ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា នាវាដឹកទំនិញមួយគ្រឿង ឈ្មោះ C0URA GEQUS (ប្រភេទនាវាដឹកប្រេង) របស់ជនបរទេសដែលចូលដែនទឹកកម្ពុជា ក្នុងចន្លោះកោះតាង និងកោះពូលូវ៉ៃ ដោយមិនមានការអនុញ្ញាត ក៏ត្រូវអជ្ញាធរកម្ពុជាបានឃាត់ នាព្រឹកថ្ងៃទី1 ខែមីនានេះ។
សេចក្តីរាយការណ៍បន្តទៀតថា ប្រតិបត្តិការខាងលើនេះ អនុវត្តន៍ដោយកម្លាំងនគរបាលបង្ក្រាបបទល្មើសលើផ្ទៃសមុទ្រ និងកម្លាំងរួមរបស់នគរបាលព្រំដែនទឹក កាលពីល្ងាចថ្ងៃ២៩ ខែកុម្ភៈ ឆ្នាំ២០២០ ហើយនៅព្រឹកថ្ងៃទី១ ខែមីនា ២០២០ នាវានេះត្រូវបានសមត្ថកិច្ចនគរបាលព្រំដែនទឹក នាំចូលមកចតនៅកំពង់ផែ ក្រុងព្រះសីហនុ ដើម្បីបន្តនីតិវិធី។
បើតាមលោកឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលព្រំដែនទឹកមានប្រសាសន៍ប្រាប់ថា ប្រតិបត្តិការនេះ ដឹកនាំផ្ទាល់ដោយលោកអគ្គស្នងការរងនគរបាលជាតិ ក្រោយពីរកឃើញថា នាវាមួយគ្រឿងនេះ ចូលរំលោភក្នុងដែនសមុទ្រប្រទេសកម្ពុជាខុសច្បាប់ អាចថា ក្នុងបំណងដោយទុច្ចរិតណាមួយ។
ក្នុងឱកាសនោះផងដែរ លោកឧត្តមសេនីយ៍ឯកតេង សួន បានប្រាប់ថា នៅលើនាវានេះមានបុគ្គលិក និងកងនាវាវិកសរុប១៦នាក់ ក្នុងនោះមានជនជាតិឥណ្ឌូនេស៊ី៤នាក់ និងជនជាតិភូមា១២នាក់ ។ ចំណែកចំណាត់ការបន្ត អជ្ញាធរចម្រុះនឹងបន្តធ្វើតាមនីតិវិធីផ្លូវច្បាប់ ហើយអជ្ញាធរនៅមិនទាន់មានរបាយការណ៍បញ្ជាក់ពីការរកឃើញអ្វីទៀត ដែលជាបទល្មើសនៅក្នុងនាវានេះនៅឡើយ នេះបើគិតត្រឹមម៉ោងជិត១០ព្រឹក ថ្ងៃទី១ មីនានេះ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ