ខេត្តប៉ៃលិន ៖ សំរាមជាច្រើនការ៉ុង ដែលត្រូវបានគេដឹកតាមម៉ូតូ និងរ៉ឺម៉កម៉ូតូយកទៅបោះចោលយ៉ាងអនាធិបតេយ្យក្បែរចិញ្ចើមផ្លូវលំ បានបង្កជាក្លិនស្អុយអាសោចិ៍ប៉ះពាល់ដល់សុខភាពផ្លូវដង្ហើមអ្នកបើកបរម៉ូតូចេញចូលទៅមកក្នុងក្រុងប៉ៃលិន ។
ជាក់ស្តែង គេឃើញមានគំនរសំរាមខាងលើកាលពីព្រឹកថ្ងៃទី៤ ខែមីនា ឆ្នាំ២០២០ ស្ថិតនៅខាងជើងផ្សារសាមគ្គីហៅប៉ាហ៊ី ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
បើតាមប្រភពព័ត៌មានពីបុរសម្នាក់ឈ្មោះ សរ សារឿន អាយុ៥០ឆ្នាំ រស់នៅក្បែរកន្លែងគេបោះចោលសម្រាមខាងលើ បានរៀបរាប់ឱ្យដឹងថា នៅពេលមានខ្យល់បក់បោកមកពីទិសខាងលិចម្តងៗ ធ្វើឱ្យពួកគាត់ដែលមានផ្ទះនៅក្បែរនោះ ពិតជាមានការពិបាកទ្រាំខ្លាំងណាស់ ដោយសារក្លិនស្អុយអាសោចិ៍ ស្ទើរចង់ក្អួតម្តងៗ ។ គាត់បន្តទៀតថា សំរាមដែលគេដឹកយកទៅបោះចោលនៅក្បែរចិញ្ចើមផ្លូវលំ និងក្បែរផ្ទះរបស់គាត់មានចម្ងាយប្រហែល២០០ម៉ែត្រ រួមមានដូចជា កម្ទេចកម្ទីបន្លែ កាកសំណល់ផ្ទះបាយ សំបកពងមាន់ ពងទា ឆ្អឹងគោ ឆ្អឹងជ្រូក ក្បាលត្រី ស្រកាត្រី រួមជាមួយនឹងកាកសំណល់បន្លែគ្រប់ប្រភេទផងដែរ ។
បុរសខាងលើបានបន្តទៀតថា ជនមិនស្គាល់អត្តសញ្ញាណដែលដឹកកាកសំណល់យកទៅចោលទាំងនោះ ភាគច្រើនគឺដឹកនៅពេលថ្ងៃត្រង់ ស្ងាត់មនុស្សធ្វើដំណើរតាមផ្លូវខាងលើ ហើយជួនកាលទៀត គេដឹកនៅពេលយប់ស្ងាត់មនុស្សផងដែរ ។ ការបោះចោលសំរាមអនាធិបតេយ្យបែបនេះអស់រយ:ពេលជាយូរមកហើយ ដោយជួនកាលពួកគាត់ពិបាកទ្រាំខ្លាំងពេក ក៏នាំគ្នាយកភ្លើងទៅដុតចោល ដើម្បីជួយកាត់បន្ថយការស្អុយ ព្រោះសំរាមទាំងអស់នោះ ពិតជាបង្កផលប៉ះពាល់ធ្ងន់ធ្ងរដល់ផ្លូវដង្ហើម ធ្វើឱ្យក្អក រលាកផ្លូវដង្ហើម រួមទាំងអ្នកបើកបរធ្វើដំណើរឆ្លងកាត់ក៏ស្អុយក្លិននេះផងដែរ ។ ពួកគាត់មិនធ្លាប់ទៅប្តឹងខាងអាជ្ញាធរឱ្យចុះទៅពិនិត្យនោះឡើយ ព្រោះពីមុនធ្លាប់ប្តឹងដែរ ប៉ុន្តែហាក់ដូចជាគ្មានប្រសិទ្ធិភាព និងគ្មានវិធានការចំពោះជនខិលខូចទាំងនោះឡើយ ។
ចំណែកអ្នកភូមិប៉ាហ៊ីជើងបានរិះគន់ថា គួរតែយកសំរាមទៅចាក់ចោលនៅកន្លែងណាដែលគ្មានមនុស្សរស់នៅ ឬទីលានចាក់សំរាម ព្រោះរាល់ថ្ងៃនៅក្នុងខេត្តប៉ៃលិន មានរថយន្តដឹកសំរាមជាច្រើនគ្រឿង គួរតែជួលឱ្យគេយកទៅបោះចោលនៅទីលានចាក់សំរាម ទើបមិនបង្កផលប៉ះពាល់សុខភាពផ្លូវដង្ហើម ។ ជាពិសេស ការបោះចោលគ្មានសណ្តាប់ធ្នាប់បែបនេះ ធ្វើឱ្យប៉ះពាល់ដល់បរិស្ថាន និងខូចសោភ័ណភាពក្រុងផងដែរ ។ ពាក់ព័ន្ធនឹងបញ្ហានេះ លោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា ខាងលោកអត់ទាន់ដឹងរឿងនេះទេ ចាំប្រាប់មន្ត្រីឱ្យចុះទៅពិនិត្យមើល ដើម្បីដោះស្រាយ ៕ (កែសម្រួលដោយ ៖ ធីតា)
ចែករំលែកព័តមាននេះ