រាជធានីភ្នំពេញ ៖ នៅព្រឹកថ្ងៃទី១ ខែមីនា ឆ្នាំ២០២០នេះ នាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងថា ថ្មីៗនេះ មានការផ្សព្វផ្សាយដោយចេតនាទុច្ចរិត ព័ត៌មានមិនពិតនៅក្នុង Page មួយចំនួន ក្នុងគោលបំណងបង្កភាពចលាចលក្នុងប្រទេស ដោយថាមានជនជាតិជប៉ុនដួលស្លាប់ នៅម្តុំបរិវេណប្រាសាទអង្គរ។
រូបភាពដែលបានបង្ហោះក្នុង Page ទាំងនោះ ជារូបភាពយកពី Page ផ្សព្វផ្សាយព័ត៌មានរបស់នាយកដ្ឋាននគរបាលការពារបេតិកភណ្ឌ ហើយត្រូវបានយកមកប្រើក្នុងគោលបំណងបំភ័ន្តភ្នែកប្រជាពលរដ្ឋឱ្យមានការយល់ច្រឡំតែប៉ុណ្ណោះ។
នាយកដ្ឋានប្រឆាំងបទល្មើសបច្ចេកវិទ្យាបានកំពុងស្រាវជ្រាវ Page មួយចំនួននោះ ហើយក៏មានតម្រុយខ្លះៗផងដែរ ដើម្បីនាំខ្លួនជនទាំងនោះ យកមកចាត់វិធានការតាមផ្លូវច្បាប់។
គួររំលឹកថា «កាលពីថ្ងៃទី១៤ ខែកុម្ភៈ កម្លាំងអង្គភាពនគរបាលការពារបេតិកភណ្ឌ ប្រចាំតំបន់អង្គរ បានជួយសង្គ្រោះដល់ភ្ញៀវជនជាតិជប៉ុន ភេទស្រី អាយុ៧២ឆ្នាំ ដែលបានកើតខ្យល់គរ បណ្តាលឱ្យដើរមិនរួច នៅចំណុចមុខព្រះរយព្រះពាន់ ហើយជនរងគ្រោះក៏ត្រូវបានដឹកយកទៅព្យាបាលនៅមន្ទីរពេទ្យរ៉ូយ៉ាល់អង្គរ»៕ (កែសម្រួលដោយ ៖ បុប្ផា)
ចែករំលែកព័តមាននេះ