រាជធានីភ្នំពេញ៖ វិបត្តិវីរុសកូរ៉ូណាមិនត្រឹមតែធ្វើឲ្យប៉ះពាល់ដល់វិស័យសំខាន់នៅកម្ពុជានិងបណ្តាប្រទេសមួយចំនួនលើពិភពលោកនោះទេ សូម្បីតែម៉ាស់ពាក់ការងារធូលីដីធម្មតាដែលធ្លាប់តែលក់ក្នុងតម្លៃ ៥០០ រៀលក្នុងម៉ាស់មួយគូ សម្រាប់ពាក់ការពារធូលី ឬការពារជំងឺផ្តាសសាយធម្មតាៗ ដែលគេធ្លាប់តែឃើញដាក់លក់ចងរណេងរណោងនៅតាមកន្លែងលក់ចាប់ហួយតូចឬធំ ដាក់លក់រាប់ខែស៊ឹងតែរកអ្នកធ្វើដំណើរចូលមកទិញ ស្រាប់តែពេលមួយរយៈខ្លីចុងក្រោយនេះបែរជាឡើងថ្លៃហួសប្រមាណ ហើយពិបាកនឹងរកទិញទៀតផង ។
ប្រាកដណាស់ បើទោះបីជាប្រមុខដឹកនាំរាជរដ្ឋាភិបាលកម្ពុជាបានបញ្ជាក់ថាថ្មីម្តងទៀតថាគិតត្រឹមថ្ងៃទី ០១ ខែមីនា ម្សិលមិញនេះមិនទាន់មានពលរដ្ឋខ្មែរណាម្នាក់កើតជំងឺ បង្កឡើងដោយវីរុសកូរ៉ូណា ក៏ពិតមែនតែម្នាក់ៗហាក់នៅមានការភ័យខ្លាច សម្រុកទិញ ម៉ាស់យកមកប្រើប្រាស់ រហូតធ្វើឲ្យតម្លៃម៉ាស់ហក់ឡើងខ្ពស់ ។ វីរុសកូរ៉ូណាដែលបានផ្ទុះនៅចិននិងបានរីករាលដាលឆ្លងយ៉ាងសាហាវជាង ៥០ ប្រទេសមកដល់ពេលនេះ បានធ្វើឱ្យប្រជាពលរដ្ឋកម្ពុជាមានការភ័យខ្លាច បើទោះបីមិនទាន់មានពលរដ្ឋខ្មែរណាមួយបានសា្លប់ ឬបានផ្ទុកនៅមេរោគកូរ៉ូណានេះដូចទៅនឹងជនបរទេសក៏ដោយ ប៉ុន្តែការភ័យខ្លាចនេះបានរុញឱ្យស្ថានភាពតម្រូវការនិងថ្លៃម៉ាស់ដែលធ្លាប់តែលក់ក្នុងតម្លៃ១គូ៥០០រៀលពេលត្រូវការរកទិញមិនបានហើយមានតម្លៃថ្លៃខុសពីពេលមុនៗ។
បើតាមអ្នកលក់ចាប់ហួយនៅតាមក្បែរផ្លូវកម្ពុជាក្រោមសុំមិនបង្ហាញឈ្មោះបានឱ្យដឹងថាពីមុនអ្នកស្រីធ្លាប់តែលក់ម៉ាស់១គូថ្លៃ៥០០រៀល តែមកដល់ពេលនេះអត់មានម៉ាស់១គូថ្លៃ៥០០រៀលទៀតទេ ដោយសារម៉ូយលក់ចាប់ហួយនៅផ្សារសាមគ្គីប្រាប់ថាវាឡើងថ្លៃ។ បើតាមម្ចាស់តូបលក់ចាប់ហួយមានផ្លាកយីហោបោកអ៊ុតស្អាតជានិច្ច បន្តថា «នៅពេលដែលមានការផ្អើលថាមានជំងឺកូរ៉ូណានេះដំបូងៗយើងធ្លាប់បានយកមកម៉ាស់លក់ខ្លះដែរ តែលក់ក្នុងតម្លៃធម្មតាគឺពីរថ្លៃ៥០០រៀល តែនៅពេលលក់អស់ យើងទៅយកមកទៀតម៉ូយប្រាប់ថាអត់មានទេមកដល់ពេលនេះ។ ព្រោះតម្លៃវាមួយប្រអប់ឡើងថ្លៃដល់ជាង៤ម៉ឺនរៀលទៅហើយឱ្យគេយកមកលក់ម៉េច?លក់អត់បានទេហើយបើវាថ្លៃបែបនេះយកមកលក់ក៏ពិបាកលក់ដែរ»។ បើតាមម្ចាស់តូបលក់ចាប់ហួយខាងលើ បើអត់មានម៉ាស់១គូថ្លៃ៥០០រៀលលក់ដូចពេលមុន តែអ្នកស្រីក៏មានដាក់លក់ម៉ាស់ក្រណាត់នេះជំនួសវិញដែរ ដោយម៉ាស់មួយថ្លៃ២០០០រៀល។ តែម៉ាស់ប្រភេទនេះមិនសូវមានប្រជាពលរដ្ឋទិញយកទៅពាក់ទេ ព្រោះពាក់ទៅវាហប់។
ម្ចាស់តូបលក់ចាប់ហួយដដែលលើកឡើងថា «លក់ចាប់ហួយរាល់ថ្ងៃនេះមានការបារម្ភខ្លះដែរនៅពេលមានជនជាតិចិនចូលមកទិញម្តងៗ ទោះបីចិនពាក់ម៉ាស់ក៏ដោយ ព្រោះខ្ញុំអត់ចេះពាក់ម៉ាស់ព្រោះវាហប់ខ្យល់ពេក ដោយសារពុំដែលធ្លាប់ពាក់វា។ប៉ុន្តែបើកូនខ្មែរមកទិញអារម្មណ៍មិនសូវព្រួយទេ»។
ចំណែកអ្នកចាប់ហួយនៅខាងកើតផ្សារសាមគ្គី បានឱ្យដឹងថា «មកដល់ពេលនេះខ្ញុំខានលក់ម៉ាស់ពីរថ្លៃ៥០០រៀលនេះចូលមួយខែហើយ តែក្រោយមកសាកសួរទៅកន្លែងធ្លាប់ទៅទិញគេប្រាប់ថាគេឈប់ទៅយកមកលក់ទៀតហើយព្រោះម៉ាស់ឡើងថ្លៃណាស់។ មានលក់តែម៉ាស់ក្រណាត់ដេរនៅប្រទេសថៃមួយថ្លៃ២.០០០រៀល»។ តាមអ្នកលក់ចាប់ហួយរូបនេះ « ម៉ាស់១គូថ្លៃ៥០០រៀលពីមុន បើចង់បានទល់កុំម្ម៉ង់មួយកញ្ចប់ថ្លៃជាង២០ដុល្លារអាមេរិកមកហើយ តើឱ្យខ្ញុំលក់ចេញទៅវិញមួយថ្លៃប៉ុន្មានទៅ ហើយមិនមែនកុំម្ម៉ង់តែមួយប្រអប់បានទេ គេតម្រូវឱ្យ៥០ទៅ១០០ប្រអប់ទើបគេលក់ជូន។ម៉ាស់១គូថ្លៃ៥០០រៀលនេះខានលក់តាំងពីគេផ្អើលពីដំបូងគេលក់ឱ្យមួយដុំថ្លៃ៨០០០រៀល ខ្ញុំទិញបាន៥០ដុំ លក់អស់នៅគេផ្អើលខ្លាំង តែតាំងពីពេលនោះរកលែងបានរហូតដល់សព្វថ្ងៃ»។
ស្រដៀងគ្នានេះដែរ បើតាមអ្នកលក់ចាប់ហួយនៅតំបន់ដដែលមួយផ្សេងទៀតឱ្យដឹងថាម៉ាស់១គូថ្លៃ៥០០រៀលពីមុន តែមកដល់ពេលនមួយប្រអប់ថ្លៃ២០ដុល្លារអាមេរិកយកមកលក់ម៉េចបាន តែបើថ្លៃជាង១០ដុល្លារក៏ខ្ញុំយកមកលក់ដែរ បើមានវាលក់ដាច់ណាស់ហើយឥឡូវនេះកំពុងតែទាក់ទងគេយកម៉ាស់មកលក់។
ម្ចាស់តូបលក់ចាប់ហួយរូបនេះថាដល់ពេលនេះម៉ាស់ធម្មតាកាលពីមុនមួយកញ្ចប់វាលក់ថ្លៃតែ៣.៥០០រៀលតែ ឥឡូវម៉ាស់មួយប្រអប់ថ្លៃ២៥ដុល្លារអាមេរិកហើយអត់មានម៉ាស់លក់ទៀត។ ម៉ាស់ពីរធ្លាប់លក់នៅស្រុកខ្មែរថ្លៃ៥០០រៀលនេះភាគច្រើនថាគេនាំទៅចិនវិញ អីចឹងបានជាផ្អើលធ្វើឱ្យម៉ាស់ឡើងថ្លៃ។
ដោយឡែកកន្លែងលក់ថ្នាំពេទ្យមួយកន្លែងនៅក្បែផ្សារសាមគ្គីលក់ម៉ាស់រូបដូចមាស់១គូថ្លៃ៥០០រៀលនៅនឹងកន្លែង ពេលនេះគឺនាំមកពីប្រទេសថៃ ដោយក្នុងមួយប្រអប់មានម៉ាស់១០ថ្លៃជាង៤ដុល្លារ ឬស្មើប្រមាណ១៨.០០០រៀល តែបើនៅអូឡាំពិកថ្លៃជាងនេះ។ បើតាមម្ចាស់ឱសថស្ថានខាងលើរូបនេះថា អ្នកស្រីយកម៉ាស់នេះមកពីថៃប្រមាណ៥០០ប្រអប់ហើយអះអាងថាកាលពីចាប់ផ្អើលថាម៉ាស់ឡើងថ្លៃ នេះអ្នកស្រីនៅលក់តម្លៃធម្មតាតែម៉ាស់នេះវាថ្លៃស្រាប់៕ កែសម្រួលដោយ ៖ សុឃាក់
ចែករំលែកព័តមាននេះ