យោងតាមគេហទំព័រ Mirror បានឱ្យដឹងថា អ្នករៀបចំព្រឹត្តិការណ៍រត់ម៉ារ៉ាតុងនៅទីក្រុងឡុងដ៍ឆ្នាំ ២០២០ កំពុងតាមដានយ៉ាងដិតដល់ នូវការរាតត្បាតនៃវីរុស COVID-19 ដែលអាចបណ្តាលឱ្យព្រឹត្តិការណ៍នេះត្រូវលុបចោលទាំងស្រុង។ វីរុសថ្មីនេះ…
យោងតាមគេហទំព័រ Mirror បានឱ្យដឹងថា អ្នករៀបចំព្រឹត្តិការណ៍រត់ម៉ារ៉ាតុងនៅទីក្រុងឡុងដ៍ឆ្នាំ ២០២០ កំពុងតាមដានយ៉ាងដិតដល់ នូវការរាតត្បាតនៃវីរុស COVID-19 ដែលអាចបណ្តាលឱ្យព្រឹត្តិការណ៍នេះត្រូវលុបចោលទាំងស្រុង។
វីរុសថ្មីនេះ បានកំពុងជះផលប៉ះពាល់ដល់ព្រឹត្តិការណ៍កីឡាជាច្រើននៅទូទាំងទ្វីបអឺរ៉ុប ឱ្យបង្ខំចិត្តពន្យារពេល និងលុបចោល ខណៈដែលការប្រកួតបាល់ទាត់ក្នុងប្រទេសអុីតាលី ត្រូវពន្យារពេលស្ទើរទាំងស្រុង។
ប្រសិនបើវីរុសនេះនៅតែបន្តរីករាលដាល នោះព្រឹត្តិការណ៍ជាច្រើនទំនងជាត្រូវបានពន្យារពេល និងលុបចោលដើម្បីការពារសុវត្ថិភាព។ ក្នុងនោះការប្រកួតរត់ម៉ារ៉ាតុងដ៏ធំប្រចាំឆ្នាំ២០២០ ក្នុងទីក្រុងឡុងដ៍ ដែលនឹងធ្វើឡើងនៅថ្ងៃអាទិត្យ ២៦ មេសា ក៏កំពុងរងផលប៉ះពាល់ពីវីរុសដ៏កាចសាហាវនេះផងដែរ។
ថ្លែងទៅកាន់សារព័ត៌មាន Runners World នាយកព្រឹត្តិការណ៍រត់ម៉ារ៉ាតុងទីក្រុងឡុងដ៍លោក Hugh Brasher បាននិយាយនៅក្នុងសេចក្តីថ្លែងការណ៍មួយថា« យើងរួមជាមួយពិភពលោកទាំងមូល កំពុងតាមដានយ៉ាងដិតដល់នូវការវិវត្តន៍ ដែលទាក់ទងនឹងការរីករាលដាលនៃវីរុសនេះ និងការកត់សម្គាល់ការធ្វើបច្ចុប្បន្នភាព និងដំបូន្មានដែលផ្តល់ដោយ រដ្ឋាភិបាលចក្រភពអង់គ្លេស រួមជាមួយអង្គការសុខភាពពិភពលោក និងស្ថាប័នសាធារណៈដទៃទៀត»។
បើតាមប្រភពពី BBC បានឱ្យដឹងថា គិតមកទល់ពេលមានមនុស្សចំនួន ២៣នាក់ត្រូវបានរាយការណ៍ថាបានឆ្លងវីរុស COVID-19 នេះនៅក្នុងប្រទេសអង់គ្លេស ៕ (កែសម្រួលដោយ ៖ ធីតា)
ចែករំលែកព័តមាននេះ