រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសជាមន្ត្រីធោយាម្នាក់ជិះម៉ូតូ PCX មួយគ្រឿង ចេញមកពីផ្ទះរបស់មិត្តភក្តិ ខណៈមកដល់ផ្លូវស្ងាត់ ក៏ត្រូវក្រុមចោរ១ក្រុមធ្វើសកម្មភាពដកកាំភ្លើងភ្ជង់ប្លន់យកម៉ូតូ រួចជិះរត់គេចខ្លួនដោយសុវត្ថិភាព បង្កឱ្យមានការភ្ញាក់ផ្អើលកាលពីម៉ោង១១និង១០នាទីយប់ ថ្ងៃទី២៧ ខែកុម្ភៈ ឆ្នាំ២០២០ នៅចំណុចខាងត្បូងចក្រចូលប៉ុស្តិ៍នគរបាលរដ្ឋទួលសង្កែទី២ តាមបណ្ដោយផ្លូវ១៨០០ ស្ថិតក្នុងសង្កាត់ទួលសង្កែទី២ ខណ្ឌឬស្សីកែវ។
តាមសម្តីពីបុរសជាជនរងគ្រោះមិនបានបញ្ចេញឈ្មោះ គ្រាន់តែប្រាប់ថាជាមន្ត្រីយោធាបានរៀបរាប់ប្រាប់ឲ្យដឹងថា នៅមុនកើតហេតុ ជនរងគ្រោះបានជិះម៉ូតូមួយគ្រឿងម៉ាក PCX ពណ៌ទឹកប្រាក់ ពាក់ស្លាកលេខ ខេមរភូមិន្ទ 01 1-1706 ទើបតែជិះចេញមកពីផ្ទះរបស់មិត្តភក្តិនៅឯសំរោងអណ្ដែត ក្នុងបំណងត្រឡប់ទៅផ្ទះរបស់ខ្លួនវិញ នៅបុរីវិមានភ្នំពេញ ដោយជិះតាមបណ្ដោយផ្លូវ១៨០០ ពីជើងទៅត្បូង។ លុះមកដល់ចំណុចកើតហេតុ ដែលជាផ្លូវស្ងាត់ ក៏ស្រាប់តែមានក្រុមជនសង្ស័យមានគ្នាចំនួន២នាក់ជិះម៉ូតូមួយគ្រឿងមិនចាំម៉ាក ប្រភេទអូតូ មកពីក្រោយជនរងគ្រោះតែម្តង។
ប្រភពដដែលបន្តថា ក្រោយមកក៏មានជនសង្ស័យម្នាក់ក្នុងចំណោម២នាក់នោះ បានដកកាំភ្លើងខ្លីមួយដើមយកមកភ្ជង់គំរាមជនរងគ្រោះឱ្យជិះម៉ូតូអែបទៅឈប់លើចិញ្ចើមផ្លូវ ដោយជនរងគ្រោះភ័យខ្លាំងពេក ក៏យល់ព្រមចុះពីលើម៉ូតូ និងប្រគល់តេឡេម៉ូតូឲ្យទៅជនសង្ស័យតាមសម្រួល។ ភ្លាមៗនោះ ក៏មានជនសង្ស័យម្នាក់ម្នាក់បានឡើងជិះម៉ូតូរបស់ជនរងគ្រោះ រួចក៏នាំគ្នាជិះគេចខ្លួនចេញពីកន្លែងកើតហេតុបាត់ស្រមោលតែម្តង។
ក្រោយពេលកើតហេតុ ជនរងគ្រោះបានត្រឹមតែទាក់ទងទៅក្រុមគ្រួសារឲ្យដឹកយកទៅដាក់ពាក្យបណ្តឹងនៅប៉ុស្តិ៍នគរបាលរដ្ឋទួលសង្កែទី២ ដោយក្តីអស់សង្ឃឹមតែប៉ុណ្ណោះ៕ (កែសម្រួលដោយ ៖ បុប្ផា)
ចែករំលែកព័តមាននេះ