែរ ក៏ស្រាប់តែមានបុរសម្នាក់រួមដំណើរជាមួយនឹងប្រពន្ធដែលគេដឹងថា ទើបចេញពីពិធីសូត្រមន្តមង្គលការ ហើយក៏បានបើករថយន្តម៉ាក CRV ពណ៌ទឹកប្រាក់ ធ្វើដំណើរតាមបណ្ដោយផ្លូវ៦០ម៉ែត្រ ពីត្បូងទៅជើងក្នុងល្បឿនលឿនមើលផ្លូវមិនច្បាស់ ទើបបណ្ដាលឲ្យរថយន្តជ្រុលទៅបុករះម៉ូតូរបស់សមត្ថកិច្ច៣គ្រឿងដែលចតនៅលើផ្លូវ ហើយក៏បន្តទៅបុកនឹងរថយន្តដែលជួបគ្រោះថ្នាក់ដំបូង បណ្ដាលរថយន្តធ្លាក់ពីលើផ្លូវចូលទៅស្មៅត្រែង រងការខូចខាតបន្ថែមទៀត ។
ដោយឡែករថយន្ត CRV រងការខូចខាតផែ្នកខាងមុខ តែមិនមានគ្រោះថ្នាក់ដល់មនុស្សដែលជិះក្នុងរថយន្តនោះទេ គ្រាន់តែបង្កការខូចខាតដល់ម៉ូតូចំនួន៤គ្រឿង ក្នុងនោះមានម៉ូតូរបស់សមត្ថកិច្ចចំនួន៣គ្រឿង ម៉ូតូរបស់ប្តីប្រពន្ធរងគ្រោះ២នាក់ខាងលើ និងរថយន្តបង្កដែលបុក២នាក់ប្តីប្រពន្ធនោះផងដែរ ។
ក្រោយពេលកើតហេតុ ដោយសារតែអត់មានដំណោះស្រាយ រថយន្ដទាំង២គ្រឿង ព្រមទាំងម៉ូតូចំនួន៤គ្រឿង និងអ្នកបើកបររថយន្តបង្ក ត្រូវបានសមត្ថកិច្ចជំនាញចរាចរណ៍ក្រុងភ្នំពេញ បានធ្វើការវាស់វែង រួចយកទៅរក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការ នៅពេលក្រោយជាបន្តទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ