តាមប្រភពព័ត៌មាន Metro បានឱ្យដឹងថា ក្រុមហ៊ុនផលិតស្រាបៀរ Anheuser-Busch InBev មានការព្រួយបារម្ភពីការធ្លាក់ចុះប្រាក់ចំណេញប្រចាំត្រីមាសយ៉ាងហោចណាស់មួយទសវត្ស បន្ទាប់ពីមានការផ្ទុះឡើងនៃជំងឺកូរ៉ូណា (COVID-19) ដែលមានតម្លៃខាតបង់អស់ប្រហែល១៧០លានដុល្លារអាមេរិក។
ក្រុមហ៊ុនផលិតស្រាបៀរដ៏ធំបំផុតនៅលើពិភពលោកដែលស្ថិតនៅពីក្រោយម៉ាក Corona, Budweiser និង Stella Artois ត្រូវបានគេព្យាករណ៍ថា ប្រាក់ចំណូលនៅត្រីមាសទី១ នឹងធ្លាក់ចុះប្រហែល ១០% បន្ទាប់ពីការផ្ទុះវីរុសនេះស្របពេលបុណ្យចូលឆ្នាំរបស់ប្រទេសចិន។
ក្រុមហ៊ុន AB InBev ប៉ាន់ស្មានប្រាក់ចំណូលដែលរកបាននៅទូទាំងប្រទេសចិន បន្ទាប់ពីបានបាត់ការលក់ប្រហែល២៨៤លានដុល្លារអាមេរិក ក្នុងរយៈពេលពីរខែដំបូងនៃឆ្នាំ២០២០។ ក្រុមហ៊ុនដែលមានមូលដ្ឋាននៅបែលហ្ស៊ិក បានប្រាប់ថា «ផលប៉ះពាល់នៃការផ្ទុះឡើងនៃវីរុស Covid-19 មកលើអាជីវកម្មរបស់យើងនៅតែបន្តវិវឌ្ឍន៍។ ការផ្ទុះឡើងនៃជំងឺនេះបាននាំឱ្យមានការធ្លាក់ចុះយ៉ាងខ្លាំងនូវតម្រូវការនៅក្នុងប្រទេសចិន។ លើសពីនេះទៀតតំរូវការក្នុងឱកាសបុណ្យចូលឆ្នាំចិនគឺទាបជាងឆ្នាំមុនៗ ដែលវាកើតឡើងចំពេលចាប់ផ្តើមនៃការផ្ទុះឡើងនេះ»។
កាលពីខែមុន Google បាននិយាយថា ការចុចស្វែងរកទំនាក់ទំនងគ្នារវាងជំងឺកូរ៉ូណាថ្មី និងស្រាបៀរ Corona មានការកើនឡើងដល់ទៅ ១១០០%។ តាមពិតទៅគឺ វាគ្មានទំនាក់ទំនងរវាងស្រាបៀរ Corona និងជំងឺកូរ៉ូណានោះទេ៕ (កែសម្រួលដោយ ៖ ធីតា)
ចែករំលែកព័តមាននេះ