ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវកម្លាំងនគរបាលផ្នែកអនុវត្តដីកា នៃស្នងការខេត្ត ចាប់ខ្លួនតាមដីការបស់តុលាការ កាលពីម៉ោង១១និង៤០នាទីថ្ងៃត្រង់ ថ្ងៃទី០២ ខែមីនា ឆ្នាំ២០២០ ស្ថិតនៅភូមិបាដាកជើង ឃុំរស្មីសង្ហា ស្រុករតនមណ្ឌល ក្រោយពីប្រព្រឹត្តអំពើប្លន់ ហើយរត់គេចខ្លួនទៅស៊ីឈ្នូលបេះផ្លែឈើនៅប្រទេសថៃ អស់រយៈពេលជាង១០ឆ្នាំ។
បើតាមលោក កង សុផាន់ណា នាយរងការិយាល័យព្រហ្មទណ្ឌកំរិតធ្ងន់ ដែលដឹកនាំកម្លាំងចុះអនុវត្តដីកា បានឱ្យដឹងថា ជនដែលត្រូវចាប់ខ្លួននេះ ឈ្មោះ វន សុគុណ អាយុ៣៧ឆ្នាំ រស់នៅភូមិ-ឃុំខាងលើ។ ហើយជននេះត្រូវកម្លាំងរបស់លោកចាប់ខ្លួនតាមដីកាលេខ១៦០ដចខ ចុះថ្ងៃទី១៧ កុម្ភៈ ឆ្នាំ២០០៩ របស់ចៅក្រមស៊ើបសួរ លោកផាន់ វណ្ណារ័ត្ន។
លោកបានបញ្ជាក់ថា បើយោងលើសំណុំរឿង ឈ្មោះ វន សុគុណ នេះ រួមជាមួយបក្សពួក បានធ្វើសកម្មភាពប្លន់ប្រដាប់អាវុធ ហើយក្រោយពេលប្រព្រឹត្តជននេះ បានរត់ទៅធ្វើកម្មករនៅប្រទេសថៃអស់រយៈពេល១២ឆ្នាំហើយ។ បែបស្មានថា សំណុំរឿងខ្លួនត្រូវបានបញ្ចប់ ឬតុលាការភ្លេច ទើបវិលត្រឡប់ចូលស្រុកកំណើតវិញ និងបានបង្ហាញមុខ ក៏ត្រូវលោកស្នងការបញ្ជាឲ្យអនុវត្តដីកាចាប់ខ្លួនភ្លាមៗតែម្ដង។
បើយោងតាមដីកាបង្គាប់ឱ្យចាប់ខ្លួនរបស់លោកផាន់ វណ្ណារ័ត្ន ចៅក្រមស៊ើបសួរសាលាដំបូងខេត្ត ជនត្រូវចោទឈ្មោះ វន សុគុណ ត្រូវបានតំណាងអយ្យការអមសាលាដំបូងខេត្តចោទប្រកាន់ពីបទ « ក្រុមជនប្រដាប់អាវុធ និងប្លន់ទ្រព្យសម្បត្តិប្រជារាស្ត្រ» ដែលប្រព្រឹត្តកាលពីថ្ងៃទី០៤ សីហា ឆ្នាំ២០០៨ នៅចំណុចភូមិបាដាកត្បូង ឃុំស្ដៅ ស្រុករតនមណ្ឌល។
ប៉ុន្តែក្រោយពីធ្វើសកម្មភាពជននេះ បានរត់ចោលស្រុកបាត់ស្រមោលរហូត ដោយទៅសម្ងំធ្វើកម្មករនៅស្រុកថៃ លុះភ្លេចខ្លួនក៏វិលត្រឡប់មកចូលគុកបានសម្រេចដោយខ្លួនឯង។ជាមួយនឹងការចាប់ខ្លួននេះ ឈ្មោះវន សុគុណ ហាក់មានការស្រឡាំងកាំងយ៉ាងខ្លាំង ព្រោះមិននឹកស្មានថា សំណុំរឿងរបស់ខ្លួននៅតែត្រូវសមត្ថកិច្ចចាត់វិធានការ។
ជននេះបានសារភាពថា ខ្លួនពិតជាបានចូលរួមប្រព្រឹត្តក្នុងអំពើប្លន់មែន តែខ្លួនស្មានថា គេបញ្ចប់ ឬបំភ្លេចសំណុំរឿងនេះបាត់ទៅហើយ ក្រោយពីខ្លួនរត់ចោលស្រុកអស់រយៈពេល១២ឆ្នាំ។ ឧក្រិដ្ឋជនរូបនេះ បាននិយាយអំពីការរត់គេចខ្លួនរយ៖ពេល១២ឆ្នាំកន្លងទៅយ៉ាងដូច្នេះថា «បន្ទាប់ពីប្រព្រឹត្តបទល្មើស ខ្ញុំបានរត់គេចខ្លួនទៅធ្វើកម្មករស៊ីឈ្នូលបេះផ្លែឈើ នៅប្រទេសថៃ តែខ្ញុំស្នានថា រយៈ១២ឆ្នាំ គេបញ្ចប់ ឬបិទចោលសំណុំរឿងនេះហើយ ទើបខ្ញុំវិលត្រឡប់មកផ្ទះវិញ ក៏ត្រូវសមត្ថកិច្ចចាប់ខ្លួនល្មម»។ ទោះយ៉ាងណា ជននេះ ត្រូវបានកម្លាំងជំនាញនាំខ្លួនទៅកាន់ស្នងការដ្ឋានខេត្តហើយ។
លោកកង សុផាន់ណា នាយរងការិយាល័យព្រហ្មទណ្ឌកំរិតធ្ងន់បានបញ្ជាក់ថា ពេលនេះកម្លាំងរបស់លោកកំពុងរៀបចំបញ្ជូនជនត្រូវចោទឈ្មោះ វន សុគុណ ទៅកាន់សាលាដំបូងខេត្ត ដើម្បីប្រគល់ជូនលោកចៅក្រមតាមនីតិវិធីហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ