ខេត្តបន្ទាយមានជ័យ ៖ ជនសង្ស័យម្នាក់ត្រូវបានកម្លាំងនគរបាលស្រុកថ្មពួកបង្ក្រាបចាប់ ខ្លួនបញ្ជូនមកកាន់ស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការតាមច្បាប់ បន្ទាប់ពីជាប់ចោទពីបទប្រើប្រាស់និងចែកចាយនូវសារធាតុញៀនដោយខុសច្បាប់ តាមបន្ទាត់ព្រំដែនកម្ពុជា-ថៃ ក្នុងស្រុកថ្មពួក ខេត្តបន្ទាយមានជ័យ ។
លោកវរសេនីយ៍ឯក សៅ សារឿន អធិការនគរបាលស្រុកថ្មពួកបានឲ្យដឹងថា កាលពីវេលាម៉ោង៥និង២០នាទីល្ងាចថ្ងៃទី២៦ខែកុម្ភៈឆ្នាំ២០២០ កំលាំងប៉ុស្តិ៍នគរបាលរដ្ឋបាលគោករមៀត បានចេញល្បាតនៅចំណុចមាត់ស្រះជាប់ព្រំដែនកម្ពុជា-ថៃ ក្នុងភូមិសាស្ត្រភូមិបន្ទាយមានរឹទ្ធិ ឃុំគោករមៀត ស្រាប់តែប្រទះឃើញមុខសញ្ញាប្រើប្រាស់ថ្នាំញៀនម្នាក់ឈ្មោះ ម៉ាង គុយ ភេទប្រុស អាយុ៦០ឆ្នាំ រស់នៅបន្ទាយមានរឹទ្ធិ ឃុំគោករមៀត ស្រុកថ្មពួក ខេត្តបន្ទាយមានជ័យ ពេលនោះកំលាំងសមត្ថកិច្ចបានឆែកឆេររកឃើញម្សៅក្រាមសថ្លាសរុបចំនួន៤ថង់តូច ក្នុងហោប៉ៅខោខាងស្តាំចំនួន២ថង់តូច និងក្នុងកញ្ចប់បារីដាក់ហោប៉ៅអាវខាងឆ្វេងចំនួន២ថង់តូច ដែកកេះ១ និងទូរស័ព្ទ១គ្រឿង បន្ទាប់មកកំលាំងសមត្ថកិច្ចបាននាំជនសង្ស័យមកកាន់ប៉ុស្តិ៍រដ្ឋបាលដើម្បីសាកសួរ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ទន្ទឹមនឹងប្រើប្រាស់ ខ្លួនក៏បានទិញថ្នាំញៀនដើម្បីយកមកទុកលក់ចែកចាយបន្តដល់អ្នកប្រើប្រាស់នៅតាមព្រំដែនផងដែរ ។
ដោយផ្អែកលើចម្លើយសារភាព និងការរកឃើញវត្ថុតាងថ្នាំញៀនជាក់ស្តែងនៅនឹងខ្លួន ជនសង្ស័យ រួមទាំងវត្ថុតាងត្រូវបានបញ្ជូនមកកាន់ស្នងការដ្ឋាននគរបាលខេត្តបន្ទាយមានជ័យ ដើម្បីរៀបចំសំណុំរឿងបញ្ជូនទៅសាលាដំបូងខេត្ត ចាត់ការបន្តតាមនិតិវិធីច្បាប់នៅថ្ងៃទី២៨ ខែកុម្ភៈ ឆ្នាំ២០២០នេះហើយដែរ៕ (កែសម្រួលដោយ ៖ ធីតា)
ចែករំលែកព័តមាននេះ