រាជធានីភ្នំពេញ ៖ បើទោះបីជាឆ្នាំ ២០២០នេះ ស្ថានភាពនៃវិស័យសេដ្ឋកិច្ចកម្ពុជា ក៏ដូចជាពិភពលោកទាំងមូល ហាក់មាននិន្នាការថមថយកំណើនក្ដី តែសម្រាប់គម្រោងវិនិយោគដែលកម្ពុជាទទួលបានក្នុងរយៈពេលជិត២ខែ ដើមឆ្នាំនេះនៅតែមានបរិមាណនិងទឹកប្រាក់ខ្ពស់ដដែល ។
បើតាមការបញ្ជាក់ពីក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC ក្នុងឆ្នាំ ២០២០នេះ ក្រុមប្រឹក្សាអភិវឌ្ឍន៍ទទួលបានគម្រោងវិនិយោគជាង៣០គម្រោង គិតជាទឹកប្រាក់មានប្រមាណ១ពាន់លានដុល្លារអាមេរិក ទៅលើវិស័យមួយចំនួន ដូចជាវិស័យអចលនទ្រព្យ ឧស្សាហកម្មកាត់ដេរ និងវាយនភ័ណ្ឌជាដើម ។ ជាក់ស្ដែងកាលពីថ្ងៃទី២៦ កុម្ភៈ ២០២០ កន្លងទៅនេះ ក្រុមប្រឹក្សាអភិវឌ្ឍន៍កម្ពុជា បានអនុម័តអោយក្រុមហ៊ុនចំនួន៤បន្ថែមទៀត ដោយគិតជាទឹកប្រាក់ប្រមាណជិត៨០លានដុល្លារអាមេរិក ហើយភាគច្រើននៃគម្រោងវិនិយោគនោះ គឺផ្ដោតលើឧស្សាហកម្មរោងចក្រ ។
លោកសុខ ចិន្តាសោភា ប្រធានក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា «ក្នុងឆ្នាំ ២០២០នេះសេដ្ឋកិច្ចកម្ពុជាមិនជាយ៉ាប់យ៉ឺននោះទេ ព្រោះកម្ពុជានៅតែទទួលបានវិនិយោគិនជាតិនិងអន្តរជាតិជាបន្តបន្ទាប់ ។ ក្នុងឆ្នាំ ២០២០ ការរអាក់រអួលក្នុងសេដ្ឋកិច្ច គឺមានលក្ខណៈសកល ហើយប្រទេសកម្ពុជា នាពេលបច្ចុប្បន្ននេះក៏មានផលប៉ះពាល់ ប៉ុន្តែមួយភាគធំ គឺទៅលើវិស័យទេសចរណ៍ ដោយវិស័យផ្សេងទៀតដូចជាកសិកម្មជាដើមនៅតែដំណើរការល្អ ដោយបានកែច្នៃនិងនាំចេញស្វាយ ចេកទៅកាន់ទីផ្សារអន្តរជាតិផងដែរ» ។
លោកបានបន្តថា ក្នុងស្ថានភាពដែលពិភពលោកកំពុងមានភាពចលាចលនេះដែរ ការវិនិយោគនៅក្នុងប្រទេស មានបិទមានបើកនិងបន្តទទួលយកអ្នកវិនិយោគថ្មីៗមកវិនិយោគបន្តទៀត ដូចជារោងចក្រកែច្នៃ និងរោងចក្រកាត់ដេរនានា ជាដើម ។ ក្នុងនោះដែរប្រមុខរាជរដ្ឋាភិបាល បានដាក់ចេញនូវគោលការណ៍បម្រើដល់អ្នកវិនិយោគក្នុងនិងក្រៅប្រទេស ដែលបានដាក់ទុនវិនិយោគរួចហើយ និងគ្រោងមកវិនិយោគបន្តទៀត ដើម្បីជួយពួកគេក្នុងការងារមួយចំនួន ពាក់ព័ន្ធនឹងដំណើរការវិនិយោគ ។
យ៉ាងណាក្ដី កាលពីពេលថ្មីៗនេះដែរ មន្ត្រីអ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈកម្ពុជា បានបញ្ជាក់ពីហានិភ័យនៃការបាត់បង់ឱកាសការងារដល់បងប្អូនកម្មករ-កម្មការិនីប្រមាណ១៦ម៉ឺននាក់ ជាពិសេសទៅលើវិស័យឧស្សាហកម្មកាត់ដេរនិងសម្លៀកបំពាក់ ដោយសារខ្វះវត្ថុធាតុដើមសម្រាប់ដំណើរការខ្សែចង្វាក់ផលិតកម្មនៅតាមរោងចក្រ សហគ្រាស ២០០ រោងចក្រ ។ បញ្ហានេះ គឺបណ្ដាលមកពីវីរុសកូរ៉ូណា នៅប្រទេស ចិននិងការរីករាលដាលដល់ប្រទេសជាង ៥០ ដែលធ្វើអោយរោងចក្រមួយចំនួនធំនៅក្នុងប្រទេសចិននិងបណ្តាប្រទេសផ្សេងទៀតបិទទ្វារ ៕ កែសម្រួលដោយ ៖ សុឃាក់
ចែករំលែកព័តមាននេះ