រាជធានីភ្នំពេញ ៖ ពិធីមង្គលការមួយជិតបានបញ្ចប់ និងដល់រាត្រីផ្សំដំណេកទៅហើយ ស្រាប់តែផ្ទុះហិង្សាកើតឡើងរវាងអ្នកជិតខាង និងខាងកូនកំលោះ បណ្តាលឱ្យកូនកម្លោះរងរបួសបែកមាត់ និងបាក់ធ្មេញផងដែរ ។
ហេតុការណ៍ខាងលើនេះបានបង្កអោយមានការភ្ញាក់ផ្អើលកាលពីវេលាម៉ោង១០និង៥០នាទីយប់ថ្ងៃទី២ ខែមិនា ឆ្នាំ២០២០ នៅចំណុចគេហដ្ឋានខាងស្រី ស្ថិតក្នុងភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ។
ភាគីទាំងសងខាងមិនបានអោយដឹងអត្តសញ្ញាណនោះទេ គ្រាន់តែដឹងថា ភាគីខាងកូនកម្លោះបានរងរបួសធ្ងន់ចំនួន២នាក់ គឺកូនកម្លោះនិងបងប្រុសរបស់កូនកម្លោះ ចំណែកភាគីខាងអ្នកជិតខាងរងរបួសស្រាលចំនួន៣នាក់ ។
តាមប្រភពពីភាគីខាងកូនកម្លោះបានអោយដឹងថា មុនពេលកើតហេតុ ពិធីមង្គលការរបស់ពួកគាត់កំពុងតែរាំច្រៀងយ៉ាងសប្បាយ លុះដល់ពេលជិតចប់កម្មវិធីទៅហើយ ស្រាប់តែអ្នកជិតខាងដែលមានផ្ទះនៅទល់មុខរោងការដែរ តែពួកគាត់មិនអញ្ជើញឲ្យចូលរួមក្នុងពិធីមង្គលការនោះទេ បានប្រាប់ឱ្យខាងកូនកម្លោះឈប់ច្រៀងទៅ ព្រោះយប់ជ្រៅហើយ ប៉ុន្តែខាងកូនកម្លោះនៅចង់ច្រៀងបន្តិចទៀតទើបឈប់ ពេលនោះក៏បង្កឲ្យកើតជាទំនាស់ពាក្យសម្តី រហូតឈានដល់ការប្រើហិង្សាវាយតប់គ្នាទៅវិញទៅមក ។ ដោយខាងកូនកម្លោះមានកែវហោះ ចំណែកអ្នកជិតខាងមានកាំបិត រួចក៏បើកឆាកប្រយុទ្ធគ្នា បណ្តាលឲ្យខាងកូនកម្លោះរងរបួសធ្ងន់ចំនួន២នាក់ ដោយកូនកម្លោះបែកមាត់ និងបាក់ធ្មេញ រីឯបងកូនកម្លោះរងរបួសបែកក្បាល ។
ដោយឡែកភាគីខាងអ្នកជិតខាងបានរងរបួសចំនួន៣នាក់ តែរបួសស្រាល ភ្លាមៗនោះដែរ ភាគីទាំង
សងខាង ត្រូវបានសមត្ថកិច្ចហៅមកធ្វើការសាកសួរនៅប៉ុស្តិ៍នគរបាលច្បារអំពៅ ។ ដោយភាគីខាងអ្នកជិតខាងបានទៅដាក់ពាក្យបណ្ដឹងមុន ដោយឡែកខាងកូនកម្លោះទៅព្យាបាលរបួសរួច ក៏បានមកដាក់ពាក្យបណ្ដឹងនៅប៉ុស្តិ៍នគរបាលច្បារអំពៅ២តាមក្រោយផងដែរ ។
ក្រោយពេលកើតហេតុ ដោយសារតែភាគីខាងអ្នកជិតខាងបានទៅដាក់ពាក្យបណ្ដឹងមុន ត្រូវបានសមត្ថកិច្ចអោយទៅផ្ទះមុន ចំណែកខាងកូនកម្លោះដែលរងរបួសធ្ងន់បានទៅដាក់ពាក្យបណ្ដឹងតាមក្រោយដើម្បីរកដំណោះស្រាយដែរ តែសមត្ថកិច្ចមិនទាន់មានដំណោះស្រាយនោះទេ ហើយសមត្ថកិច្ចក៏បានអោយភាគីខាងកូនកម្លោះទៅផ្ទះសំរាកសិន លុះចាំព្រឹកថ្ងៃទី៣ មីនា ទើបសមត្ថកិច្ចហៅភាគីទាំងសងខាងមកធ្វើការដោះស្រាយគ្នាជាបន្តទៀត ។
ជុំវិញករណីខាងលើនេះ កោះសន្តិភាពមិនបានជួប ដើម្បីសុំការបំភ្លឺពីភាគីខាងអ្នកជិតខាងបានទេ ៕ (កែសម្រួលដោយ ៖ ធីតា)
ចែករំលែកព័តមាននេះ