រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសចំណាស់ម្នាក់គេសង្ស័យថា ស្រវឹងស្រា ហើយវង្វេងស្មារតី ដោយមិនដឹងថា មកពីទីណានោះទេ ស្រាប់តែស្រែកផ្អើលឆោឡោថា «មានគេវ៉ៃទម្លាក់ពីលើរថយន្ត រួចបើកគេចខ្លួនបាត់ស្រមោល» បង្កឱ្យមានការភ្ញាក់ផ្អើលកាលពីម៉ោង១១យប់ ថ្ងៃទី២៩ ខែកុម្ភៈ ឆ្នាំ២០២០ នៅត្រង់ចំណុចជាប់នឹងរបងមន្ទីរពេទ្យមិត្តភាព-ខ្មែរសូវៀត ហៅពេទ្យរុស្ស៊ី នៅតាមបណ្ដោយផ្លូវ២៧១ ស្ថិតក្នុងសង្កាត់ទំនប់ទឹក ខណ្ឌបឹងកេងកង។
បើតាមសម្ដីរបស់បុរសម្នាក់ដែលជាអ្នករត់ម៉ូតូកង់បីបានប្រាប់ឲ្យដឹងថា រូបគាត់បានធ្វើដំណើរនៅតាមដងផ្លូវលេខ២៧១ ពីកើតទៅលិច លុះមកដល់ចំណុចកើតហេតុ គេឃើញបុរសចំណាស់ម្នាក់ដេកនៅលើផ្លូវ ពេលនោះគាត់ក៏ចុះលើកទៅដាក់នៅអែបខាង រួចសួរនាំទៅ ស្រាប់តែបុរសខាងលើឆ្លើយថា រូបគាត់បើកឡាន ហើយមានគេមកវ៉ៃគាត់ធ្លាក់ពីលើឡាន រួចក៏បើកឡានគេចខ្លួនបាត់ស្រមោល ដោយគាត់របួសបាក់ដៃខាងឆ្វេង ។
ប្រភពដដែលបន្តថា ដោយបានលឺដូច្នេះ បុរសជាអ្នករត់កង់បីក៏ស្រែកឱ្យគេជួយ ហើយក៏ផ្អើលដល់លក់ដូរនៅក្បែនោះ និងបានរាយការណ៍មកសមត្ថកិច្ចប៉ុស្តិ៍នគរបាលរដ្ឋបាលទំនប់ទឹក ឱ្យចុះទៅជួយមើលនៅកន្លែងកើតហេតុតែម្តង។
ពេលដែលសមត្ថកិច្ចចុះទៅដល់កន្លែងកើតហេតុ ស្រាប់តែឆែកមើលក្នុងខ្លួនឃើញមានកាតសំគាល់ខ្លួនជាយោធា និងមានទូរស័ព្ទដៃ២គ្រឿង និងសោឡាន១ផងដែរ ពេលនោះសមត្ថកិច្ចបានទាក់ទងទៅក្រុមគ្រួសារ លុះពេលដែលក្រុមគ្រួសារចុះមកដល់បានប្រាប់សមត្ថកិច្ចថា ឡានទុកនៅផ្ទះមិនមានអ្នកណាវ៉ៃយកទេ ។
ហើយសមត្ថកិច្ចក៏មិនដឹងថា គាត់ជិះអីពីណាមកទៅណានោះទេ ខណៈពេលសួរគាត់ម្ដងថាជប់លៀង ម្ដងថាមកពីជួបជុំមិត្តភក្កិ ដូច្នេះហើយសមត្ថកិច្ចក៏ព្រមប្រគល់បុរសខាងលើឲ្យទៅក្រុមគ្រួសារយកដឹកតាមម៉ូតូកង់បីទៅមន្ទីរពេទ្យតែម្តង ដោយសារតែគាត់មានរងរបួសបាក់ដៃខាងឆ្វេង ៕ (កែសម្រួលដោយ ៖ បុប្ផា)
ចែករំលែកព័តមាននេះ