រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា រថយន្តមួយគ្រឿងត្រូវម្ចាស់បញ្ឆេះទុកចោល ខណៈទាស់ពាក្យសម្តីជាមួយសង្សារ រួចដើរចេញទៅបាត់រៀងៗខ្លួន ក្រោយមកក៏បុរសម្នាក់ដែលគេស្គាល់ថា ជាកូនប្រុសលោកនាយរងប៉ុស្តិ៍នគរបាលបឹងត្របែក បានប្រទះឃើញរថយន្តបញ្ឆេះទុកចោលនៅតាមផ្លូវ ដោយអត់មានម្ចាស់ក៏ចូលទៅបើករថយន្តនោះយកទៅទុកមុខផ្ទះរបស់ខ្លួនឯង…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា រថយន្តមួយគ្រឿងត្រូវម្ចាស់បញ្ឆេះទុកចោល ខណៈទាស់ពាក្យសម្តីជាមួយសង្សារ រួចដើរចេញទៅបាត់រៀងៗខ្លួន ក្រោយមកក៏បុរសម្នាក់ដែលគេស្គាល់ថា ជាកូនប្រុសលោកនាយរងប៉ុស្តិ៍នគរបាលបឹងត្របែក បានប្រទះឃើញរថយន្តបញ្ឆេះទុកចោលនៅតាមផ្លូវ ដោយអត់មានម្ចាស់ក៏ចូលទៅបើករថយន្តនោះយកទៅទុកមុខផ្ទះរបស់ខ្លួនឯង បង្កឱ្យមានការភ្ញាក់ផ្អើលកាលពីម៉ោង១២អធ្រាត្រ ថ្ងៃទី២៨ ខែកុម្ភៈ ឆ្នាំ២០២០ នៅចំណុចផ្លូវ៩៥ កែងនឹងផ្លូវ៤៣២ សង្កាត់បឹងត្របែក ខណ្ឌចំការមន ។
សេចក្តីរាយការណ៍បន្តថា បុរសដែលចូលបើករថយន្តគេយកទៅទុកមិនត្រូវបានឱ្យស្គាល់ អត្តសញ្ញាណនោះទេ គ្រាន់តែដឹងថា ជាកូននាយរងប៉ុស្តិ៍នគរបាលបឹងត្របែក ខណ្ឌចំការមន ។ ដោយឡែកខាងរថយន្តក៏មិនបានឱ្យស្គាល់អត្តសញ្ញាណដូចគ្នា គ្រាន់តែដឹងថា រថយន្តម៉ាក អូឌី Q7 ពណ៌ស ពាក់ស្លាកលេខ ភ្នំពេញ 2V9868 ។
តាមប្រភពពីបុរសម្នាក់បំរើការនៅអង្គភាពសាព័ត៌មានមួយរូប សុំមិនបញ្ចេញឈ្មោះ បានឲ្យដឹងថា មុនពេលកើតហេតុ រូបគាត់ជិះម៉ូតូគោលបំណងទៅធ្វើការ ដោយធ្វើដំណើរតាម បណ្ដោយផ្លូវ៤៣២ លុះមកដល់ចំណុចខាងលើ ក៏ប្រទះឃើញរថយន្តម៉ាក អូឌី ពណ៌ស បានបញ្ឆេះចតទុកចោល ហើយបើកទ្វារអត់មានមនុស្សនោះទេ ។ លុះពេលនោះដែរ រូបគាត់បានឃើញបុរសដែលជាកូនលោកនាយប៉ុស្តិ៍ជិះម៉ូតូម៉ាកស៊ុយស៊ុគីឡែត ពណ៌ស មកឈប់ក្រោយរថយន្តអូឌី ហើយចាក់សោ.កទុកម៉ូតូ រួចហើយក៏ចូលបើករថយន្តនោះចេញទៅបាត់ ដោយមិនដឹងថាយកទៅណានោះទេ ។
ប្រភពដដែលបានបន្តទៀតថា មួយសន្ទុះក្រោយមក បុរសរូបនោះបានដើរមកយកម៉ូតូរបស់ខ្លួនវិញ ក៏ត្រូវរូបគាត់ឃាត់បុរសរូបនោះមិនឱ្យយកម៉ូតូចេញ ព្រោះសង្ស័យថា លួចរថយន្តរបួសគេ តែបុរសរូបនេះនិយាយថា គាត់ជាប៉ូលិសបើករថយន្តយកទៅទុក ទើបមានការប្រកែកគ្នាបង្កឱ្យមានការភ្ញាក់ផ្អើលដល់សមត្ថកិច្ច និងមន្ត្រីកងរាជអាវុធ ចុះទៅកន្លែងកើតហេតុ ទើបដឹងថា បុរសរូបនេះត្រូវជាកូនរបស់លោកនាយរងប៉ុស្តិបឹងត្របែក ទើបនាំខ្លួនយកទៅសាកសួរនៅប៉ុស្តិ៍នគរបាលបឹងត្របែកតែម្តង ។
ប្រភពដដែលបន្តទៀតថា នៅពេលសាកសួរទើបដឹងថា រថយន្ដខាងលើត្រូវបានបុរសជាកូនរបស់លោកនាយរងប៉ុស្តិ៍បើកយកទៅទុកនៅមុខផ្ទះរបស់ខ្លូន ទើបសមត្ថកិច្ចជំនាញក៏ទៅបើករថយន្តនោះយកមកទុកនៅប៉ុស្តិ៍នគរបាលបឹងត្របែក រួចហើយក៏បានទំនាក់ទំនងរកម្ចាស់រថយន្តឃើញភ្លាមៗផងដែរ ដោយសារតែម្ចាស់រថយន្តបានភ្លេចទូរស័ព្ទមួយគ្រឿងនៅក្នុងរថយន្ត ។
ក្រោយពេលកើតហេតុសមត្ថកិច្ចក៏បានទំនាក់ទំនងហៅម្ចាស់រថយន្តមកសួរនាំទើបដឹងថា ភាគីខាងម្ចាស់រថយន្តបានចេញពីកម្មវិធីជួបជុំមិត្តភ័ក្ដិ រួចជិះរថយន្តជាមួយសង្សារ លុះមកដល់ចំណុចខាងលើក៏ទាស់ពាក្យសម្ដីគ្នាជាមួយសង្សារ ក៏ចុះចេញពីរថយន្ត ហើយចំហរទ្វារទុកចោលនាំគ្នាដើរចេញរៀងៗខ្លួនតែម្តងទៅ ដោយមិនគិតថា មានអ្នកលួចរថយន្ដនោះទេ។
ក្រោយពេលដឹងរឿងអស់ហើយខាងរថយន្តមិនបានប្តឹងផ្តល់អ្វីនោះទេ គ្រាន់តែសុំយករបស់ខ្លួនទៅវិញតែប៉ុណ្ណោះ ។ ដោយឡែកខាងបុរសដែលបើករថយន្តគេយកទៅទុកមុខផ្ទះសមត្ថកិច្ចបានធ្វើការអប់រំណែនាំ ដោយឱ្យឪពុកម្ដាយធានាបញ្ចប់រឿងនៅកន្លែង៕ (កែសម្រួលដោយ ៖ បុប្ផា)
ចែករំលែកព័តមាននេះ