រាជធានីភ្នំពេញ ៖ បុរសម្នាក់ជាអ្នកបើកបររថយន្តម៉ែសឺដេសសង្ស័យខឹងបុរសម្នាក់ទៀតស្រវឹងស្រាហើយបើករថយន្តកូរ៉ូឡាបុករថយន្តថៅកែរបស់ខ្លួន បណ្ដាលឱ្យរងការខូចខាត រួចមិនព្រមឈប់ដោះស្រាយ ទើបរត់ដេញតាមទាន់ដកកាំភ្លើងបាញ់កង់រថយន្ត បណ្តាលឱ្យផ្ទុះកង់រថយន្តបង្កការភ្ញាក់ផ្អើលដល់កម្លាំងនគរបាលចុះឃាត់ខ្លួនភ្លាមៗកាលពីវេលាម៉ោង៨យប់ថ្ងៃទី២៩ ខែ កុម្ភ: ឆ្នាំ ២០២០ នៅក្នុងបរិវេណកោះពេជ្រ សង្កាត់ទន្លេបាសាក់ ខណ្ឌចំការមន ។
បុរសម្នាក់ដែលត្រូវសមត្ថកិច្ចឃាត់ខ្លួនខាងលើឈ្មោះ ឡុង ឡងឌី ភេទប្រុស អាយុ៣៥ឆ្នាំ ជាមន្ត្រីយោធា ស្នាក់នៅភូមិម័ល សង្កាត់ដង្កោ ខណ្ឌដង្កោ ជាអ្នកបើកបររថយន្តម៉ែសឺដេស ពណ៌ស ពាក់ស្លាកលេខ ភ្នំពេញ ២AY-០០០៩ បានដកកាំភ្លើងម៉ាកឡុកបាញ់កង់រថយន្តមួយគ្រឿងម៉ាកកូរ៉ូឡា ពណ៌ស្ករ ពាក់ស្លាកលេខ ភ្នំពេញ ២AS-៦៤២១ បើកបរដោយបុរសម្នាក់មិនស្គាល់អត្តសញ្ញាណ។
តាមប្រភពពីនគរបាលផ្នែកវាស់វែងបានអោយដឹងថា មុនពេលកើតហេតុ គេឃើញរថយន្តមួយគ្រឿងម៉ាកកូរ៉ូឡាបើកបរដោយបុរសម្នាក់ស្រវឹងជោកធ្វើដំណើរស្របទិសគ្នាជាមួយនឹងរថយន្តម៉ាកម៉ែសឺដេស ដែលបើកបរដោយបុរសម្នាក់បានឈប់ដើម្បីដាក់ថៅកែចុះទៅហូបការគេម្តុំកោះពេជ្រ បន្ទាប់មកអ្នកបើកបររថយន្តម៉ែសឺដេសបានបើកទៅរកកន្លែងចត ស្រាប់តែរថយន្តកូរ៉ូឡាបានបើកបុកគូទពីក្រោយ បណ្ដាលឱ្យរថយន្តម៉ាកម៉ែសែដេសរងការខូចខាតផ្នែកខាងឆ្វេង ហើយអ្នកបើករថយន្តកូរ៉ូឡាមិនព្រមឈប់ឡើយ ធ្វើឲ្យបុរសជាអ្នកបើករថយន្តម៉ែសឺដេសរត់ដេញតាមរួចដកកាំភ្លើងខ្លីបាញ់បំបែកកង់រថយន្ត ភ្លាមៗនោះកម្លាំងនគរបាលចុះឃាត់ខ្លួនបុរសម្នាក់ដែលដកអាវុធបាញ់កង់រថយន្តម៉ាកកូរ៉ូឡា ។
តាមប្រភពដដែលបានបន្តថា ដោយឡែកបុរសម្នាក់ដែលជាអ្នកបើករថយន្តកូរ៉ូឡាពេល ត្រូវបុរសជាអ្នកបើកបររថយន្តម៉ែសឺដេសបាញ់បែកកង់រួចហើយ នៅតែដេកក្នុងរថយន្តទាំងស្ថានភាពស្រវឹងជោកជាំ ត្រូវបានសមត្ថកិច្ចនាំខ្លួនយកទៅវាស់ជាតិអាល់កុលនៅអធិការដ្ឋានខណ្ឌចំការមន ដោយសារតែស្រវឹងខ្លាំងពេកគិតតែពីដេក មិនអាចផ្លុំខ្យល់វាស់ជាតិអាល់កុលបាន ទើបសមត្ថកិច្ចទុកឲ្យដេកមួយយប់សិន ។
ក្រោយពេលកើតហេតុ រថយន្តទាំង២គ្រឿងខាងលើត្រូវបានសមត្ថកិច្ចធ្វើការវាស់វែងយកទៅរក្សាទុកនៅអធិការដ្ឋានខណ្ឌចំការមន រីឯបុរសជាអ្នកដកកាំភ្លើងបាញ់កង់រថយន្តត្រូវបានប្រគល់អោយខាងកម្លាំងកងរាជអាវុធក្រុងភ្នំពេញដើម្បីចាត់ការតាមផ្លូវច្បាប់ពាក់ព័ន្ធករណីផ្ទុះអាវុធតាមផ្លូវសាធារណ: ៕ (កែសម្រួលដោយ ៖ ធីតា)
ចែករំលែកព័តមាននេះ